ប៉ារីស៖ ការបំបាក់អ៊ុយក្រែន ៧-១ របស់បារាំង ជាការប្រកួតមិត្តភាពល្អបំផុតនៅអឺរ៉ុបកាលពីថ្ងៃពុធ ខណៈដែលអេស្ប៉ាញស្មើនៅទីក្រុងលីសបោន ហើយតួកគីមានមោទនភាពជាមួយនឹងគ្រាប់បាល់ចុងម៉ោង ដែលបំប៉ោងសំណាញ់ទីអាល្លឺម៉ង់នៅក្រុង Cologne។
នៅឯកីឡដ្ឋានជាតិ Stade de France របស់បារាំង គឺកីឡាករយុវជន Eduardo Camavinga និងកីឡាករចាស់វស្សា Olivier Giroud ជួយឱ្យក្រុមរបស់លោក Didier Deschamps បង្កើតការឈឺចាប់យ៉ាងខ្លាំងទៅលើក្រុមអ៊ុយក្រែន ដែលរងគ្រោះដោយសារតែជំងឺកូវីដ ១៩។
Camavinga វ័យ ១៧ ឆ្នាំ ធ្វើឱ្យខ្លួនឯងល្បីល្បាញក្នុងការក្លាយជាកីឡាករវ័យក្មេងបំផុតស៊ុតបញ្ចូលទីឱ្យក្រុមមាន់គក ក្នុងរយៈពេលជាង ១ សតវត្សរ៍ជាមួយនឹងការទាត់បករំលងក្បាលចូលទីយ៉ាងស្អាតនៅនាទីទី៩។
លោក Deschamps បានប្រគល់តួនាទីប្រធានក្រុមឱ្យ Giroud នៅថ្ងៃបង្ហាញខ្លួនលើកទី ១០០ របស់គេ ហើយខ្សែប្រយុទ្ធរបស់ក្រុម Chelsea តបមកវិញ ដោយការទម្លុះសំណាញ់ទី ២ គ្រាប់ នៅវគ្គទី១ ដែលធ្វើឱ្យគេមានគ្រាប់បាល់អន្តរជាតិចំនួន ៤២ គ្រាប់ហើយ ដោយតិចជាងអតីតកីឡាករ Thiery Henry តែ ៩ គ្រាប់ប៉ុណ្ណោះ។
«ល្អនោះគឺ ២ គ្រាប់បន្ថែមទៀត ហើយវាជារបស់មានតម្លៃណាស់មិនអ៊ីចឹង?»។ នេះជាសម្ដីរបស់លោក Deschamps ដែលបន្តទ្រាំជាមួយ Giroud ពេលក្រុមហាក់មានបញ្ហាខ្វះខ្សែប្រយុទ្ធឆ្នើមៗ។
Kylian Mbappe របស់ក្រុម Paris Saint-Germain Corentin Tolisso របស់ក្រុម Bayern Munich និង Antoine Griezmann របស់ក្រុម Barcelona សុទ្ធតែបានរួមចំណែកម្នាក់ ១ គ្រាប់បន្ថែមលើគ្រាប់ ដែលធ្វើឱ្យចូលទីខ្លួនឯងរបស់ Vitalii Mykolenko។
ក្នុងជំនួប Nations League នៅថ្ងៃអាទិត្យ បារាំងស្វាគមន៍ព័រទុយហ្គាល់ ដែលធ្វើឱ្យខ្លួនទឹកភ្នែកនៅ Stade de France នេះ កាលពីប្រកួត Euro 2016 វគ្គផ្ដាច់ព្រ័ត្រ ខណៈក្រុមរបស់លោក Fernando Santos ប្រកួតកម្ដៅសាច់ដុំជាមួយក្រុមអេស្ប៉ាញ បញ្ចប់ត្រឹម ០-០។
កីឡាករ Cristiano Ronaldo និង Renato Sanchez សំណាងមិនល្អដូចគ្នា ដោយការស៊ុតបាល់បុករបារទី ខណៈក្រុមម្ចាស់ផ្ទះគួរឈ្នះក្នុងម៉ោងបន្ថែមបង្គ្រប់តែខ្សែប្រយុទ្ធ Joao Felix ធ្វើមិនបានល្អ។ អេស្ប៉ាញលេងល្អជាង នៅដើមតង់នៃការប្រកួត នាកីឡដ្ឋាន Jose Alvalade ហើយការពារបានរឹងមាំផងដែរ។
គ្រូបង្វឹករបស់ក្រុមអេស្ប៉ាញ លោក Luis Enrique និយាយថា៖ «ខ្ញុំគិតថា យើងល្អជាងព័រទុយហ្គាល់។ មែន ពួកគេស៊ុតបុករបារទី ២ ដង និងម្ដងទៀត ត្រូវអ្នកចាំទី Kepa Arrizabalaga រារាំង ប៉ុន្តែយើងក៏មានឱកាសល្អៗច្រើនដូចគ្នាដែរ»។
រីឯលោកគ្រូបង្វឹក Joachim Loew របស់អាល្លឺម៉ង់ រអ៊ូរទាំនឹងកូនក្រុម ដោយសារមិនអាចបិទតួកគីនៅចុងម៉ោង ដែលនាំឱ្យស្មើគ្នា ៣-៣ ទាំងដែលខ្លួន នាំមុខម្ដងហើយម្ដងទៀត។
លោក Loew ប្រាប់ថា៖ «ខ្ញុំខកចិត្ត និងមួម៉ៅណាស់។ បញ្ហា កើតឡើងដដែលៗបែបនេះ ដូចនៅប្រកួតផ្សេងៗមានមក ១ រយៈហើយ»៕ AFP/VN