The Phnom Penh Post Search

Search form

ទ័ព ដាក់​សិស្ស​មក​អបអរ​ ពេល​ប៉ះ​ស្វាយរៀង

Content image - Phnom Penh Post
ជំនួប​ចុង​ក្រោយ​រវាង​ក្រុមទ័ព (ឆ្វេង) និង​ស្វាយ​រៀង ដោយ​ទ័ព ឈ្នះ ៥-៣ ដោយ​បាល់​ប៉េណាល់​ទី។ ស្រេង ម៉េងស្រ៊ុន

ទ័ព ដាក់​សិស្ស​មក​អបអរ​ ពេល​ប៉ះ​ស្វាយរៀង

ភ្នំពេញៈ ក្រុម​ក្រសួង​ការពារ​ជាតិ (ទ័ព) នឹង​ត្រូវ​បើក​កីឡដ្ឋាន​ស្តាតចាស់ ដែល​ទើប​បំពាក់​ដោយ​ភ្លើង​បំភ្លឺ​ដ៏ស្រស់​ស្អាត ដើម្បី​ស្វាគមន៍​ក្រុម​ដ៏ខ្លាំង​គឺ​ព្រះខ័នរាជ​ស្វាយរៀង នៅ​យប់​ថ្ងៃ​អាទិត្យ ហើយ​ក្រុម​ម្ចាស់ផ្ទះ​មួយនេះ ក៏បាន​បើក​ចំហ​ឲ្យ​សិស្សា​នុសិស្ស​កំពុង​រៀន​នៅ​វិទ្យាល័យ​ទូទាំង​រាជធានី​ភ្នំពេញ ចូលរួម​ទស្សនា​ដោយ​សេរី​ផងដែរ។

ចំណែក​ក្រុម​បឹងកេត ក៏នឹង​ត្រូវ​ការពារ​ទីតាំង​លេខ ៣ ពីការ​ប្រជែង​របស់​ក្រុម​ណាហ្គាវើល នៅ​ថ្ងៃ​សៅរ៍​ដែរ។

ការវិល​មកជួប​គ្នារ​វាង​ក្រុមទ័ព និង​ស្វាយរៀង លើក​នេះ វា​ជាការ​ប្រកួត​ដ៏សំខាន់ ក្នុងការ​ដណ្តើម​យក​តំបន់​កំពូល​តារាង ដែល​កំពុង​គ្រប់គ្រង​ដោយ​ក្រុម​ស្វាយរៀង ប៉ុន្តែ លោក ទេព ឡុង​រចនា គ្រូ​បង្វឹក​ក្រុម​ក្រសួង​ការពារ​ជាតិ និយាយថា វា​ជារឿង​លំបាក។

លោក ឡុងរចនា បាន​ប្រាប់​កាលពី​ម្សិលមិញ​ថា៖ «ការ​ប្រកួត​លើក​នេះ យើង​បាន​ត្រៀមខ្លួន​យ៉ាង​ពិសេស ព្រោះ​យើង​ត្រូវជួប​ក្រុម​មិនដែល​ចាញ់​សោះ។ យើង​ត្រៀម​គ្រប់​តំបន់​ទាំងអស់ ប៉ុន្តែ​ការស្វែង​រក ៣ ពិន្ទុ​លើក​នេះ វាជា​រឿង​លំបាក ព្រោះ​ស្វាយរៀង មានភាព​ប្រែប្រួល​ខ្លាំង ដែល​ទាមទារ​ឲ្យយើង​ត្រូវ​ប្រែប្រួល​ដែរ»។

លោក​បន្ថែម​ថា៖ «ខ្សែ​ប្រយុទ្ធ​ស្បែក​ខ្មៅ​ទាំង ៣ នាក់​របស់​ស្វាយរៀង អាច​ជា​ឧបសគ្គ​របស់​យើង ព្រោះ​ពួកគេ​ធ្វើ​សកម្មភាព​បាន​ល្អ ប៉ុន្តែ​អ្វីដែល​ល្អ ក៏អាច​នឹង​បង្ហាញ​ពីចំណុច​ខ្សោយ​ផងដែរ។ហេតុនេះ​យើង​ត្រូវ​ពិនិត្យ​មើល​ពេល​ប្រកួត​ជាក់ស្តែង នឹង​ប្រែប្រួល​ការលេង​ទៅតាម​ហ្នឹង​ដែរ»។

