ភ្នំពេញៈ ការប្រកួតជម្រុះសន្សំពិន្ទុ លើកទី ១ នៃការប្រកួតដណ្តើមខ្សែក្រវាត់ខារ៉ាបាវ រដូវកាលទី ៦ នៅលើសង្វៀនអាស៊ីអាគ្នេយ៍ កាលពីល្ងាចថ្ងៃសៅរ៍ ទទួលបានលទ្ធផលគួរឲ្យកត់សម្គាល់ព្រោះការប្រកួតសុទ្ធតែស្វិតស្វាញ និងជក់ចិត្ត ដោយក្នុងនោះ ឈុត សេរីវ៉ាន់ថន បានឈ្នះថៃ Phach Yaksuo ដោយពិន្ទុ ជាឯកច្ឆន្ទ ប៉ុន្តែ ធន់ មករា បានចាញ់ Theap Kao ទាំងប្រផិតប្រផើយបំផុត។
តាមការទស្សនាផ្ទាល់ ឃើញថា កីឡាករ ធន មករា មានស្នៀតប្រកួតល្អ និងមានប្រៀបលើកីឡាករថៃបន្តិចបន្តួចចំនួន ៣ ទឹកមុន ប៉ុន្តែនៅ ២ ទឹកចុងក្រោយ ធន់ មករា មានសភាពទន់ជ្រាយថមថយកម្លាំងជាងកីឡាករ Theap Kao ផង និងបានដួលញឹកញាប់ផង ជាហេតុនាំឲ្យចៅក្រមចំនួន ៤ នាក់ កាត់ឲ្យចាញ់ពិន្ទុថៃម្នាក់នេះ ៤-១។
អ្នកតាមដានទស្សនាផ្ទាល់មួយចំនួន នៅជិតសង្វៀន ហាក់បីដូចមិនសាទរចំពោះលទ្ធផល ដែលចៅក្រមកាត់ឲ្យ ធន់ មករា ចាញ់នោះឡើយ ដោយមានអ្នកខ្លះពោលពាក្យចំអកឲ្យចៅក្រមថា «កីឡាករខ្មែរមានប្រៀបខ្លះដែរ មិនគួរឲ្យចាញ់ថៃនោះឡើយ ប៉ុន្តែចៅក្រមនៅសង្វៀនមួយនេះភាគច្រើន គឺនិយមកាន់ជើងកីឡាករថៃជាងខ្មែរ»។
ផ្ទុយពីនេះ កីឡាករ ឈុត សេរីវ៉ាន់ថន មានប្រៀបឈ្នះកីឡាករថៃ Phach Yaksuo សឹងតែគ្រប់ទឹក។ ការប្រកួត៣ទឹកដំបូង សេរីវ៉ាន់ថន ធ្វើបានល្អ ទាំងក្បាច់ទាត់ ជង្គង់ និងកណ្តាប់ដៃ ប៉ុន្តែកីឡាករថៃរូបនេះ ហាក់បីដូចនៅតែទ្រាំទ្រ និងបន្តការតស៊ូប្រកួតបាន និងបានវាយជង្គង់តបតវិញនៅទឹកទី៤ និងទី៥ល្អណាស់ដែរ ខណៈដែល សេរីវ៉ាន់ថន ចេញកម្លាំងសឹងតែអស់ថាមពលនោះ។
នៅចុងបញ្ជប់ គណៈកម្មការវិនិច្ឆ័យ បានប្រកាសជាផ្លូវការឲ្យ ឈុត សេរីវ៉ាន់ថន ឈ្នះ ថៃ Phach Yaksuo ជាឯកច្ឆន្ទ គឺ៥ទល់០។ លទ្ធផលនេះ បានជួយឲ្យ សេរីវ៉ាន់ថន មាន៣ពិន្ទុស្មើជាមួយមិត្តរួមជាតិ យុគ យក្សផ្លែ និង ឡុង ជិន ដែលបានយកឈ្នះកីឡាករថៃ កាលពីសប្តាហ៍មុន។
លោក ញាន សុធី នាយកគ្រប់គ្រងកម្មវិធីប្រដាល់ប្រចាំសង្វៀន SEATV និយាយថា៖ «កម្រិតបេក្ខភាពអ្នកប្រដាល់ទម្ងន់ស្រាលៗដូចជា៥៧គីឡូក្រាមនេះ គឺការប្រកួតទាក់ទាញខ្លាំងនិងមានមហាជនគាំទ្រច្រើនជាងកីឡាករប្រភេទទម្ងន់ធ្ងន់ៗមួយចំនួន មានជំងឺតួឯកឡើង ប្រកួតមិនសូវវ៉ៃគ្នា មិនសូវល្អមើលទេ»។
លោកបន្តថា៖«តាមទស្សនៈ និងចក្ខុវិស័យនៃការរៀបចំរបស់ខ្ញុំ គឺកំពុងតែផ្តោតអារម្មណ៍ និងយកចិត្តទុកដាក់ផ្តល់ឱកាសឲ្យកីឡាករល្អៗវ័យក្មេង មានសមត្ថភាពឡើងប្រកួតខ្សែក្រវាត់ ឬជាលក្ខណៈអន្តរជាតិឲ្យបានច្រើន ដើម្បីរកឲ្យឃើញអ្នកមានសមត្ថភាពខ្លាំង ពិតប្រាកដដោយមិននិយមបក្ខពួក ឬរើសអើង ក្លិបនេះ ឬក្លិបនោះទេ»៕