.jpg)
ធឿន ធារ៉ា ត្រូវបានអាជ្ញាកណ្តាលលើកដៃឲ្យឈ្នះ ក្រោយវ៉ៃ Sing Dam ឲ្យសន្លប់។ រូប សហការី
ភ្នំពេញៈ អ្នកប្រដាល់ ធឿន ធារ៉ា បានផ្តួលជើងខ្លាំងរបស់ថៃ Sing Dam ដែលជាសត្រូវចាស់របស់ខ្លួន ឲ្យសន្លប់ត្រឹមទឹកទី ៣ ដើម្បីក្លាយជាម្ចាស់ប្រាក់លាន ក្នុងប្រភេទទម្ងន់ ៦៩ គីឡូក្រាម នៅលើសង្វៀន CNC ចំណែកកីឡាករកម្ពុជា ៥ នាក់ទៀត ក៏បានឈ្នះបរទេស នៅសង្វៀននេះដែរ។
សម្រាប់ការបង្ហាញខ្លួន នៅលើសង្វៀន CNC កាលពីយប់ថ្ងៃសៅរ៍នោះ ធឿន ធារ៉ា ដែលមានឈ្មោះបោះសំឡេងចេញពីការប្រកួត នៅប្រទេសថៃមកនោះ បានធ្វើឲ្យអ្នកទស្សនាផ្ទាល់ មានការពេញចិត្តខ្លាំង និងកោតសរសើរដល់បច្ចេកទេសប្រកួតរបស់គេ ដែលមានភាពខ្លាំង ស័ក្តិសមនឹងភាពល្បីល្បាញរបស់គេ ពិសេសស្នៀតវាយកែង និងរូសកែងរបស់គេតែម្តង។
នៅក្នុងការប្រកួតវគ្គជម្រុះ កីឡាករវ័យ ២៣ ឆ្នាំ ធឿន ធារ៉ា របស់សមាគមកីឡាប្រដាល់ក្រសួងកសិកម្ម បានយកឈ្នះកីឡាករបារាំង Julein ដោយពិន្ទុ ហើយក្នុងការប្រកួតត្រឹម ៣ ទឹកនោះ ធារ៉ា បានម៉ាត់ វាយកែង ពិសេសបានរូសកែងឲ្យ Julien បែកឈាមតាំងពីទឹកទី ២ ប៉ុន្តែបារាំងម្នាក់នេះ បានតស៊ូរហូតចប់ទឹកទី ៣ និងបានចាញ់ពិន្ទុ ទាំងគ្រាំគ្រាបំផុត។
ជ័យជម្នះនេះ បានផ្តល់ឱកាសឲ្យ ធារ៉ា បានឡើងទៅជួបជើងខ្លាំង Sing Dam នៅវគ្គផ្តាច់ព្រ័ត្រ ដើម្បីជម្រុះភាពមន្ទិលនាលទ្ធផលស្មើគ្នា នៅលើទឹកដីថៃកន្លងមក។ បើទោះបីជា Sing Dam បានឈ្នះឡុង សុវណ្ណឌឿន ដោយពិន្ទុ នៅវគ្គជម្រុះ ក្នុងថ្ងៃជាមួយគ្នានោះ ប៉ុន្តែ Sing Dam មិនអាចទប់ ធឿន ធារ៉ា ដល់ ៥ ទឹកនោះទេ។
អ្នកទាំង ២ នេះ ចាប់ប្តូរជង្គង់គ្នាខ្លាំងនៅទឹកទី ១ និងទឹកទី ២ ប៉ុន្តែនៅទឹកទី ៣ ធឿន ធារ៉ា បានវ៉ៃកែងឆ្វេងផ្ទួនៗចំនួន ៣ កែងទៅលើផ្ទៃមុខ Sing Dam និងបានបុកថែមមួយជង្គង់ស្តាំ ធ្វើឲ្យ Sing Dam ដួល និងត្រូវអាជ្ញាកណ្តាលរាប់ភ្លាម។ ក្រោយការរាប់នេះ ធារ៉ា បានធាក់ចូលពោះមួយជើង រួចលោតបុកថែមមួយជង្គង់ និងវាយមួយកែងឆ្វេងទៀត បណ្តាលឲ្យ Sing Dam សន្លប់នៅចុងទឹកទី ៣ នោះតែម្តង។
លទ្ធផលនេះ ធឿន ធារ៉ា ក្លាយជាម្ចាស់ជើងឯក អមជាមួយប្រាក់រង្វាន់ ៤ លានរៀល រួមជាមួយប្រាក់តម្លៃខ្លួន ដែលត្រូវបានពិធីកររបស់ CNC ប្រកាសថា បានសរុបជិត ២ ពាន់ដុល្លារ ឯ Sing Dam បានប្រាក់រង្វាន់ ២ លានរៀល និងប្រាក់តម្លៃខ្លួន សរុបជាង ១ ពាន់ដុល្លារ ផងដែរ។
ចំណែកការប្រកួតអន្តរជាតិចំនួន ៦ គូទៀត កាលពីថ្ងៃសុក្រ និងថ្ងៃអាទិត្យ នៅសង្វៀន CNC នេះដែរ ហ៊ឹម សេរី បានឈ្នះថៃ Pasaklek តែ រឿង សារ័ត្ន ចាញ់ថៃ Chhanaksoek Lek។ រីឯ ឆៃ សារ៉ា ផ្តួលកីឡាករម៉ុងហ្គាលី Sundui Batjargal ឲ្យសន្លប់ទឹកទី ២ មុនពេល ផាន់ គ្រាន់ ឈ្នះពិន្ទុថៃ Kreang Krai ហើយ បឺត សង្ឃឹម ទាត់ឲ្យថៃ Avuthlek ខូចជើងទឹកទី ១ ខណៈផុន ផាន់ណា ឈ្នះពិន្ទុថៃ Orono៕
