ភ្នំពេញ: ធន មករា សមាគមប្រដាល់ក្រសួងការពារជាតិត្រូវជួបជាមួយកីឡាករប្រដាល់ជើងចាស់ យុគ យក្សផ្លែ ក្លិបបូរីរាជសីហ៍មានរិទ្ធ ក្នុងការប្រកួតវគ្គពាក់កណ្ដាលផ្ដាច់ព្រ័ត្រចំនួន ២ គូនៃសង្វៀនទូរទស្សន៍ ប៉ុស្តិ៍ លេខ ៥ ខណៈកីឡាករខ្លាំងជើងថ្មី លន បញ្ញា និងសង គង់ ក៏ត្រូវប៉ះប្រកួតគ្នាផងដែរ ដើម្បីដណ្តើមយកកៅអីវគ្គផ្តាច់ព្រ័ត្រនៃព្រឹត្តិការណ៍ TV5 Boxing Knock-Out Series by KCement នឹងចាប់ផ្ដើម នៅយប់ថ្ងៃទី ១២ ខែឧសភា ឆ្នាំ ២០១៨ នេះ។ ពួកគេទាំង ២ គូនេះសុទ្ធតែមិនទាន់ស្គាល់ចាញ់សោះនៅក្នុងព្រឹត្តិការណ៍នេះកន្លងមក។
កីឡាករធន មករា នៅជុំទី ១ បានផ្ដួលកីឡាករប្រដាល់ លាប សំណាង ក្លិបកងពលតូចលេខ ៧០ នៅទឹកទី ២ នៅជុំទី ២ ដោយរូបគេបានយកឈ្នះ លិញ ភារម្យ ក្លិបភារម្យគុនខ្មែរដោយពិន្ទុ និងជុំទី ៣ ឈ្នះ ម៉ន រដ្ឋា ក្លិបការិយាល័យទី ៥ កងទ័ពជើងគោក ដែលជាកំពូលកីឡាករខ្លាំងជំនាន់ក្រោយក្នុងទម្ងន់ ៥៧ គីឡូក្រាម នៅទឹកទី ២។
ចំពោះ យក្សផ្លែ នៅជុំទី ១ រូបគេបានយកឈ្នះ កំពែង ខ្មៅ សមាគមប្រដាល់ក្រសួងកសិកម្មទឹកទី ២ ជុំទី ២ ឈ្នះនឹន ក្លិបកងទ័ពឆត្រយោង ៩១១ ដោយពិន្ទុ និងជុំទី ៣ ឈ្នះជើងខ្លាំង បឺត សង្ឃឹម ក្លិបរ៉ាហាប់ស្វាយប៉ាក ដែលជាកីឡាករជើងចាស់ កំណាចមួយរួបចិត្តធំ មុនស្នូរជួងបញ្ចប់ទឹកទី ៣។ ការជួបគ្នារវាងអ្នកទាំង ២ ត្រូវបានគេរំពឹងថា ធន មករា មានប្រៀបជាងកម្លាំងល្អជាង ក្មេងជាង និងកំពុងឡើងកូដផងដែរ។
ជាមួយគ្នានេះលោកធន សុភា គ្រូបង្វឹក បានអះអាងថា កូនសិស្សរបស់លោកនឹងឈ្នះទៅកាន់វគ្គផ្តាច់ព្រ័ត្រ។
កីឡាករសង គង់ កាលនៅជុំទី ១ ប្រកួតឈ្នះ គួន ប៊ុនហ៊ីម ក្លិបពន្លឺសាមគ្គីខេត្តបាត់ដំបងដោយពិន្ទុ។ នៅជុំទី ២ រូបគេប្រកួតឈ្នះ ផាន់ ពិសិដ្ឋ ក្លិបពុទ្ធសេរីវង្សដោយពិន្ទុ និងជុំទី ៣ ប្រកួតឈ្នះ រឿន ឈី ក្លិបស្វាយរលំឫទ្ធិជ័យដោយពិន្ទុដែរ។
ចំណែកដៃគូគឺកីឡាករ លន បញ្ញា វិញនៅជុំទី ១ រូបគេបានផ្ដួលកីឡាករប្រដាល់ឈាន រស្មី ក្លិបខេត្តរតនគិរី ឲ្យសន្លប់នៅទឹកទី ២ ហើយនៅជុំទី ២ ប្រកួតឈ្នះ ផាន ផាត់យុទ្ធ ក្លិបសាលវ័ន្ដកីឡា ដោយពិន្ទុ និងជុំទី ៣ ផ្ដួលអ្នកប្រដាល់លាប រដ្ឋា ក្លិបដីឡូត៍មានរិទ្ធ ឲ្យសន្លប់នៅទឹកទី ២។ តាមប្រភពពីអ្នកតាមដានពីសមត្ថភាពកីឡាករទាំងពីរគូនេះ ការប្រកួតរបស់ពួកគេ ដែលមានតែចំនួន ៣ ទឹកនោះ ពិតជាស្រួចស្រាវ និងល្អមើលបំផុតពីព្រោះ ៣ ប្រកួតដូចគ្នាកន្លងមក ភាគច្រើនសុទ្ធតែផ្តួលដៃគូឲ្យសន្លប់។
ទោះជាយ៉ាងណា តាមរយៈក្រុមអ្នកនិយមទស្សនាតាមតូបកាហ្វេដែលមានហាងឆេងភ្នាល់លុយផងនោះ បានធ្លាយព័ត៌មានបណ្តើរៗថា សម្រាប់កីឡាករដែលឈ្នះទទួលបានកៅអីផ្តាច់ព្រ័ត្រដើម្បីដណ្តើមប្រាក់ចំនួន ៤០០០ ដុល្លារអាមេរិកនោះ ជើងថ្មីធន មករា នឹងឈ្នះជើងចាស់ យក្សផ្លែ ហើយលន បញ្ញា នឹងឈ្នះសង គង់ ដើម្បីកក់កៅអីវគ្គផ្តាច់ព្រ័ត្រ៕