The Phnom Penh Post Search

Search form

បញ្ចប់​វគ្គ​ជម្រុះ Hun Sen Cup 2014

បញ្ចប់​វគ្គ​ជម្រុះ Hun Sen Cup 2014

140117_25
កីឡាកររបស់ក្រុមវេស្ទើន(ឆ្វេង) បានព្យាយាមរំខានការលោតតែតបាល់របស់កីឡាករអាស៊ីអឺរ៉ុប

ភ្នំពេញ: ការ​ប្រកួត​ពាន​រង្វាន់ ហ៊ុន សែន លើក​ទី​៨ ឆ្នាំ​២០១៤ (Hun Sen Cup 2014) បាន​បញ្ចប់​ការ​ប្រកួត​ជម្រុះ​តាម​តំបន់​ឬ​តាម​ពូល​ទាំង​៦​របស់​ខ្លួន​ហើយ កាលពី​រាត្រី​ថ្ងៃ​ព្រហស្បតិ៍ ម្សិលមិញ​នេះ ហើយ​ក៏​បាន​កំណត់ និង​ផ្គូផ្គង​ក្រុម​ឈ្នះ​ទាំង​៨ សម្រាប់​ឡើង​ទៅ​ជួប​ក្រុម​ទទួល​បាន​ចំណាប់​ថ្នាក់​ចាប់ពី​លេខ​១ ដល់​លេខ​៨​ឆ្នាំ​២០១២ នៅ​វគ្គ​ខ្វែង​១៦​ក្រុម រួចរាល់​អស់​ហើយ​ដែរ។

ឆ្លងកាត់​ការ​ប្រកួត​ជម្រុះ ដែល​បាន​ចាប់​ដំណើរការ​តាំងពី​ថ្ងៃ​ទី​៨ ខែ​មករា នៅ​តាម​ទីលាន​ផ្សេងៗ​គ្នា​នោះ ក្រុម​អាស៊ីអឺរ៉ុប បាន​ទទួល​ចំណាត់​ថ្នាក់​លេខ​១ ប្រចាំ​តំបន់​រាជធានី​ភ្នំពេញ ឬ​ពូល​A បន្ទាប់ពី​ក្រុម​មួយ​នេះ​បាន​យក​ឈ្នះ​លើ​ក្រុម​ចំណាត់​ថ្នាក់​លេខ​២ វេស្ទើន ១-០ ក្នុង​ការ​ប្រកួត​ជម្រុះ​តាម​ពូល​លើក​ចុង​ក្រោយ នៅ​ពហុកីឡដ្ឋាន​ជាតិ កាលពី​ល្ងាច​ថ្ងៃ​ព្រហស្បតិ៍ ម្សិលមិញ​នេះ។ រីឯ​ខណ្ឌ​ចំការមន ទទួល​បាន​លេខ​៣ ប៉ុន្តែ​ខណ្ឌ​មានជ័យ​(ព្រែកជ័យ​កីឡា) និង​ខណ្ឌ​ដង្កោ បាន​ធ្លាក់​ចេញ​ពី​ការ​ប្រកួត​នេះ​ដូច​គ្នា។

ចំណែក​ការ ប្រកួត​តាម​តំបន់​៥​ទៀត ដែល​កំណត់​យក​តែ​១​ក្រុម សម្រាប់​ឡើង​មក​ប្រកួត​វគ្គ​ខ្វែង​នោះ ក្រុម​ត្រាយ​អាស៊ី​(ខេត្ត​កណ្តាល) ទទួល​បាន​ចំណាត់​ថ្នាក់​លេខ​១ ប្រចាំ​តំបន់​ខាង​កើត​ឬ​ពូល​B ដោយ​ពួកគេ​បាន​ទម្លាក់​ក្រុម​ម្ចាស់​ផ្ទះ​ខេត្ត​ព្រៃវែង និង​អ.ហ​ខេត្ត​ស្វាយរៀង។ តំបន់​កណ្តាល ឬ​ពូល​C វិញ​ក្រុម​ខេត្ត​ឧត្តរមានជ័យ ទទួល​បាន​លេខ​១ ហើយ​ខេត្ត​ព្រះវិហារ ខេត្ត​កំពង់ធំ និង​ម្ចាស់​ផ្ទះ​បក្សី​ចាំ​ក្រុង​ខេត្ត​សៀមរាប ធ្លាក់​ដូច​គ្នា។

