.jpg)
ក្រុមក្រសួងការពារជាតិ បានបង្ហាញពានធំ ពេលថតជុំគ្នាជាមួយថ្នាក់ដឹកនាំ គ្រូបង្វឹក និងអត្តពលិកផ្សេងទៀត ក្នុងពិធីបិទ។ NOCC
ភ្នំពេញ៖ ក្រុមប៉េតង់ក្រសួងការពារជាតិ (ទ័ព) បានរកឃើញលទ្ធផលដ៏គាប់ប្រសើរវិញហើយ គឺការឈ្នះពានធំ នៃការប្រកួតកីឡាប៉េតង់ ពានរង្វាន់សម្តេចក្រឡាហោម ស ខេង លើកទី ១៩ ប្រចាំឆ្នាំ ២០១៩ ស្របពេលដែលក្រុមកំពង់សំណាញ់ បានធ្វើឲ្យអ្នកទស្សនា ពិសេសថ្នាក់ដឹកនាំសហព័ន្ធកីឡាប៊ូល និងប៉េតង់កម្ពុជាមានការភ្ញាក់ផ្អើល ពីការឈ្នះពានលើវិញ្ញាសា ៣ នាក់ ទល់ ៣ នាក់ ផ្នែកយុវជនរបស់ពួកគេ។
គេនៅចាំបានថា ការប្រកួតកីឡាប៉េតង់ពានរង្វាន់សម្តេចវិបុលបញ្ញា សុខ អាន លើកទី ៧ ឆ្នាំ ២០១៩ កាលខែកញ្ញា កន្លងមកនេះ ក្រុមក្រសួងការពារជាតិ បានបាត់បង់ឱកាសឈ្នះពានធំ លើវិញ្ញាសា ៣ នាក់ ទល់ ៣ នាក់ ពានធំនេះ ក្រោយពួកគេបានចាញ់ក្រុមក្រសួងមហាផ្ទៃ ១៣-១២ ក្នុងវគ្គផ្តាច់ព្រ័ត្រ។
ប៉ុន្តែការប្រកួត ៣ នាក់ ទល់ ៣ នាក់ ពានធំក្នុងពានរង្វាន់សម្តេចក្រឡាហោម ស ខេង លើកទី ១៩ ដែលទើបបានបញ្ចប់កាលពីល្ងាចថ្ងៃពុធ កន្លងមកនេះ ក្រុមក្រសួងការពារជាតិ របស់ម្ចាស់មេដាយមាសពិភពលោក សុខ ច័ន្ទមាន បានយកឈ្នះក្រុមសមាគមកីឡាប៉េតង់ខេត្តតាកែវ ដោយមិនសូវលំបាកឡើយ ដើម្បីគ្រងតំណែងជើងឯក ខណៈលេខ ៣ បានទៅក្រុមសេនារាជសីហ៍។
ដោយឡែក ក្រុមកំពង់សំណាញ់ មកពីខេត្តកណ្តាល បានយកឈ្នះក្រុម មជ្ឈមណ្ឌលកីឡា ខ.ភ.ម ដែលសម្បូរទៅដោយកីឡាករថ្នាលជម្រើសជាតិ នៅវគ្គផ្តាច់ព្រ័ត្រ ដើម្បីគ្រងតំណែងជើងឯក លើវិញ្ញាសា ៣ នាក់ ទល់ ៣ នាក់ ផ្នែកយុវជន ខណៈលេខ ៣ បានទៅលើក្រុមកីឡាប៉េតង់ ២ ធ្នូ។
ការឈ្នះពានរបស់ក្រុមយុវជនកំពង់សំណាញ់ បានធ្វើឲ្យអ្នកទស្សនាមានការភ្ញាក់ផ្អើលខ្លាំង ចំណែក លោក ស សុខា ប្រធានសហព័ន្ធកីឡាប៊ូល និងប៉េតង់កម្ពុជា បានចាត់ទុកជ័យជម្នះរបស់ក្រុមនេះថា ជាលទ្ធផលល្អ ដែលកើតចេញពីការបណ្តាក់ទុនរបស់សហព័ន្ធ ហើយនៅក្នុងចំណោមអត្តពលិកជាង ៣០០ នាក់ មកពី ៤២ ក្លិបសមាគម ដែលបានចូលរួមក្នុងព្រឹត្តិការណ៍នេះ ក៏មានក្រុមយុវជនច្រើនផងដែរ។
