.jpg)
កីឡាករថៃ Keokangwan ត្រូវបានដាក់ឲ្យជួប ឌុម កែវដា ជាថ្មី នៅសង្វៀនបាយ័ន។ សហការី
ភ្នំពេញ៖ កីឡាករកម្ពុជា ធឿន ធារ៉ា និង ឌុម កែវដា សុទ្ធតែត្រូវប្រឈមនៅការប្រកួតដ៏តានតឹង ខណៈអ្នកទាំង ២ ត្រូវបានដាក់ឲ្យជួបអ្នកប្រយុទ្ធដ៏ពិតប្រាកដរបស់ថៃ Klakhunserk និង Keokangwan Phrivwayo នៅសង្វៀនបាយ័នស្ទឹងមានជ័យនាយប់ថ្ងៃសុក្រនេះ ហើយនេះជាការប្រកួតដ៏អស្ចារ្យមួយ ស្របពេលដែលកីឡាករជើងខ្លាំងទាំង ២ នាក់របស់ថៃ មានកម្រិតបច្ចេកទេសលើកីឡាករម្ចាស់ផ្ទះ។
វត្តមានប្រកួតរបស់កីឡាករ Keokangwan នៅលើទឹកដីកម្ពុជា គឺលំបាករកដៃគូមានសមត្ថភាពឲ្យស័ក្តិសមណាស់ ហើយកន្លងមកធ្លាប់ចាញ់ ឃីម ឌីម៉ា ២លើក និងមានប្រៀបឈ្នះ ១ លើក ប៉ុន្តែគណៈកម្មការទាញឲ្យស្មើ ពិសេសក្រោយការប្រកួតនោះហើយដែល ឃីម ឌីម៉ា បានខូចជើងមកដល់បច្ចុប្បន្ន។
ចំណែក ឌុម កែវដា ក៏ធ្លាប់បានចាញ់ដោយពិន្ទុ Keokangwan ផងដែរ ប៉ុន្តែការជួបគ្នាលើកនេះ ឌុម កែវដា ដែលកំពុងហ្វឹកហាត់ជាមួយសិស្សច្បង រឿង សោភ័ណ្ឌ នោះ បាននិយាយទំនងដូចជាអួតថា៖ «មានទំនុកចិត្តឈ្នះ ៧០ ភាគរយ» ដោយក្នុងនោះ រឿង សោភ័ណ្ឌ បានផ្តល់ជាយុទ្ធសាស្រ្តថា ត្រូវវ៉ៃកណ្តាប់ដៃ និងកែងឲ្យបានច្រើន ហើយត្រូវបិទ ឬគេចពីស្នៀតទាត់ឲ្យបាន ព្រោះកីឡាករថៃរូបនេះ ល្អទាត់ និងជង្គង់ប៉ុណ្ណោះ។
រឿង សោភ័ណ្ឌ ប្រាប់ថា៖ «បើ ឌុម កែវដា ធ្វើតាមខ្ញុំបាន សង្ឃឹមឈ្នះ ៨០ ភាគរយ គឺយើងមិនចូលឱបមិនឈរឲ្យគេទាត់ចូលនោះឡើយ»។ ចំណែកលោក គង់ ចាន់ធីណា អ្នកគ្រប់គ្រងបាននិយាយថា៖ «តាមខ្ញុំមើលពីសមត្ថភាព គឺសង្ឃឹមឈ្នះតិចណាស់ ប៉ុន្តែឆន្ទៈ និងទឹកចិត្តប្រកួតធំ គឺខ្ញុំសរសើរដល់ ឌុម កែវដា ដែលខំហ្វឹកហាត់ និងតាំងចិត្តប្រកួតខ្ពស់»។
ចំណែកការជួបគ្នារវាង ធឿន ធារ៉ា ជើងខ្លាំងរបស់សមាគមកីឡាប្រដាល់ក្រសួងកសិកម្ម និងអ្នកប្រដាល់ចាស់វស្សាជើងខ្លាំងរបស់ថៃ Klakhunserk ក្នុងប្រភេទទម្ងន់ ៧០ គីឡូក្រាម ក៏ស្ថិតនៅក្នុងភាពតានតឹងខ្លាំង និងពិបាករកការឈ្នះផងដែរ ព្រោះកីឡាករថៃម្នាក់នេះជាម្ចាស់ខ្សែក្រវាត់ម្នាក់នៅប្រទេស ថៃ។
លោក អេ ភូថង គ្រូបង្វឹក របស់ ធឿន ធារ៉ា បាននិយាយថា៖ «ធឿន ធារ៉ា ហ្វឹកហាត់ មិនសូវបានល្អ កម្លាំងមិនសូវល្អដូចមុនទេ ដោយសារជីវភាពខ្វះខាត ជួយមើលកូនខ្ចី និងប្រពន្ធធ្វើការរោងចក្រ»។ យ៉ាងនេះក្តី ធឿន ធារ៉ា មានចិត្តធំ និងមានស្នៀតទាត់ល្អ ព្រមទាំងល្អជង្គង់ផងដែរ។ លោក អេ ភូថង បានប្រាប់បន្ថែមថា៖ «ការចាញ់ ឬឈ្នះរបស់គូនេះ គឺតឹងតែង ប៉ុន្តែចំណុចខ្សោយរបស់កីឡាករយើង គឺឆាប់ស្រុតកម្លាំងនៅចុងទឹក»។
កីឡាករ Klakhunserk ជាជើងខ្លាំងរបស់ថៃ និងធ្លាប់យកខ្សែក្រវាត់បាននៅស្រុកខ្មែរថែមទៀតផង។ អ្នកប្រដាល់រូបនេះ ធ្លាប់មកជួបប្រកួតជាមួយអ្នកប្រដាល់ជើងខ្លាំងកម្ពុជាច្រើននាក់ហើយ តែមិនធ្លាប់ជួប ធឿន ធារ៉ា នោះទេ។
ម្ចាស់ខ្សែក្រវាត់មកពីថៃ Klakhunserk ធ្លាប់ប្រកួត ១៦០ ដង ឈ្នះ ១១៥ ចាញ់ ៣៤ និងស្មើ ១១ ដង ហើយក្នុងនោះ ធ្លាប់បានផ្ដួលដៃគូឲ្យសន្លប់បាន ៥៤ ដង ខណៈ ធឿន ធារ៉ា ធ្លាប់ប្រកួតត្រឹម ៧៥ ដង ឈ្នះ ៦៣ ចាញ់ ១១ និងស្មើ ១ ដង តែ ធារ៉ា មានប្រវត្តិផ្ដួលដៃគូឲ្យសន្លប់ច្រើនជាង Klakhunserk គឺបានចំនួន ៦១ ដងឯណោះ៕
