ភ្នំពេញ៖ ការប្រកួតដណ្តើមប្រាក់លានរវាងជើងខ្លាំងវ័យក្មេងចំនួន ៤ នាក់ នៅសង្វៀនថោន កាលពីយប់ថ្ងៃអាទិត្យ គឺត្រូវបានទៅលើ ធន់ ផានិត មកពីសមាគមកីឡាប្រដាល់កងយោធពលខេមរភូមិន្ទបន្ទាប់ពីរូបគេបានផ្តួល ពេជ្រ កក្កដា ឱ្យសន្លប់ នៅទឹកទី១ ក្នុងវគ្គជុំដំបូង ហើយបានបន្តទៅផ្តួល អេលីត សេងហួរ ក្នុងទឹកទី២ នៅវគ្គជុំផ្តាច់ព្រ័ត្រ ដើម្បីឈានទៅឈ្នះបានប្រាក់រង្វាន់ចំនួន ៣,៤ លានសែនរៀល។
ការឈ្នះប្រាក់លានរបស់ ធន់ ផានិត ដូចជាស័ក្តិសមទៅនឹងការអះអាងពីការតាំងចិត្តមុនពេលប្រកួតថា មានទំនុកចិត្តឈ្នះដល់ទៅ ៨០ ភាគរយ ហើយទីបំផុត ផានិត ធ្វើបានល្អដូចក្តីរំពឹងទុក ចំណែកលោក ជួប វុត្ថា បានសរសើរថា៖ «សមត្ថភាពរបស់ ធន់ ផានិត ល្អណាស់ស័ក្តិសមនឹងទទួលបានប្រាក់រង្វាន់ ហើយ អេលីត សេងហួរ និង ពេជ្រ កក្កដា ពិតជាមានសមត្ថភាពល្អ បន្តបន្ទាប់គ្នា និងមានសមត្ថភាពខ្លាំងដូចគ្នា ហេតុនេះពេលអនាគតពួកគាត់នេះ គឺជាទំពាំងស្នងផ្នែកកីឡាគុនខ្មែរយើងយ៉ាងល្អណាស់»។
ផលិតករ និងជាអ្នកមានទស្សនវិស័យជួយផ្តល់ឱកាសឱ្យកីឡាករឆ្នើមវ័យក្មេងបានប្រកួត លោក ជួប វុត្ថា បន្តថា៖ «កម្មវិធីប្រកួតដែលយើងងាកមករៀបចំជូនសម្រាប់កីឡាករវ័យក្មេង គឺទទួលបានការគាំទ្រច្រើនពីមហាជន ព្រោះរបៀប ឬបច្ចេកទេសចូលវាយសម្រុកត្រូវបានគេកោតសរសើរថា ល្អ វ៉ៃអស់ពីសមត្ថភាព ជក់ចិត្ត ដិតអារម្មណ៍ ពិសេសខាងអ្នកឧបត្ថម្ភកម្មវិធីពេញចិត្តផងដែរ»។
លោក ជួប វុត្ថា បានទម្លាយនូវភាពមន្ទិលចំពោះកីឡាករឆ្នើមចាស់ៗមួយចំនួនថា លំបាកផ្គូផ្គង ដោយវាជាប់នូវចំណុចជាច្រើនទី១ សង្វៀនជាច្រើនទៀត គេកក់ទុកសម្រាប់ប្រកួតរៀងៗខ្លួន ទី២ តម្លៃខ្លួនប្រកួតសុំឡើងថ្លៃជានិច្ច គឺច្រើនជាងគម្រោង ទី៣ ការប្រកួតវ៉ៃមិនអស់ពីសមត្ថភាព ដោយភាគច្រើនស្គាល់គ្នាជាមិត្តភក្តិជាដើម។ បញ្ហាទាំងនេះ ធ្វើឱ្យមហាជន ឬខាងអ្នកស្ពនស័រលំបាកទុកចិត្ត ព្រោះប្រកួតមិនសូវទាក់ ប៉ុន្តែពួកគាត់ពេញនិយមសម្រាប់ប្រកួតជាមួយកីឡាករបរទេសទៅវិញ។
កីឡាករ ធន់ ផានិត និយាយក្រោយប្រកួតថា៖ «ខ្ញុំបានមកចូលរួមប្រកួតនៅសង្វៀននេះ ២ លើកហើយ កាលលើកទី១ បានត្រឹមជើងឯករង តែពេលនេះខ្ញុំឈ្នះទទួលបានប្រាក់រង្វាន់ធំ គឺកិត្តិយសធំណាស់ ប៉ុន្តែមិនអាចថា ដៃគូដែលចាញ់ខ្ញុំនោះខ្សោយបានទេ ព្រោះខ្ញុំក៏ត្រូវរបស់គេច្រើនដែរ មុននឹងផ្តួលគេបាន។
ចំណែកលោក ធន់ សុភា ជាគ្រូបង្វឹកប្រាប់ថា៖ «អនាគត ធន់ ផានិត គឺជាជើងខ្លាំង ១ រូប ហើយជំនាញប្រកួតរបស់គេល្អគ្រប់ផ្នែក មានទាំងជង្គង់ កែង កណ្តាប់ដៃ និងទាត់ឆ្ងាយ។ នៅក្នុងកំណត់ត្រាប្រកួតរបស់ ផានិត គឺបាន ១៥ ដង ឈ្នះ ១៤ ចាញ់តែម្តងគត់ និងមានចិត្តក្លាហានណាស់ អ៊ីចឹងហើយសម្រាប់ការឈានទៅដណ្តើមជាបេក្ខភាពក្រុមជម្រើសជាតិ គឺជាក្តីសង្ឃឹមសម្រាប់ឆ្នាំក្រោយៗ ព្រោះ ផានិត ល្អទាំងកម្ពស់ គឺ ១,៧១ ម៉ែត្រ និងបច្ចេកទេស»។
លោក ហាក់ សុខហេង នាយកគ្រប់គ្រងការផ្សាយនៃសង្វៀនថោនបានប្រាប់ថា៖ «ការរៀបចំប្រកួតប្រចាំសប្តាហ៍នៅសង្វៀនថោន គឺពេញនិយមខ្លាំង ពិសេសកីឡាករវ័យក្មេងឆ្នើមល្អៗ ដោយប្រកួតទាក់ទាញ ប៉ុន្តែយើងក៏មិនបោះបង់កីឡាករឆ្នើមជើងចាស់នោះដែរ»៕