ភ្នំពេញ៖ ព្រឹត្តិការណ៍ Boostrong Gold Medal Fighteron Fir សម្រាប់ថ្ងៃអាទិត្យទី ៧ ខែ កក្កដា ឆ្នាំ ២០១៩ នេះ នៅសង្វៀនអាស៊ីអាគ្នេយ៍ គឺជាការប្រកួតជម្រុះបញ្ចប់វគ្គទី១ ដោយចាប់ឆ្នោតតម្រូវអ្នកប្រដាល់កម្ពុជា ២ រូបគឺ ធី តុងហ៊ី មកពីក្លិបពន្លឺវិបុល និង នន់ ជំនិត នៅក្លិបស្វាយរលំឬទ្ធិជ័យប៉ះជាមួយកីឡាករមកពីអូស្ត្រាលី និងកីឡាករមកពីថៃក្នុងទម្ងន់ ៦៩ គីឡូក្រាមដូចគ្នា។
ជំនួបប្រកួតវគ្គនេះ កីឡាករ ធី តុងហ៊ី ត្រូវជួបប្រកួតជាមួយអ្នកប្រដាល់អូស្រ្តាលីឈ្មោះ ដារីន ចិន (Darin Chen) ចំណែកកីឡាករ នន់ ជំនិត ត្រូវប៉ះជាមួយកីឡាករថៃ Phat Namneung ដើម្បីស្វែងរកជ័យជម្នះ មាន ៣ ពិន្ទុ បានឡើងទៅប្រកួតវគ្គទី២ បន្ត ខណៈដែលអ្នកចាញ់ត្រូវធ្លាក់ចេញ។
ធី តុងហ៊ី ដែលមួយរយៈចុងក្រោយនេះហ្វឹកហាត់និងប្រកួតនៅប្រទេសថៃនោះ មានសមត្ថភាពកើនកម្រិតវិជ្ជាគុនគ្រាន់បើជាងមុន។
ជុំវិញប្រវត្តិប្រកួតវិញ កីឡាករ តុងហ៊ី ធ្លាប់បានប្រកួត ៩២ ដង ឈ្នះ ៦៧ ដង ចាញ់ ២២ ដង និងស្មើពិន្ទុ ៣ ដង ចំណែកកីឡាករអូស្ត្រាលី Darin Chen មានប្រវត្តិប្រកួតបានចំនួន ២៧ ដង ឈ្នះ ២០ ដង ចាញ់ ៧ ដង។
អ្នកប្រដាល់អូស្រ្តាលីរូបនេះធ្លាប់មកប្រកួតនៅស្រុកខ្មែរម្ដងហើយជាមួយកីឡាករ វង្ស វិឆ័យ ប៉ុន្តែប្រកួតចាញ់អ្នកប្រដាល់កម្ពុជាដែលមកពីក្លិបកងទ័ពឆ័ត្រយោង ៩១១ ដោយពិន្ទុយ៉ាងស្វិតស្វាញ។
កីឡាករ ធី តុងហ៊ី និយាយថា៖ «ជំនួបប្រកួតនេះ ខ្ញុំមានទំនុកចិត្តឈ្នះ៨០ភាគរយពីព្រោះខ្ញុំហ្វឹកហាត់ត្រៀមបានល្អ ហើយស្នៀតដែលខ្ញុំត្រៀមនោះគឺជង្គង់និងទាត់ឆ្ងាយដើម្បីផ្ដួលដៃគូប្រកួតឲ្យសន្លប់តែម្តង»។
លោក ថៃ អ៊ូ ប្រតិភូនាំកីឡាករមកប្រកួតនិយាយថា៖«ជំនួបប្រកួតនេះសំខាន់ណាស់ពីព្រោះអ្នកឈ្នះបានឡើងទៅវគ្គបន្ត រីឯអ្នកចាញ់គឺអស់ឱកាស។ ជាមួយគ្នានេះតាមខ្ញុំវិភាគសមត្ថភាពខ្ញុំមើលឃើញនេះទាំងសងខាងសុទ្ធតែត្រូវការឈ្នះដើម្បីទទួលបានកៅអីសម្រាប់វគ្គជម្រុះជុំទី២ ទៀត ប៉ុន្តែ ធី តុងហ៊ី ទំនងមានប្រៀបជាងដោយសារក្បាច់កណ្តាប់ដៃ ទាត់ និងជង្គង់ប៉ុន្តែ ធី តុងហ៊ី ចាញ់ប្រៀបកណ្តាប់ដៃកីឡាអូស្ត្រាលីនេះ បើមិនប្រយ័ត្តអាចចាញ់យ៉ាងងាយ»។
ចំណែកកីឡាករ នន់ ជំនិត វិញត្រូវតស៊ូជាមួយអ្នកប្រដាល់ថៃ ផេត ណាំនឹង (Phat Namneung) ដោយសារនេះជាគូប្រកួតដ៏តឹងតែង ហើយសម្រាប់ ជំនិត គឺលំបាកយកឈ្នះពីព្រោះមួយរយៈនេះ គាត់វ៉ៃអន់ និងចាញ់ភាគច្រើនមិនរហ័សដូចមុនៗទេ។
ទោះជាយ៉ាងណា កីឡាករ ជំនិត មានកណ្ដាប់ដៃធ្ងន់ធ្លាប់ផ្តួលដៃគូឲ្យសន្លប់ច្រើនមកហើយ ប៉ុន្តែល្អបានតែត្រឹម ៣ ទឹកដំបូង ព្រោះកម្លាំងគេស្រុតចុះខ្លាំងតែម្ដង។
ជំនិត មានប្រវត្តិប្រកួតចំនួន ៧៨ ដង ឈ្នះ ៦០ ដង ចាញ់ ១៦ ដង និងស្មើពិន្ទុ ២ ដង ចំណែកកីឡាករថៃ ផេត ណាំនឹង វិញមានប្រវត្តិប្រកួតចំនួន ៨៥ ដង ឈ្នះ ៦៦ ដង ចាញ់ ១៨ ដង និងស្មើពិន្ទុ ១ ដង។
អ្នកប្រដាល់ នន់ ជំនិត និយាយថា៖ «មានសង្ឈឹមឈ្នះតិចពីព្រោះកីឡាករថៃនេះល្អក្បាច់ទាត់ ហើយពេលណាខ្ញុំគ្មានឱកាសវ៉ៃកណ្តាប់ដៃគឺលំបាកនឹងរកចំណុចវាយឈ្នះណាស់ ប៉ុន្តែខ្ញុំនឹងវ៉ៃអស់ពីសមត្ថភាព តែបញ្ហាឈ្នះឬចាញ់មិនហ៊ាននិយាយមុនទេខ្លាចគេថា យើងអួត»៕