ភ្នំពេញៈ អតីតកីឡាករជើងខ្លាំង ធន់ សុធា បានចាត់ទុកការសម្រេចឲ្យ ម៉ន ភារម្យ ឈ្នះពិន្ទុលើកូនសិស្សរបស់ខ្លួន ប៊ុន សុធា សម្រាប់ការប្រកួតជម្រុះវគ្គ ៣២ នាក់ដណ្តើមពាន TV5 Boxing Knock-Out Serie (K-cement) រដូវកាលថ្មី ទម្ងន់ ៥៤ គីឡូក្រាមនៅលើសង្វៀនប៉ុស្តិ៍លេខ ៥ កាលពីថ្ងៃសៅរ៍ ថាជារឿងអយុត្តិធម៌ និងមិនសមហេតុផលទាល់តែសោះ។ លោក ធន់ សុភា ដែលជាអាជ្ញាកណ្តាល និងចៅក្រមរបស់សហព័ន្ធកីឡាប្រដាល់គុនខ្មែរ ១ រូបដែរនោះ បានប្រាប់ភ្នំពេញ ប៉ុស្តិ៍ កាលពីម្សិលមិញថា៖ «ខ្ញុំមិនពេញចិត្តទៅលើលទ្ធផលនេះទេ ហើយខ្ញុំក៏មិនយល់ពីការកាត់សេចក្តីនេះដែរ ថាហេតុអ្វីទើបចៅក្រមសម្រេចឲ្យ ម៉ន ភារម្យ ជាអ្នកឈ្នះទៅវិញ?»។
នៅក្រោយការប្រកួតយ៉ាងស្វិតស្វាញត្រឹមរយៈពេល ៣ ទឹកនោះ ចៅក្រមទាំង ៥ រូបបានសម្រេចផ្តល់ពិន្ទុឲ្យ ម៉ន ភារម្យ ឈ្នះ ប៊ុន សុធា ជាឯកច្ឆន្ទ ៥-០ តែម្តង។ ការសម្រេចនេះបានធ្វើឲ្យលោក ធន់ សុភា ហួសចិត្តនឹងថ្លែងព្រោះលោកបានមើលឃើញថា កូនសិស្សរបស់លោកគឺប៊ុន សុធា ចាញ់តែទឹកទី ១ បន្តិចប៉ុណ្ណោះ ចំណែក ២ ទឹកចុងក្រោយ សុធា បានយកប្រៀបវិញដាច់ បើទោះបីជាការប្រកួតនេះលោកឃើញអាជ្ញាកណ្តាលបានព្យាយាមជួយដល់ ម៉ន ភារម្យ ពីការតាមបុកជង្គង់របស់ ប៊ុន សុធា ក៏ដោយ។
គ្រូបង្វឹករបស់សមាគមកីឡាប្រដាល់ក្រសួងការពារជាតិ ធន់ សុភា បានបញ្ជាក់ថា៖ «ខ្ញុំខ្ជិលនឹងតវ៉ាចំពោះការសម្រេចឲ្យ ប៊ុន សុធា ចាញ់នេះព្រោះបើយើងតវ៉ា ក៏គេមិនអាចកែប្រែលទ្ធផលដែលបានប្រកាសទៅហើយនោះដែរ។ ម្យ៉ាងទៀតយើងត្រូវខាតលុយក្នុងការប្តឹងតវ៉ានេះទៀត ប៉ុន្តែខ្ញុំនៅតែមិនអស់ចិត្ត ថាហេតុអ្វីបានជាគេមិនឲ្យកីឡាករដែលមានសមត្ថភាព និងប្រកួតឈ្នះពិតប្រាកដឡើងទៅវគ្គបន្តដោយបែរជាឲ្យកីឡាករវ៉ៃបែរគូទ បែបជាអ្នកប្រដាល់គ្មានសមត្ថភាពដូច ម៉ន ភារម្យ ជាអ្នកឡើងទៅវិញ?»។
ចំណែកកីឡាករ ប៊ុន សុធា ក៏បានសម្តែងការមិនពេញចិត្តចំពោះការសម្រេចឲ្យរូបគេចាញ់ពិន្ទុកីឡាករ ម៉ន ភារម្យ នៅក្នុងការប្រកួតនេះផងដែរព្រោះលទ្ធផលនេះបានធ្វើឲ្យរូបគេធ្លាក់ចេញពីការប្រកួតពានមួយនេះត្រឹមវគ្គជម្រុះ ៣២ នាក់ដំបូងតែម្តង។ ចំណែកកីឡាករ រិទ្ធ ប្រាក់ប៊ិន ក៏បានខ្ទាតចេញពីការប្រកួតនេះផងដែរ ខណៈរូបគេបានចាញ់ពិន្ទុអ្នកលេងកណ្តាប់ដៃវ័យក្មេង ចាន់ សាន់ កាលពីថ្ងៃសៅរ៍នោះដែរ។
គួរបញ្ជាក់ថាការប្រកួតពាន TV5 Boxing Knock Out Serie រដូវកាលថ្មីក្នុងទម្ងន់ ៥៤ គីឡូក្រាមនេះបានសម្រិតសម្រាំងកីឡាករ ៣២ នាក់រួចជាស្រេច ដើម្បីធ្វើការប្រកួតជម្រុះតាមរូបមន្តចាញ់ធ្លាក់ៗ រកអ្នកឈ្នះឡើងទៅប្រកួតបន្តនៅវគ្គ ១៦ នាក់ចុងក្រោយ និងបន្តរហូតដល់វគ្គផ្តាច់ព្រ័ត្រដោយគ្រោងចំណាយពេល ១៩ សប្តាហ៍ហើយអ្នកឈ្នះពានជើងឯកនឹងទទួលបាន ៤០០០ ដុល្លារ ឯលេខ ២ បាន ២០០០ ដុល្លារ លេខ ៣ បាន ៧៥០ ដុល្លារ និងអ្នកលេខ ៤ នឹងបានប្រាក់ ៥០០ ដុល្លារ៕