ភ្នំពេញ៖ ស្របពេលអ្នកប្រដាល់ជម្រើសជាតិ ជាស្ត្រីមួយចំនួនរួមមាន វី ស្រីខួច, វី ស្រីឆាយ និង អេ យ៉ានុត ជាដើម បានលាឈប់ពីអាជីពឈឺខ្លួននេះជាបណ្តើរៗនោះ កីឡាការិនីមានកណ្តាប់ដៃធ្ងន់ នូវ ស្រីពៅ ដែលជាជើងខ្លាំងម្នាក់ ក្នុងក្រុមជម្រើសជាតិកាន់តែប្តេជ្ញាពង្រឹងសមត្ថភាពរបស់ខ្លួនឲ្យបានកាន់តែខ្លាំង ដោយមិនបោះបង់អាជីពនេះទេ ព្រោះមានប្រដាល់ ទើបនាងមានកិត្តិយស និងទទួលបានផ្លែផ្កា ជួយដល់ក្រុមគ្រួសារបានយ៉ាងប្រសើរ។
ក្រោយពីចូលប្រឡូកក្នុងការប្រដាល់អស់រយៈពេលជាង ៥ ឆ្នាំ នូវ ស្រីពៅ ដណ្តើមបានភាពខ្លាំងលេចធ្លោ លើឆាកអន្តរជាតិ ផ្នែកកីឡាប្រយុទ្ធ គឺប្រដាល់សកល, គុនខ្មែរអន្តរជាតិ, ONE Championship និង World Lethwei Champinship (WLC) ហើយគិតមកដល់បច្ចុប្បន្ន ឆ្នាំ ២០២០ នេះ នូវ ស្រីពៅ បានបន្តជាប់ជាកីឡាការិនីប្រដាល់សកលជម្រើសជាតិក្នុងប្រភេទទម្ងន់ ៥១ គ.ក្រ គ្មានគូប្រៀប ទោះដៃគូខ្លាំងមួយចំនួនរួមអាជីព បានលាឈប់។
ក្នុងកិច្ចសម្ភាសន៍ជាមួយភ្នំពេញប៉ុស្តិ៍ កីឡាការិនីឆ្នើម នូវ ស្រីពៅ បាននិយាយថា៖ «មុខរបរមួយនេះ ខ្ញុំមិនបោះបង់ចោលទេ ព្រោះខ្ញុំទទួលបានកិត្តិយស និងប្រាក់ សម្រាប់ជួយក្រុមគ្រួសារបានមួយកម្រិត ដ្បិតអីក្នុងព្រឹត្តិការណ៍ប្រកួតធំៗជាលក្ខណៈអន្តរជាតិ ខ្ញុំទទួលបានតម្លៃខ្លួនច្រើនជាង ១ ពាន់ដុល្លារ ក្នុងការប្រកួត ១ លើកៗ ទៅតាមកម្មវិធីផ្សេងពីគ្នា។ ហេតុនេះ ទោះជាថ្ងៃអនាគត ខ្ញុំប្រកួតលែងកើត ក៏ខ្ញុំនៅចង់បង្កើតក្លិប ធ្វើជាគ្រូប្រដាល់ក្នុងអាជីពមួយនេះដែរ»។
ស្រីពៅ ជាកូនទី៧ ក្នុងគ្រួសារមានបងប្អូន ៨ នាក់ ដែលមានជីវភាពក្រីក្រ ហើយនៅក្នុងចំណោមអ្នកទាំង ៨ នេះ គឺមានតែ នូវ ស៊ីថា និងរូបនាងផ្ទាល់ ដែលចាប់យកអាជីពប្រដាល់រកប្រាក់ជួយគ្រួសារបានមួយកម្រិតធំ។ ការហក់ចូលក្នុងពិភពប្រដាល់ដំបូង គឺ ស្រីពៅ ជាអ្នកប្រដាល់គុនខ្មែរ បន្ទាប់ពីមានកណ្តាប់ដៃល្អ បានចូលទៅប្រដាល់សកល ព្រមទាំងមានឱកាសបានទៅប្រកួតវាយដាក់ទ្រុងរបស់ ONE Champion និងការប្រកួត WLC ដោយដណ្តើមបានជយលាភីគួរឲ្យកត់សម្គាល់។
ចំពោះស្នាដៃជាដុំកំភួន ដែលនូវ ស្រីពៅ ទទួលបាន គឺនាងបានឈ្នះមេដាយសំរឹទ្ធពីការប្រកួតស៊ីហ្គេមនៅហ្វីលីពីន ឆ្នាំ ២០១៩, ឈ្នះខ្សែក្រវាត់ប្រដាល់គុនខ្មែរក្នុងព្រឹត្តិការណ៍ប្រកួតសម្ពោធវិមានឈ្នះឈ្នះ នាថ្ងៃ ២៩ ខែធ្នូ ឆ្នាំ ២០១៨ ឈ្នះការប្រកួតដ៏កក្រើកលើកីឡការិនីម្ចាស់ផ្ទះរបស់ថៃ ក្នុងកម្មវិធី ONE Championship កាលឆ្នាំ ២០១៩ និងឈ្នះការប្រកួតទាំង ២ លើកនៃព្រឹត្តិការណ៍ WLC នៅប្រទេសមីយ៉ាន់ម៉ា ក្នុងឆ្នាំ ២០១៩ ដូចគ្នា។
កីឡាការិនីមានអាយុជាង ២០ ឆ្នាំ កម្ពស់ ១,៥៥ ម៉ែត្រ នូវ ស្រីពៅ បានប្រាប់បន្តថា៖ «ក្នុងគ្រួសាររបស់នាងខ្ញុំ លោកឪពុកគាត់មានជំងឺប្រចាំកាយ ហើយប្រាក់ចំណូលបានពីការប្រកួតរបស់ខ្ញុំ ទោះបីបានច្រើនក៏លំបាកទប់ទល់នឹងសេចក្តីត្រូវការចំណាយច្រើននេះដែរ ពិសេសក្នុងរយៈពេលជំងឺកូវីដ ១៩ ខ្ញុំត្រូវបានលុបចោលការប្រកួតនៅជប៉ុន និងអន្តរជាតិនានា ក្នុងប្រទេសថៃ ដែលធ្វើឲ្យជីវភាពលំបាកមែនទែន ប៉ុន្តែក្នុងខែនេះ ខ្ញុំទទួលបានការឧបត្ថម្ភក្នុងនាមជាកីឡាការិនីជម្រើសជាតិ ដែលទើបតែប្រមូលផ្តុំថ្មីៗ»។
នូវ ស្រីពៅ បន្ថែមថា៖ «ទោះបីក្នុងក្រុមជម្រើសជាតិប្រដាល់សកល ឆ្នាំនេះ មានតែខ្ញុំម្នាក់គត់ជាស្ត្រី ប៉ុន្តែខ្ញុំនៅតែហ្វឹកហាត់ ដើម្បីឲ្យរឹងមាំ និងត្រៀមប្រកួតអន្តរជាតិនានា តាមកម្មវិធីដែលគ្រូដាក់ឲ្យ គឺមិនបោះបង់ចោលដាច់ខាតចំពោះមុខរបរមួយនេះ»។
លោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជាប្រាប់ថា ឆ្នាំ ២០២០ នេះ ក្រុមធំជម្រើសជាតិប្រដាល់សកលមាន ៨ នាក់ ក្នុងនោះមានកីឡាករ ៧ នាក់ និងកីឡាការិនីមានតែ នូវ ស្រីពៅ ម្នាក់គត់៕