ចំណែក​លោក សំ វ៉ាន់ដេត គ្រូ​បង្វឹក​ក្រុម​ស្វាយរៀង មិនអាច​ទាក់ទង​បាន​ទេ កាលពី​ម្សិលមិញ។ យ៉ាងណា​ក៏ដោយ ស្វាយរៀង ជាក្រុម​កំពុង​លេច​ធ្លោរ​ខ្លាំង ព្រោះ ៧ ប្រកួត​នេះ​ពួកគេ​ឈ្នះ ៦ ស្មើ ១ និង​កំពុង​ឈរ​នៅលើ​កំពូល​តារាង​មាន ១៩ ពិន្ទុ តាម​ពីក្រោយ​ដោយ​ក្រុម​ទ័ព មាន ១៧ ពិន្ទុ។

គួរ​បញ្ជាក់ថា ការ​ជួបគ្នា​រវាង​ក្រុម​ខ្លាំង​ទាំង ២ នេះ មាន​ការលក់​សំបុត្រ ៥០០០ រៀល និង ៣០០០ រៀល សម្រាប់​អ្នក​ទស្សនា​ផ្ទាល់ ប៉ុន្តែ​ចំពោះ​សិស្សានុសិស្ស​ដែល​កំពុង​សិក្សា​តាម​បណ្តា​វិទ្យាល័យ​ទូទាំង​រាជធានី​ភ្នំពេញ គឺ​ក្រុមទ័ព នឹង​អនុញ្ញាត​ឱ្យ​ចូល​ទស្សនា​ដោយ​សេរី ដោយ​គ្រាន់តែ​ភ្ជាប់​មកជា​មួយ​នូវកាត​សិស្ស​តែ​ប៉ុណ្ណោះ ហើយ​ការធ្វើ​បែប​នេះ​ព្រោះ​ទ័ព ចង់​ឲ្យ​សិស្ស​សាលា ក៏ដូចជា​អ្នកទស្សនា​ផ្សេង​ទៀត បាន​ឃើញ​ពីការ​បំពាក់​ភ្លើង​នៅ​ស្តាតចាស់ ដែល​អាច​លេង​ពេល​យប់​បាន។

ដោយ​ឡែក ការ​ជួបគ្នា​រវាង​ក្រុម​បឹងកេត និង​ណាហ្គាវើល វា​ជាការ​ប្រកួត​ប្រជែង​គ្នា ដើម្បី​ដណ្តើម​យក​លេខ​រៀងទី ៣។ បើទោះ​បីជា​ពេល​នេះ បឹងកេត កំពុង​គ្រប់គ្រង​ទីតាំង​មួយនេះ ដោយ​មាន ១៤ ពិន្ទុ ប៉ុន្តែ​បឹងកេត នឹងធ្លាក់​ចេញពី​ទីតាំង​នេះ បើ​សិន​ពួកគេ​ចាញ់​ណាហ្គាវើល។ ផ្ទុយ​ទៅវិញ បើសិន​ជាក្រុម​ទាំង ២ ស្មើគ្នា គឺ​ទីតាំង​លេខ ៣ នេះ នៅតែ​មិន​ស្ថិតស្ថេរ ព្រោះ​ក្រុម​មាន ១១ ពិន្ទុ ភ្នំពេញក្រោន ក៏អាច​នឹង​យក​ឈ្នះ​ក្រុម​ឈរ​នៅ​លេខរៀង​ទី ៦ មាន ១០ ពិន្ទុ អគ្គិសនី​កម្ពុជា ដើម្បី​ឡើង​ទៅ​ឈរ​នៅ​លេខរៀង​ទី ៣ នៅ​សប្តាហ៍​ទី ៨ នេះ​បាន​ដែរ៕

កម្មវិធី​ប្រកួត​នៅ​ថ្ងៃ​សៅរ៍

-ស៊ីម៉ាក់ v វេ​ស្ទើ​ន ស្តា​ត​ចាស់ ម៉ោង ៣:០០
-ប៉ូលិស v អាស៊ី​អឺរ៉ុប ស្តា​ត​ចាស់ ម៉ោង ៦:០០
-ណាហ្គា​វើ​ល v បឹងកេត ពហុ​កីឡដ្ឋា​ន​ជាតិ ៦:០០

