ភ្នំពេញ៖ ក្រុមក្រសួងការពារជាតិ (ទ័ព) មិនបានបង្ហាញពីមហិច្ឆតាចង់រារាំងដំណើរឈ្នះពានមុនបិទរដូវកាលលីកកំពូលកម្ពុជា ឆ្នាំ ២០១៩ របស់ក្រុមមិនទាន់ស្គាល់ការចាញ់សោះ ព្រះខ័នរាជស្វាយរៀង នោះទេ ខណៈក្រុមទាំង ២ ត្រូវវិលមកជួបគ្នា នៅថ្ងៃអាទិត្យនេះ ចំណែកក្រុមវិសាខា ក៏ត្រូវជម្រះបញ្ជីចាស់ជាមួយក្រុមអាស៊ីអឺរ៉ុប ដើម្បីលុបបំបាត់ហ្មងសៅ កាលជំនួបជើងទី ១ ផងដែរ។
ក្រុមស្វាយរៀង ធ្លាប់បានយកឈ្នះទ័ព ២-១ ម្តងហើយ កាលប្រកួតជើងទី ១ ហើយការវិលមកជួបគ្នាលើកនេះ គឺត្រឹមលទ្ធផលស្មើ ក៏ស្វាយរៀងអាចឈ្នះពានដោយស្វ័យប្រវត្តិ ដោយមិនចាំបាច់អ៊ុតមើល ២ ប្រកួតចុងក្រោយបានដែរ ព្រោះ ២៣ ប្រកួតមកនេះ ស្វាយរៀងមាន ៥៩ ពិន្ទុ គឺដាច់ឆ្ងាយពីក្រុមលេខ ២ វិសាខា រហូតដល់ ៨ ពិន្ទុឯណោះ ហើយលោក ជូ សារឿន គ្រូជំនួយក្រុមស្វាយរៀង បានប្រាប់ថា ការជួបក្រុមទ័ពលើកនេះ ក៏ស្ថិតនៅក្នុងឱកាសឈ្នះពាន មុនបិទរដូវកាលរបស់ក្រុមលោកផងដែរ។
ជុំវិញរឿងនេះ លោក ទេព ឡុងរចនា អ្នកចាត់ការទូទៅក្រុមក្រសួងការពារជាតិ បានប្រាប់ថា៖ «បើគេចង់លើកពាន មុនបិទរដូវកាលទៅហើយនោះ ឲ្យគេទៅ ព្រោះបើយើងរារាំងគេ ក៏យើងមិនបានពាននោះដែរ។ ម្យ៉ាងទៀត យើងខ្វះកម្លាំងក្នុងការលេង ហើយអារម្មណ៍កីឡាកររបស់យើងមួយចំនួនពេលនេះ ក៏ដូចជាអ្នកឈឺដែរ គឺលែងមានមហិច្ឆតាមោះមុតទៀតហើយ អ៊ីចឹងយើងមានតែរុញទូកបណ្តោយទឹក»។
តាមរយៈការប្រកួត ២៣ លើកកន្លងមកនេះ ក្រុមទ័ព បានធ្លាក់ទៅឈរនៅលេខ ៧ មានត្រឹម ៣៥ ពិន្ទុ ហើយពួកគេក៏គ្មានឱកាស វិលមកឈរនៅតំបន់កំពូលតារាងទាំង ៤ វិញនោះដែរ ព្រោះវិសាខា ដែលមាន ៥១ ពិន្ទុ និងណាហ្គាវើល មាន ៤៨ ពិន្ទុ គឺប្រាកដណាស់ថា នឹងស្ថិតនៅ Top4 ដោយស្វ័យប្រវត្តិ។ រីឯ បឹងកេត ដែលកំពុងឈរនៅលេខ៤ មាន ៤៣ ពិន្ទុ នៅសល់ការប្រជែងពីក្រុមឈរនៅលេខ ៥ អង្គរថាយហ្គឺរ មាន ៤២ ពិន្ទុ និងភ្នំពេញក្រោន មាន ៤១ ពិន្ទុ។
លោក ឡុងរចនា បានបន្ថែមថា៖ «នៅពេលនេះ ក្រុមស្វាយរៀងខ្លាំងជាងយើង ព្រោះគេកំពុងឡើងជើង ពិសេសគេមានទាំងកម្លាំងកាយ កម្លាំងចិត្ត ឆន្ទៈ និងស្មារតីក្នុងការប្រកួតខ្លាំង ដើម្បីសម្រួចទិសដៅទៅរកការឈ្នះពាន មុនបិទរដូវកាលរបស់ពួកគេ ដូច្នេះយើងពិបាកទប់គេហើយ ហើយយើងក៏គ្មានមហិច្ឆតាទប់ស្កាត់ការឈ្នះពានរបស់គេដែរ គឺយើងនឹងលេងទៅតាមធម្មតា»។
ដោយឡែកក្រុមវិសាខា ដែលជាគូប្រជែងយកពានតែមួយគត់របស់ក្រុមស្វាយរៀងនោះ នឹងត្រូវជម្រះបញ្ជីចាស់ជាមួយក្រុមអាស៊ីអឺរ៉ុប ដើម្បីលុបលាងការចាញ់ ៣-១ កាលពីជើងទី ១ ហើយការដណ្តើម ៣ ពិន្ទុលើកនេះ ក៏នឹងជួយឲ្យ វិសាខា អាចការពារទីតាំងលេខ ២ ពីការប្រជែងរបស់ណាហ្គាវើលដែរ៕
កម្មវិធីប្រកួតនៅថ្ងៃសៅរ៍
-គិរីវង់ v អង្គរថាយហ្គឺរ កីឡដ្ឋានគិរីវង់សុខសែនជ័យ ៣:៣០
-ភ្នំពេញក្រោន v អគ្គិសនីកម្ពុជា កីឡដ្ឋាន RSN ៦:០០
-ណាហ្គាវើល v យុវជនបាទី U18 កីឡដ្ឋានស្តាតចាស់ ៦:០០
៤ ប្រកួត នៅថ្ងៃអាទិត្យ
-សូលទីឡូអង្គរ v ខេត្តកំពង់ចាម កីឡដ្ឋានសៀមរាប ៣:៣០
-អាស៊ីអឺរ៉ុប v វិសាខា កីឡដ្ឋាន AEU Sport Park ៣:៣០
-បឹងកេត v ប៉ូលិស កីឡដ្ឋានខេមបូឌាអ៊ែរវ៉េ ៣:៣០
-ស្វាយរៀង v ទ័ព នៅកីឡដ្ឋានខេត្តស្វាយរៀង ៦:០០