.jpg)
ពិធីចុះហត្ថលេខានៃកិច្ចព្រមព្រៀងរបស់សមាគមកីឡាបាល់ទាត់កងយោធពលខេមរភូមិន្ទ និងទូរទស្សន៍ប៉ុស្តិ៍លេខ ៥។ រូប យឺត ពន្លក
ភ្នំពេញៈ ក្លិបបាល់ទាត់ក្រសួងការពារជាតិ (ទ័ព) បានប្តូរឈ្មោះទៅជាសមាគមកីឡាបាល់ទាត់យោធពលខេមរភូមិន្ទហៅកាត់ថា TIFFY Army FC ដែលដាក់ឲ្យនៅក្រោមមជ្ឈមណ្ឌលកីឡាកងយោធពលខេមរភូមិន្ទ ហើយក្លិបនេះបានបង្កើតគណៈកម្មការគ្រប់គ្រង និងទ្រទ្រង់មួយ ដែលមានថវិកាសម្រាប់ប្រតិបត្តិការចំនួន ៣០ ម៉ឺនដុល្លារក្នុង ១ ឆ្នាំក្នុងកិច្ចសន្យាជាផ្លូវការចំនួន ១០ ឆ្នាំ។
ការប្តូរឈ្មោះ និងការបង្កើតគណៈកម្មការគ្រប់គ្រង និងទ្រទ្រង់នេះគឺត្រូវបានប្រកាសជាផ្លូវការក្នុងសន្និសីទសារព័ត៌មាននៅសណ្ឋាការសូហ្វីតែលកាលពីល្ងាចថ្ងៃសុក្រ ហើយលោក ស៊ុប៉ាឆៃ វិរៈជុង អគ្គនាយកស្ថានីយទូរទេសប៉ុស្តិ៍លេខ ៥ ត្រូវបានតែងតាំងជាប្រធាន ចំណែកលោកឧត្តមសេនីយ៍ឯក តែម ម៉ឺន ប្រធានមជ្ឈមណ្ឌលកីឡាកងយោធពលខេមរភូមិន្ទជាអនុប្រធានលោក ខូវ ឆាយ ជាអគ្គលេខាធិការ និងលោក ទេព ឡុងរចនាជាគ្រូបង្វឹក។
លោកនាយឧត្តមសេនីយ៍ ឃឹម ប៊ុនសុង រដ្ឋលេខាធិការក្រសួងការពារជាតិ និងជាប្រធានក្រុមប្រឹក្សាកីឡាកងយោធពលខេមរភូមិន្ទបានថ្លែងថា៖ «ក្នុងកំណែទម្រង់កីឡាឆ្ពោះទៅស៊ីហ្គេម ឆ្នាំ ២០២៣ នៅកម្ពុជាគឺយើងស្វះស្វែងរកគោលដៅច្បាស់ ដើម្បីបង្កឲ្យកីឡាមានភាពរីកចម្រើនក្នុងនោះស្វែងរកការឧបត្ថម្ភដល់អត្តពលិក ព្រមទាំងស្វែងរកការឧបត្ថម្ភពីដៃគូវិស័យឯកជន ខណៈដែលក្របខ័ណ្ឌសម្រាប់កីឡាករត្រូវបានរៀបចំជូនទៅតាមសមត្ថភាព និងលទ្ធភាពយ៉ាងយកចិត្តទុកដាក់»។
លោកបញ្ជាក់ថា៖ «កីឡាគ្រប់ប្រភេទ (ចំនួន ១៥ ប្រភេទ) នៅសមាគមកីឡាក្រសួងការពារជាតិត្រូវសម្របសម្រួលមកជាកីឡាក្នុងកងយោធពលខេមរភូមិន្ទទាំងអស់ក្រោមការដឹកនាំគ្រប់គ្រងរបស់មជ្ឈមណ្ឌលកីឡាកងយោធពលខេមរភូមិន្ទតែមួយ ហើយការងារកីឡានេះជាជំនាញថ្មីរបស់ខ្ញុំ ប៉ុន្តែយើងមានឯកឧត្តម តែម ម៉ឺន ជាអ្នកមានបទពិសោធគ្រប់គ្រាន់ក្នុងការដឹកនាំគ្រប់គ្រង»។
ចំណែកលោក ស៊ុប៉ាឆៃ វិរៈជុង ជាប្រធានទ្រទ្រង់បានថ្លែថា៖ «ខ្ញុំមានទំនាក់ទំនងល្អជាមួយក្រសួងការពារជាតិ ពិសេសក្នុងកីឡាកងទ័ពតាំងពីឆ្នាំ ១៩៩៥។ នៅក្នុងការរីកចម្រើនរបស់វិស័យកីឡាផងនោះខ្ញុំបានចាប់អារម្មណ៍ខ្លាំងក្នុងបាល់ទាត់ ហើយសម្រេចចិត្តជួយឧបត្ថម្ភតែម្តងដោយមានកំណែទម្រង់ និងយកដៃគូដូចជាគ្រូបង្វឹក អ្នកជំនាញគ្រប់គ្រងដឹកនាំមកពីប្រទេសថៃខ្លះ និងឧបត្ថម្ភក្នុង ១ ឆ្នាំចំនួន ៣០ ម៉ឺនដុល្លារក្នុងរយៈពេល ១០ ឆ្នាំ ដែលជាជំហានដំបូង ហើយគោលដៅដែលខ្ញុំចង់បាន គឺចង់ឲ្យក្រុមបាល់ទាត់នេះឈានទៅដល់ចំណុចកំពូលមួយនៅក្នុងកម្រិត AFC»។
ជាមួយគ្នានេះលោក ខូវ ឆាយ ជាអគ្គលេខាធិការបាននិយាយថា៖ «តាមកិច្ចព្រមព្រៀងជួយឧបត្ថម្ភពីលោក ស៊ុប៉ាឆៃ វិរៈជុង ជាប្រធានទ្រទ្រង់ និងការប្តូរឈ្មោះថ្មីនេះ យើងទាំងអស់គ្នាប្តេជ្ញារៀបចំផែនការហ្វឹកហ្វឺន និងប្រកួតឲ្យទទួលលទ្ធផលល្អដោយក្នុងនោះយើងចង់ប្រជែងយកចំណាត់ថ្នាក់ល្អ ក្នុងប្រទេស និងឈានទៅលំដាប់ប្រកួតប្រជែងកម្រិតអន្តរជាតិ»។
លោកបន្តថា ក្រុមក្រសួងការពារជាតិធ្លាប់ផលិតធនធានមនុស្សបានច្រើន និងចេញទៅជម្រើសជាតិជាច្រើន ហើយបញ្ហាចាកចេញរបស់អត្តពលិកមួយចំនួនក៏គ្មានផលប៉ះពាល់ដល់ក្រុមនោះដែរ គឺយើងនឹងបំពេញបន្ថែមនូវអ្វីដែលខ្វះចន្លោះ។ ទោះជាយ៉ាងណាការចំណាយក្នុង ១ ឆ្នាំត្រឹម ៣០ ម៉ឺនដុល្លារ គឺមិនទាន់ឆ្លើយតបនោះទេ ប៉ុន្តែនេះជាមូលដ្ឋានគ្រឹះដែលយើងមានក្នុងដៃ ហើយយើងនៅតែបន្តសហការជាមួយដៃគូបន្ថែមទៀត ដើម្បីធ្វើឲ្យក្រុមរបស់យើងមានចំណាត់ថ្នាក់ជួរមុខ៕
