ភ្នំពេញៈ សហព័ន្ធកីឡាទ្រីយ៉ាត្លុងកម្ពុជាត្រៀមនឹងបញ្ជូនអត្តពលិកថ្នាលចំនួន ៦ នាក់ដើម្បីឲ្យចូលរួមព្រឹត្តិការណ៍ប្រកួតកីឡា Triathlon Asian Cup នៅប្រទេសថៃដែលនឹងត្រូវធ្វើចាប់ពីថ្ងៃទី ២៣ រហូតដល់ថៃទី ២៧ ខែមករា ឆ្នាំ ២០១៩ នេះ។
លោក ងិន សុបញ្ញា អគ្គលេខាធិការសហព័ន្ធកីឡាទ្រីយ៉ាត្លុងកម្ពុជាបានប្រាប់ភ្នំពេញប៉ុស្តិ៍ កាលពីម្សិលមិញថាសហព័ន្ធកីឡាទ្រីយ៉ាត្លុងកម្ពុជាបានទទួលការអញ្ជើញពីប្រទេសថៃឲ្យទៅចូលរួមការប្រកួត Triathlon Asian Cup ដោយភាគីថៃជាអ្នកជួយរ៉ាប់រងការហូបចុក ស្នាក់នៅ ចំណែកក្រសួងអប់រំ យុវជន និងកីឡារបស់យើងជួយប្រាក់ហោប៉ាវ និងបង្កលក្ខណៈច្បាប់ឲ្យទៅចូលរួម ហើយលោកប្រធានសហព័ន្ធជួយសោហ៊ុយធ្វើដំណើរ។
លោក ងិន សុបញ្ញា ដែលជាអនុប្រធាននាយកដ្ឋានរដ្ឋបាលនៃគណៈកម្មាធិការជាតិអូឡាំពិកកម្ពុជាផងនោះបានបន្ថែមថា៖ «យើងបញ្ជូនកីឡាករ កីឡាការិនីថ្នាលចំនួន ៦ នាក់ទៅចូលរួមការប្រកួត Triathlon Asian Cup នេះហើយពួកគេសុទ្ធតែជាប់ជាជម្រើសជាតិថ្នាលកន្លងមកអ៊ីចឹងតាមរយៈការប្រកួតនេះនឹងជួយផ្តល់ឱកាសឲ្យពួកគេបានពង្រឹងសមត្ថភាព និងដើម្បីវាស់ស្ទង់សមត្ថភាពក្នុងកម្រិតតំបន់ផងដែរ ព្រោះយើងប្រកួតតែក្នុងស្រុក យើងមិនអាចប្រៀបធៀបកម្រិតជាមួយប្រទេសគេបានទេ»។
តាមអគ្គលេខាធិការខាងលើដដែលនេះបានឲ្យដឹងដែរថា ការប្រកួត Triathlon Asian Cup លើកនេះប្រទេសចូលរួមចំនួន ១៥ ប្រទេសហើយអត្តពលិកទាំង ៦ នាក់ដែលកម្ពុជាគ្រោងបញ្ជូនឲ្យទៅចូលរួមការប្រកួតនេះមានកីឡាការិនី អ៊ួន ចាន់ភក្ត្រា, ហ៊ោ ធីតា, ផល ស្រីភួង កីឡាករ សុខ សំណាង,ណាង ណៃ និង ចេង សុវណ្ណបញ្ញាសិដ្ឋ។
បន្ថែមលើនេះគ្រូបង្វឹក ២ នាក់គឺលោកស្រី សូរ៉ាន់ ដេត និងលោក ចេង ចាន់ដារ៉ា ក៏នឹងត្រូវចូលរួមការប្រកួត Triathlon Asian Cup នេះផងដែរ ហើយលោកស្រី ម៉ក់ វណ្ណស៊ីថា ជាតំណាងរាស្ត្រមណ្ឌលភ្នំពេញ និងជាអនុប្រធានសហព័ន្ធកីឡាទ្រីយ៉ាត្លុងកម្ពុជា គឺជាប្រធានប្រតិភូដឹកនាំក្រុមទ្រីយ៉ាត្លង់កម្ពុជា ចូលរួមការប្រកួតនេះ។
យ៉ាងណាក៏ដោយនៅពេលសួរពីក្តីសង្ឃឹមនៃការប្រជែងរកមេដាយពីការប្រកួត Triathlon Asian Cup នេះគឺលោក ងិន សុបញ្ញា ហាក់មានភាពស្ទាក់ស្ទើរ។ លោកបាននិយាយថា៖ «យើងមិនអាចវាយតម្លៃទុកមុនបានទេ ប៉ុន្តែសមត្ថភាពរបស់អត្តពលិកកម្ពុជាយើងក៏មិនស្ថិតនៅបាតតារាងក្រោមប្រទេសគេដែរគឺនៅក្នុងកម្រិតពាក់កណ្តាល»៕