ភ្នំពេញៈ កីឡាករកម្ពុជា ធី តុងហ៊ី និង នន់ ជំនិត សុទ្ធតែបានចាញ់បរទេសក្នុងការប្រកួតជម្រុះព្រឹត្តិការណ៍ Boostrong Gold Medal Fighter on Fire នៅសង្វៀន SEATV កាលពីថ្ងៃអាទិត្យដោយក្នុងនោះ ធី តុងហ៊ី មកពីក្លិបក្រុងប៉ោយប៉ែតចាញ់ពិន្ទុអូស្ត្រាលី Darin Chen ហើយ នន់ ជំនិត របស់ក្លិបស្វាយរលំឬទ្ធិជ័យបានចាញ់ក្រោយស្នាដៃថៃ Phat Namneung បន្ទាប់ពីប្រកួតចំនួន ៥ ទឹកពេញ។
ប៉ុន្តែជាមួយលទ្ធផលចាញ់ដូចគ្នានេះពួកគេមានវាសនាខុសគ្នា គឺ ធី តុងហ៊ី បានធ្លាក់ចេញពីព្រឹត្តិការណ៍នេះហើយ ប៉ុន្តែ នន់ ជំនិត ត្រូវបានគណៈកម្មការរៀបចំប្រកួតផ្តល់ឱកាសឲ្យបានឡើងទៅប្រកួតនៅជុំទី ២ ដោយសារតែកីឡាករថៃ Phat Namneung រក្សាទម្ងន់មិនបានតាមការកំណត់ត្រូវបានគណៈកម្មការសម្រេចពិន័យឲ្យចាញ់ជាស្វ័យប្រវត្តិតាំងពីមុនការប្រកួតម្ល៉េះ។
កីឡាករ ធី តុងហ៊ី ដែលបានអះអាងពីការត្រៀមខ្លួនឡើងប្រកួតបានល្អនោះ គឺការប្រកួតជាក់ស្តែងបានបរាជ័យគួរឲ្យអស់សំណើច ព្រោះស្នៀតប្រកួតរបស់គេ មហាអន់ មិនព្រមវាយដៃគូមុននោះឡើយ ហើយក្នុងចំណោមចៅក្រមទាំង ៥ បានផ្តល់ពិន្ទុឲ្យ ធី តុងហ៊ី ចាញ់ Darin Chen ដោយឯកច្ឆន្ទ ៥-០ គឺ តុងហ៊ី ហាក់ដូចជាកាន់តែខ្សោយ និងធ្លាក់អស់ប្រិយភាព។
ទោះបីជាយ៉ាងណាកីឡាករ ធី តុងហ៊ី បាននិយាយក្រោយការប្រកួតថា រូបគេប្រឹងអស់ពីសមត្ថភាព ហើយវ៉ៃបានប៉ុណ្ណឹងដែរ តែគេឲ្យចាញ់គឺមិនសមសោះ។ ប៉ុន្តែលោក ថៃ អ៊ូ ដែលជាអ្នកមើលថែទាំ ធី តុងហ៊ី បានស្តីបន្ទោសដោយបាននិយាយថា៖ «តុងហ៊ី វ៉ៃល្ងង់ណាស់គឺមិនព្រមចេញវ៉ៃគេមុនទេ»។
លោក ថៃ អ៊ូ បានបន្ថែមថា៖ «ទោះជាចេញស្នៀតអីក៏បានដែរ ប៉ុន្តែកីឡាកររូបនេះ វាវ៉ៃល្ងង់បំផុតគឺវាយប្រចាំដោយគេវ៉ៃចេញ ២ ទៅ ៣ ទើបខំប្រឹងសង្វាតដេញវ៉ៃគេវិញ ហើយត្រូវតែខ្សល់»។ លោកបន្ថែមទៀតថាចៅក្រម និងគណៈកម្មការផ្តល់ពិន្ទុឲ្យ ធី តុងហ៊ី ចាញ់នេះសមមុខវាហើយ ព្រោះពេលហាត់បានល្អណាស់ តែពេលប្រកួតមហាយ៉ាប់។
ចំណែកកីឡាករចាស់វស្សា នន់ ជំនិត បានជួបមហាសំណាងដោយប្រកួតបានលទ្ធផលចាញ់ហើយ តែបែរទទួលបានឱកាសទៅវគ្គទី ២ បន្តព្រោះថៃ Phat Namneung ត្រូវបានគណៈកម្មការរៀបចំប្រកួតពិន័យឲ្យចាញ់ជាស្វ័យប្រវត្តិ ព្រោះរក្សាទម្ងន់តាមលក្ខខ័ណ្ឌកំណត់ត្រឹម ៦៩ គីឡូក្រាមមិនបាន។
លោក រាជ សុផែន ស្នងការប្រកួតប្រចាំសង្វៀនអាស៊ីអាគ្នេយ៍បានប្រកាសថា ការពិន័យឲ្យកីឡាករថៃ Phat Namneung ឲ្យចាញ់គឺយោងតាមបទបញ្ជាប្រកួត ហើយក្នុងនោះប្រសិនបើមានករណីបែបនេះកើតឡើងបន្តទៀត ទោះជាកីឡាករមកពីក្លិបណាក៏ដោយគឺត្រូវតែពិន័យឲ្យធ្ងន់ មិនអនុញ្ញាតឲ្យឡើងប្រកួតនោះឡើយ៕