សម្រាប់​ការ​ប្រកួត​នៅ​តំបន់​ខាង​លិច​ឬ​ពូល​D ដែល​មាន​៤​ក្រុម​ចូលរួម​នោះ ក្រុម​ម្ចាស់​ផ្ទះ​ខេត្ត​កំពង់ឆ្នាំង បាន​ទម្លាក់ ក្រុម​ធនាគារ​ស្រូវ​ខេត្ត​ពោធិ៍សាត់ ខេត្ត​បាត់ដំបង និង​ក្រុម​ស្នងការដ្ឋាន​នគរបាល​ខេត្ត​ប៉ៃលិន ដើម្បី​ឡើង​ទៅ​វគ្គ​បន្ត។ ចំណែក​តំបន់​ខាង​ត្បូង​ឬ​ពូល​E ក្រុម​ខេត្ត​ព្រះសីហនុ ទទួល​ចំណាត់​ថ្នាក់​លេខ​១ ខណៈ​ក្រុម​ខេត្ត​កែប ខេត្ត​កំពត និង​ក្រុម​អ.ហ​ខេត្ត​កោះកុង ហាល​អាវ​ដូច​គ្នា។ ប៉ុន្តែ​ក្រុម​ខេត្ត​ក្រចេះ ដែល​ឈរ​នៅ​ពូល​F បាន​ឡើង​ទៅ​ប្រកួត​នៅ​វគ្គ​ខ្វែង ដោយ​ស្វ័យប្រវត្តិ ដោយសារ​ពូល​នេះ មាន​តែ​មួយ​ក្រុម​ចូលរួម។

គួរ​បញ្ជាក់​ថា សម្រាប់​ការ​ប្រកួត​វគ្គ​ខ្វែង​១៦​ក្រុម ឬ​ដំណាក់កាល​ផ្តាច់ព្រ័ត្រ ដែល​នឹង​ចាប់​ដំណើរការ​ពី​ថ្ងៃ​ទី​២២ ខែ​មករា នោះ ក៏​បាន​បែងចែក​ការ​ប្រកួត​ជា​៤​ពូល​ដែរ ដោយ​ក្នុង​១​ពូលៗ​មាន​៤​ក្រុម គឺ​ក្រុម​ទើប​រួច​ផុត​ពី​ការ​ប្រកួត​ជម្រុះ​២​ក្រុម និង​ក្រុម​ជ័យលាភី​ឆ្នាំ​ចាស់​២​ក្រុម។

យោងតាម​តារាង​ប្រកួត​ផ្លូវ ការ​របស់​FFC បាន​បង្ហាញ​ថា ចំការ​កៅស៊ូ​បឹងកេត ដែល​ឈរ​នៅក្នុង​ពូល​A​នោះ​ត្រូវ​ជួប​ខេត្ត​ក្រចេះ ខណៈ​ខេត្ត​ព្រះសីហនុ ត្រូវ​ប្រឈម​នឹង​ក្រុម​ជើងឯក​ណាហ្គាខប។ ចំណែក​ពូល​B ខណ្ឌ​ចំការមន ត្រូវ​ជួប​ស្វាយរៀង ហើយ​អាស៊ីអឺរ៉ុប ប៉ះ​ក្រុម​លេខ​៤ ឆ្នាំ​ចាស់​គិរីវង់​សុខសែនជ័យ។

នៅក្នុង​ពូល​C ក្រុម​ត្រាយ​អាស៊ី ត្រូវ​ជួប​ក្រុម​ចំណាត់​ថ្នាក់​លេខ​៣​ភ្នំពេញ​ក្រោន ហើយ​ក្រុម​អគ្គស្នងការ​នគរបាល​ជាតិ ត្រូវ​ជួប​ក្រុម​ខេត្ត​កំពង់ឆ្នាំង។ ពូល​D បៀលប្រាយ ត្រូវ​ប៉ះ​ខេត្ត​ឧត្តរមានជ័យ ហើយ​វេស្ទើន ត្រូវ​ជួប​ក្រុម​ម្ចាស់​ជើងឯក​រង​ក្រសួង​ការពារ​ជាតិ៕

អត្ថបទគួរចាប់អារម្មណ៍