ភ្នំពេញ៖ គ្រូបង្វឹកវ័យក្មេងធ្លាប់មានបទពិសោធចេញពីកីឡាករឆ្នើម ១ រូប គឺ លោក ធន់ សុភា ដែលបច្ចុប្បន្នជាគ្រូបង្វឹកនៅសមាគមកីឡាប្រដាល់កងយោធពលខេមរភូមិន្ទ និងគ្រូបង្វឹកមានជំនាញច្រើនប្រភេទកីឡា ស៊ន អេលីត សុទ្ធតែសង្ឃឹមថា សិស្សរបស់ខ្លួន ធន់ ចាន់តាក់ និង សុខ សាវិន អាចមានលទ្ធភាពឈ្នះប្រាក់លាន នៅក្នុងការប្រកួតម៉ារ៉ាតុងដណ្តើមប្រាក់លាន ទម្ងន់ ៦៣,៥ គីឡូក្រាម នៅលើសង្វៀនថោន ថ្ងៃអាទិត្យនេះ។
ការដាក់ក្តីសង្ឃឹមទៅលើកូនសិស្សរៀងៗខ្លួនបែបនេះ ក៏ព្រោះតែលោក ធន់ សុភា និងលោក អេលីត ចំរើន មានការជឿជាក់ទៅលើសមត្ថភាពរបស់ ធន់ ចាន់តាក់ និង សុខ សាវិន ដែលមានកម្រិតខ្ពស់ជាងបេក្ខភាព ២ នាក់ទៀតគឺ ផាន រះ និង កូយ ឡាយ ប៉ុន្តែដោយសារការប្រកួតនេះ តម្រូវឲ្យអ្នកទាំង ៤ ចាប់ឆ្នោតមុនការប្រកួត ហេតុនេះ ធន់ ចាន់តាក់ ក៏អាចជួប សុខ សាវិន នៅវគ្គជម្រុះ ដែលមាន ៣ ទឹកផងដែរ។
បើអ្នកទាំង ២ នេះ ពិតជាជួបគ្នាមែន អ៊ីចឹងរវាង ចាន់តាក់ និង សាវិន នឹងមានតែម្នាក់ប៉ុណ្ណោះ ត្រូវឡើងទៅផ្តាច់ព្រ័ត្រដណ្តើមប្រាក់លាន ដែលអាចជួប ផាន់ រះ ឬ កូយ ឡាយ ខណៈវគ្គផ្តាច់ព្រ័ត្រនេះ គឺអ្នកផ្តួលគូប្រកួតឲ្យសន្លប់ក្នុងការប្រកួត ៩ នាទីពេញ ទើបអាចក្លាយជាម្ចាស់ប្រាក់លាន តែបើស្មើគ្នា (គ្មានអ្នកសន្លប់) គឺត្រូវចែកប្រាក់រង្វាន់ជាង ២ ផ្នែកស្មើគ្នា។
យ៉ាងណាក៏ដោយ លោក ធន់ សុភា ជាគ្រូបង្វឹក ធន់ ចាន់តាក់ បានប្រាប់ភ្នំពេញប៉ុស្តិ៍ថា៖ «នៅក្នុងចំណោមបេក្ខភាព ៣ នាក់នោះ ធន់ ចាន់តាក់ ចាប់ឆ្នោតប៉ះអ្នកណា ក៏ការប្រកួតមានភាពតានតឹង និងលំបាកដែរ ប៉ុន្តែខ្ញុំគិតថា លទ្ធផល គឺកូនសិស្សខ្ញុំ អាចមានប្រៀបឈ្នះខ្ពស់ ព្រោះថា ខ្ញុំបានថែទាំសុខភាព និងបង្វឹកគេបានពេញលេញជាង ១ ខែមកហើយ ដើម្បីត្រៀមក្នុងព្រឹត្តិការណ៍នៅសង្វៀនថោននេះ»។