លោក ស សុខា បានថ្លែងប្រាប់ប្រព័ន្ធផ្សព្វផ្សាយក្រោយការប្រកួតថា៖ «ក្នុងគោលបំណង និងទិសដៅឆ្ពោះទៅស៊ីហ្គេម ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ យើងបានផ្តល់ឱកាសច្រើនដល់យុវជន ជាពិសេសយុវជនថ្នាល ដែលយើងបានបណ្តុះបណ្តាលនៅតាមមន្ទីរ រាជធានី ខេត្ត ក្នុងនោះយើងឃើញហើយថា ការប្រកួត ៣ នាក់ ទល់ ៣ នាក់ គឺយុវជនមកពីខេត្តកណ្តាល ដែលមានអាយុចន្លោះពី ១៥ ឆ្នាំ ទៅ ១៦ ឆ្នាំទេ ប៉ុន្តែពួកគាត់អាចយកឈ្នះក្រុមជម្រើសជាតិ»។
«អ៊ីចឹងមានន័យថា ផលដែលយើងបានបណ្តាក់ទុន កន្លងមកនេះ គឺយើងទទួលបានផលមួយ ដែលយើងគិតថា អាចទទួលយកបាន។ ពិតមែនតែគាត់នៅក្មេងខ្ចី តែយើងត្រូវតែបន្ត និងពង្រឹងបន្ថែម ធ្វើម៉េចផ្តល់ភាពកក់ក្តៅជូនពួកគាត់ អ៊ីចឹងយើងត្រូវតែជួយជំរុញ គឺមិនមែនតែនៅភ្នំពេញប៉ុណ្ណោះទេ ប៉ុន្តែត្រូវមាននៅតាមបណ្តាខេត្តផ្សេងៗ ធ្វើម៉េចឲ្យគាត់មានគុណភាពល្អ ដើម្បីចម្រាញ់បានយុវជនល្អៗ សម្រាប់ត្រៀមការប្រកួតស៊ីហ្គេម ទាំងនៅឆ្នាំ ២០១៩ នេះ ឆ្នាំ ២០២១ នៅវៀតណាម និងស៊ីហ្គេម ឆ្នាំ ២០២៣ នៅកម្ពុជា»។ លោក ស សុខា បានបន្ថែម។
ដោយឡែកសម្រាប់ការប្រកួត ២ នាក់ ទល់ ២ នាក់ ផ្នែកយុវនារី ក្រុមមជ្ឈមណ្ឌល ខ.ភ.ម បានយកឈ្នះក្រុមក្រសួងការពារជាតិ ដើម្បីទទួលបានលេខ ១ ខណៈលេខ ៣ បានទៅក្រុមទីស្តីការគណៈរដ្ឋមន្រ្តី។ រីឯការប្រកួត ៣ នាក់ ទល់ ៣ នាក់ ផ្នែកនារី ក្រុមទីស្តីការគណៈរដ្ឋមន្រ្តី បានលេខ ១ ក្រោយឈ្នះក្រុមយោធភូមិភាគពិសេស ហើយលេខ ៣ បានទៅក្រុមក្រសួងការពារជាតិ។ ចំពោះការប្រកួត ៣ នាក់ ទល់ ៣ នាក់ វ័យចាស់ ក្រុមសាលាខេត្តស្វាយរៀង បានយកឈ្នះក្រុមទីស្តីការគណៈរដ្ឋមន្រ្តី ដើម្បីគ្រងជើងឯក ខណៈក្រុមដំរីជាន់ខ្លាខេត្តកំពង់ធំបានលេខ ៣៕
