.jpg)
ក្រុងប៊ែរឡាំង៖ មើលទៅក្ដីសង្ឃឹមរបស់ក្រុម Werder Bremen ដែលតស៊ូឲ្យផុតពីតំបន់គ្រោះថ្នាក់នៃក្របខ័ណ្ឌ Bundesliga អាល្លឺម៉ង់មានតិចទៅៗហើយ ក្រោយបរាជ័យយ៉ាងដំណំនៅផ្ទះខ្លួនឯង ក្រោមថ្វីជើងរបស់ក្រុម Eintracht Frankfurt ៣-០ ក្នុងការប្រកួតកាលពីយប់ថ្ងៃពុធ។
Bremen ជាក្រុមមួយដែលលេងនៅលីកលំដាប់កំពូលយូរជាងក្លិបណាទាំងអស់ ពោលគឺធ្លាក់តែម្ដងគត់ទៅលីកទី ២ រដូវកាល ១៩៨០-១៩៨១ តែដោយការប្រកួតសល់តែ ៥ លើក ហើយតាមពីក្រោយក្រុមឈរនៅទីសុវត្ថិភាព ៣ ពិន្ទុ ដូច្នេះ ឱកាសប្រឈមនឹងការកាត់ចោលរដូវកាលក្រោយអាចនឹងខ្ពស់គួរសម។
ការប្រកួត ដែលលេងបិទទ្វារនេះ ៣ គ្រាប់របស់ក្រុមភ្ញៀវ Frankfurt រកបានដោយកីឡាករ ២ រូប គឺគ្រាប់ទី១ ដោយខ្សែប្រយុទ្ធ Andre Silva នាទីទី ៦១ ហើយគ្រាប់ទី ២ និងទី ៣ ធ្វើបានដោយកីឡាករបម្រុង គឺខ្សែបម្រើ Stefan Ilsanker តែម្នាក់ឯង នៅនាទីទី ៨១ និង ៩០។
ចេញពីប្រទេសអាល្លឺម៉ង់ ទៅព័រទុយហ្គាល់ឯណោះវិញ លីកលំដាប់កំពូល Primeira Liga របស់ប្រទេសនេះបានចាប់ផ្ដើមមានសកម្មភាពឡើងវិញហើយ កាលពីយប់ថ្ងៃពុធ ក្រោយផ្អាកដោយសារតែការកើតមាននូវវីរុសកូរ៉ូណា តែអ្វីដែលគួរឲ្យភ្ញាក់ផ្អើល គឺក្រុមដែលមានពិន្ទុនាំមុខគេក្នុងតារាងបានលេងចាញ់ក្រុម Famalicao ២-១ សម្រាប់ការប្រកួតបើកឆាកនេះ។
បរាជ័យដ៏គួរឲ្យសោកស្ដាយរបស់ក្រុម Porto ដែលមាន ៦០ ពិន្ទុ ក្នុងចំណោម ២៥ សប្ដាហ៍កន្លងមកនេះ បានបើកផ្លូវយ៉ាងទូលាយឲ្យក្រុមលំដាប់ទី ២ Benfica ក្នុងការបានឡើងទៅឈរទីកំពូលជំនួសវិញ ព្រោះកំពុងតាមពីក្រោយតែ ១ ពិន្ទុប៉ុណ្ណោះ ខណៈក្រុមដែលដឹកនាំដោយលោកគ្រូបង្វឹក Bruno Lage សល់ការប្រកួតមួយក្នុងដៃ។
សម្រាប់ការប្រកួតបើកឆាកនេះធ្វើឲ្យលីកកំពូលរបស់ព័រទុយហ្គាល់ ក្លាយជាលីកបាល់ទាត់អាជីពទី ២ នៅតំបន់អឺរ៉ុប ដែលចាប់ផ្ដើមឲ្យមានដំណើរការសកម្មភាពឡើងវិញ គ្រាន់តែថា លីករបស់ប្រទេសព័រទុយហ្គាល់ មួយនេះ មិនត្រូវបានចាត់ចូលជាលីកកម្រិតកំពូលដូចក្របខ័ណ្ឌ Bundesliga របស់ប្រទេសអាល្លឺម៉ង់ ឡើយ៕ AFP/VN
