ភ្នំពេញៈ អ្នកប្រដាល់វ័យក្មេងមកពីខេត្តកោះកុងមានក្បាច់ជង្គង់ល្អ បាង កាយ៉ាក ដែលបាត់មុខយូរពីសង្វៀនក្នុងស្រុកនោះនឹងលេចមកជាថ្មីម្តងទៀត នៅសង្វៀនប៉ុស្តិ៍លេខ ៥ ថ្ងៃសៅរ៍នេះដោយរូបគេចង់យកឈ្នះកីឡាករថៃ កាថាប់វស៊ុងក្នុងការប្រកួតមិត្តភាពអន្តរជាតិទម្ងន់ ៥៧ គីឡូក្រាម ដើម្បីស្តារភាពល្បីល្បាញឡើងវិញ។
កីឡាករ បាង កាយ៉ាក ធ្លាប់បានសាងភាពល្បីល្បាញនៅស្រុកថៃច្រើនជាងសង្វៀនស្រុកខ្មែរ ហើយការវិលមកប្រកួតក្នុងស្រុកវិញជាថ្មី ក្រោយអវត្តមានជិត ៣ ឆ្នាំមកនេះធ្វើឲ្យមានការចាប់អារម្មណ៍ខ្លាំងពីមហាជន ខណៈការបង្ហាញខ្លួននៅលើសង្វៀន CNC កាលពីថ្ងៃសៅរ៍សប្តាហ៍មុន បាង កាយ៉ាក ត្រូវបានកីឡាករជើងខ្លាំងមកពីប្រទេសអ៊ីរ៉ង់ Ghodratisraskan ផ្តួលឲ្យសន្លប់ធំងើបលែងរួចត្រឹមទឹកទី ៣ ស្របពេលដែលមហាជននៅមន្ទិលពីសមត្ថភាពថានៅខ្លាំងដូចមុន ឬធ្លាក់ចុះ?
លោកស្រី សាំង សុម៉ាលី ប្រពន្ធ អេ ភូថង ដែលមើលថែទាំការស្នាក់នៅហូបចុក និងហ្វឹកហាត់ដល់ បាង កាយ៉ាក បានប្រាប់ថា៖ «បាង កាយ៉ាក វាកំពុងហ្វឹកហាត់ត្រៀមប្រកួតបានល្អគឺវ៉ៃក្នុងសប្តាហ៍នេះជាមួយកីឡាករថៃក្នុងទម្ងន់ ៥៧ គីឡូក្រាម។ ការប្រកួតរបស់វាលើកនេះ ខ្ញុំដឹងថាជួបការប្រកួតលំបាក ព្រោះកីឡាករថៃ កាថាប់វស៊ុង មានសមត្ថភាពក្បាច់គុនល្អដែរ ប៉ុន្តែវាចង់ឈ្នះខ្លាំង ដើម្បីទទួលបានចាប់គូប្រកួតលក្ខណៈអន្តរជាតិបន្តទៀត»។
ចំណែក បាង កាយ៉ាក បាននិយាយថា៖ «ខ្ញុំប្រឹងប្រកួតឲ្យអស់ពីសមត្ថភាព ដើម្បីយកឈ្នះ ស្តារមុខមាត់ភាពល្បីល្បាញឡើងវិញ ព្រោះខ្ញុំខកខានប្រកួតនៅស្រុកខ្មែរយូរគ្រាន់ដែរ»។ ទាក់ទងទៅនឹងមូលហេតុប្រកួតចាញ់ដោយសន្លប់ក្រោមកណ្តាប់ដៃកីឡាករមកពីអ៊ីរ៉ង់កាលពីថ្ងៃសៅរ៍ដែលនាំឲ្យមហាជនកំពុងមន្ទិលពីសមត្ថភាពវិជ្ជាគុននោះ ត្រូវបានកីឡាករ បាង កាយ៉ាក បកស្រាយថា ការហ្វឹកហាត់មិនទាន់បានល្អ មិនបានធ្វើគីឡូ (ទម្ងន់) ឲ្យស្រកគឺចាញ់ប្រៀបផ្នែកកម្លាំង។
បាង កាយ៉ាក បានបន្ថែមថា៖ «កាលពីសប្តាហ៍មុន កីឡាករអ៊ីរ៉ង់នោះខ្លាំងមានប្រវត្តិចាញ់តែម្តងគត់ ហើយខ្ញុំចាញ់ប្រៀបដោយចូលចាប់លេងក្បាច់ជង្គង់មិនបាន និងចាញ់កណ្តាប់ដៃគេទៀត។ នៅពេលខ្ញុំចាញ់ប្រៀបគេ ដោយអាជ្ញាកណ្តាលរាប់ខ្ញុំចំនួន ២ លើកនោះ ខ្ញុំស្ទុះចូលផ្សងចាប់លេងជង្គង់ តែត្រូវមួយដៃរបស់គេបន្ថែម សន្លប់តែម្តង ចំណែកការប្រកួតលើកនេះ ខ្ញុំមានទំនុកចិត្តឈ្នះលើថៃ ៨០ ភាគរយគឺខ្ញុំប្រឹងវ៉ៃយកឈ្នះឲ្យទាល់តែបាន បន្ទាប់ពីខំហ្វឹកហាត់បានល្អជាមួយលោកគ្រូ អេ ភូថង»។
លោក ថៃ អ៊ូ អ្នកនាំកីឡាករថៃមកប្រកួតបានប្រាប់ថាកីឡាករថៃ កាថាប់វស៊ុង មិនធ្លាប់មកប្រកួតស្រុកខ្មែរទេ ប៉ុន្តែប្រវត្តិប្រកួតរបស់គេល្អ និងមានក្បាច់ជង្គង់ល្អ។ លោកបាននិយាយថា៖ «ពួកគេជំនាញជង្គង់ វ៉ៃក្បាច់ល្អដូចគ្នា ហើយខ្ញុំគិតថា ស៊ីសងពេលប្រកួតជាក់ស្តែងនៅលើកម្លាំងចំនួន ៥ ទឹក បើអ្នកណាកម្លាំងថេរល្អគឺឈ្នះ។ ទោះជាយ៉ាងណាតាមខ្ញុំពិនិត្យមើល បាង កាយ៉ាក សព្វថ្ងៃអាចខ្សោយជាងលើកមុនៗ ហើយការខកខានប្រកួតយូរក៏លំបាកយកឈ្នះដៃគូដែរ»។
ចំណែកលោក ហេង ប៊ុនឃីម គ្រូប្រដាល់គុនខ្មែរម្នាក់វិភាគថា៖ «ខ្ញុំគិតថា កីឡាករ បាងកាយ៉ាក អាចលំបាកឈ្នះដោយបញ្ហាកម្លាំងនេះឯង ព្រោះខ្ញុំសង្កេតកាលពីប្រកួតនៅសប្តាហ៍មុន ដូចជាកម្លាំងឆាប់ស្រុតចុះជាងមុន។ ទោះបីជាយ៉ាងណា ខ្ញុំមិនហ៊ានថាទេ ព្រោះកីឡាករថៃនោះវាទំនងដូចជាខ្សោយមុខ បើយើងវ៉ៃមុខឲ្យច្រើនមានប្រៀបជាងក៏ថាបាន»៕