៣ ប្រកួត​នៅ​ថ្ងៃអាទិត្យ

-ភ្នំពេញ​ក្រោន v អគ្គិសនី​កម្ពុជា កីឡដ្ឋាន RSN ម៉ោង ៦:០០
-គិរីវង់​ v ​ខេមបូឌានថាយហ្គឺរ កីឡដ្ឋាន​គិរីវង់​សុខ​សែនជ័យ ៣:០០
-ទ័ព v ស្វាយរៀង ស្តាតចាស់ ម៉ោង ៦:០០

អត្ថបទគួរចាប់អារម្មណ៍

  • Qatar Airways នៅ​តែ​បន្ត​ពង្រីក​អាជីវកម្ម

    ក្រុងដូហាៈ ក្រុមហ៊ុន Qatar Airways នឹង​បន្ត​ពង្រីក​អាជីវកម្ម បើ​ទោះ​ជា​ក្រុមហ៊ុន​នេះ​ត្រៀម​ខ្លួន​ប្រកាស​ពី​ការខាតបង់​ប្រចាំ​ឆ្នាំ «​ដ៏ច្រើន​» ដោយសារ​ការហាមឃាត់​មិន​ឲ្យ​ប្រើប្រាស់​ដែនអាកាស​របស់​ប្រទេស​ជិត​ខាង​ក្តី​។ នេះ​បើ​យោង​តាម​នាយក​ប្រតិបត្តិ​របស់​ក្រុមហ៊ុន​អាកាសចរណ៍​មួយ​នេះ​កាលពី​ថ្ងៃ​ចន្ទ​។

  • អ្នកភូមិ​ចង់​បណ្តេញ​ជនបរទេស​ ១ ​គ្រួសារ​ដែល​កំពុង​រស់នៅ​ការពារ​ព្រៃ​អភិរក្ស

    ព្រះវិហារៈ គ្រួសារ​បរទេស​មួយ​ដែល​បាន​បង្កើត​គម្រោង​អភិរក្ស និង​តំបន់​អេកូ​ទេសចរណ៍​នៅ​ដែនជម្រក​សត្វព្រៃ​ភ្នំ​ត្នោត​កំពុង​តែ​ត្រូវ​អ្នកភូមិ​នាំ​គ្នា​ផ្តិត​មេដៃ បង្ខំ​ឲ្យ​ចាកចេញ​ដោយសារ​តែ​ទំនាស់​រឿង​ព្រៃឈើ និង​សត្វព្រៃ​នៅ​ក្នុង​តំបន់​អភិរក្ស​ដែល​កំពុង​ប្រឈម​នឹង​ការកាប់​ទន្ទ្រាន​យក​ដី​។

  • ចំណូល​អាជីវកម្ម​តន្ត្រី​ឌីជីថល​កើន​ខ្ពស់

    ក្រុងញូវយ៉កៈ អាជីវកម្ម​ផ្នែក​ឧស្សាហកម្ម​តន្រី្ដ​របស់​ពិភពលោក​បាន​កើនឡើង​ខ្ពស់​បំផុត​រហូត​ដល់​ ៨,១ ​ភាគរយ​កាលពី​ឆ្នាំ​ ២០១៧ ខណៈ​ការលក់​តាម​ឌីជីថល​លើក​ដំបូង​រក​បាន​ប្រាក់ចំណេញ​ភាគច្រើន​ដោយសារ​តែ​កំណើន​ការចាក់​ផ្សាយ​ចម្រៀង​។

  • ក្រុម G7 រក្សា​គោលជំហរ​រឹងមាំ​លើ​បញ្ហា​រុស្ស៊ី​និង​រក្សា​តុល្យភាព​ចំពោះ​កិច្ច​ព្រម​ព្រៀង​អ៊ីរ៉ង់

    ក្រុងតូរ៉ុនតូ: ក្រុម​រដ្ឋមន្ត្រី​ការបរទេស​មកពី​ក្រុម​ប្រទេស​មហាអំណាច​ឧស្សាហកម្ម​ទាំង ៧ ហៅ​កាត់ (G7) បាន​ប្តេជ្ញា​ការពារ «លទ្ធិ​ប្រជាធិប​តេយ្យ» របស់​ពួកគេ​ប្រឆាំង​ការ​វាយ​ប្រហារ​ពី​រុស្ស៊ី​របស់​លោក​វ្ល៉ាឌីមៀរ ពូទីន កាល​ពី​ថ្ងៃ​