អតីតកីឡាករជើងខ្លាំងរូបនេះ បានបន្តថា៖ «ខ្ញុំហ៊ាននិយាយថា ធន់ ចាន់តាក់ មានលទ្ធភាពនឹងយកឈ្នះនៅវគ្គផ្តាច់ព្រ័ត្រ ក្នុងក្តីសង្ឃឹម ៨០ ភាគរយ ព្រោះខ្ញុំបានបង្វឹកផ្ទាល់ដៃ គ្រប់គ្រងការហូបចុកស្នាក់នៅរបស់គេផ្ទាល់ និងមានពេលវេលាសម្រាក ដើម្បីសុខភាពផងដែរ»។
លោក ធន់ សុភា បានបន្ថែមថា៖ «ខ្ញុំមិនអាចនិយាយពីបច្ចេកទេស ឬល្បិចក្នុងពេលប្រកួតឲ្យអស់ទេ ព្រោះយើងសិក្សាពីចំណុចខ្សោយគ្នាទៅវិញទៅមក។ ជាមួយគ្នានោះ ល្បិច ឬយុទ្ធសាស្ត្រប្រកួតនឹងត្រូវផ្លាស់ប្តូរ ពេលប្រកួតជាក់ស្តែងនៅលើសង្វៀន ប៉ុន្តែបើ ចាន់តាក់ ប៉ះជាមួយ សុខ សាវិន ខ្ញុំគិតថា វាកាន់តែលំបាកជាងប៉ះជាមួយ កូយ ឡាយ ឬ ផាន រះ ទៀត»។
ចំណែក ធន់ ចាន់តាក់ ដែលធ្លាប់ឈ្នះខ្សែក្រវាត់ស្រាបៀរលីអូ ទម្ងន់ ៦០ គីឡូក្រាម និងខ្សែក្រវាត់ស្រាបៀរកម្ពុជាក្នុងទម្ងន់ ៦៣,៥ គីឡូក្រាម ព្រមទាំងមានប្រវត្តិប្រកួតល្អ គឺចាញ់ត្រឹម ៥ លើក ក្នុងការប្រកួតសរុប ៨១ ដងនោះ បាននិយាយយ៉ាងខ្លីថា៖ «ខ្ញុំសង្ឃឹមឈ្នះ ៨០ ភាគរយដូចលោកគ្រូដែរ»។
ដោយឡែកឯ លោក ស៊ន អេលីត គ្រូបង្វឹក សុខ សាវិន បាននិយាយថា៖ «បើគិតពីសមត្ថភាព ខ្ញុំមើលឃើញថា សុខ សាវិន មានក្បាច់គុនល្អជាងគេ ប៉ុន្តែលទ្ធផលប្រកួតលើរេញ មិនអាចទស្សន៍ទាយបានមុនទេ។ កន្លងមកឱកាសឈ្នះក្នុងវគ្គផ្តាច់ព្រ័ត្ររបស់ សាវិន មិនតិចជាង ៤ លើកទេ ប៉ុន្តែត្រូវជួបឧបសគ្គជានិច្ច អ៊ីចឹងខ្ញុំមិនចង់និយាយកុំឲ្យប៉ះពាល់គេ គ្រាន់តែថា យើងអត់មានខ្សែធំដូចគេ»។
បងប្រុសរបស់វីរកីឡាការិនី ស៊ន សៀវម៉ី រូបនេះ បន្ថែមថា៖ «សាវិន ហាត់ជាប្រចាំជាមួយខ្ញុំ ហើយក្នុងចំណោមកីឡាករ ៣ នាក់នោះ បើប៉ះ ធន់ ចាន់តាក់ គឺលំបាកឈ្នះដូចគ្នា ព្រោះខ្លាំងប៉ះខ្លាំង បច្ចេកទេសល្អដូចគ្នា អ៊ីចឹងលទ្ធផលពិតអាស្រ័យពេលប្រកួតតែម្តង»។ ជាមួយគ្នានេះសមត្ថភាពរបស់ កូយ ឡាយ និង ផាន រះ មិនត្រូវបានគ្រូបង្វឹកវ័យក្មេងទាំង ២ គឺ លោក ធន់ សុភា និង ស៊ន អេលីត ព្រួយបារម្ភថា ជាឧបសគ្គនោះឡើយ៕