ក្រុងប៉ារីស៖ កីឡដ្ឋានបាល់ទាត់នៅបារាំងនឹងបើកឲ្យមានអ្នកគាំទ្រវិញ នៅថ្ងៃទី ១១ ខែកក្កដា ខណៈប្រទេសនៅតំបន់អឺរ៉ុបមួយនេះ បន្តការបន្ធូរបន្ថយវិធានការ ដែលបានដាក់ចេញ ដើម្បីទប់ស្កាត់ការរីករាលដាលជំងឺកូវីដ ១៩។ នេះបើតាមការប្រកាសរបស់រដ្ឋាភិបាលកាលពីថ្ងៃសៅរ៍ ចុងសប្ដាហ៍។
តែយ៉ាងណា អ្នកគាំទ្រចំនួនច្រើនបំផុតត្រឹម ៥ ០០០ នាក់ប៉ុណ្ណោះ ដែលនឹងត្រូវអនុញ្ញាតឲ្យចូលក្នុងកីឡដ្ឋាន ហើយនឹងអាចត្រូវបន្ធូរបន្ថយជាងនេះ នៅរដូវក្ដៅ ពេលរដូវកាលថ្មី ដែលគ្រោងនឹងចាប់ផ្ដើមដំណើរការនាថ្ងៃទី ២២ ខែសីហា។
ដូច្នេះការប្រកួតដណ្ដើមពាន French Cup និង League Cup វគ្គផ្ដាច់ព្រ័ត្រ ឥឡូវនេះ អាចមានទស្សនិកជនហើយ ហើយអ្នកគាំទ្រ ក៏នឹងអាចមើលក្រុមរបស់ខ្លួនលេងកម្ដៅសាច់ដុំ មុនរដូវកាលថ្មីដែរ។
សេចក្ដីប្រកាសនោះ ឲ្យដឹងថា៖ «ការពិនិត្យឡើងវិញបន្ថែមទៀតនូវស្ថានភាពរោគរាតត្បាតជាតិ នឹងត្រូវធ្វើនៅពាក់កណ្តាលខែកក្កដា ដើម្បីសម្រេចថា តើការបន្ធូរបន្ថយ អាចធ្វើទៅបាន ឬទេ សម្រាប់ឆមាសទី២ ក្នុងខែសីហា។ យោងតាមការវាយតម្លៃថ្មីនៃស្ថានភាពរាតត្បាតការចាប់ផ្តើមឆ្នាំសិក្សាថ្មី អាចត្រូវបានសម្គាល់ដោយការបន្ធូរបន្ថយថែមទៀតនៃការរឹតបន្តឹង»។
លីកលំដាប់កំពូលផ្សេងៗ នៅអឺរ៉ុប ដូចជាក្របខ័ណ្ឌ Bundesliga អាល្លឺម៉ង់, La Liga អេស្ប៉ាញ, Premier League អង់គ្លេស និង Serie A របស់ប្រទេសអ៊ីតាលី សុទ្ធតែបានចាប់ផ្ដើមការប្រកួតប្រជែងវិញ តែប្រទេសបារាំង សម្រេចបញ្ចប់ក្របខ័ណ្ឌ Ligue 1 រដូវកាល ២០១៩-២០២០ ជាផ្លូវការកាលពីថ្ងៃទី ៣០ ខែមេសា។
ក្រុម Paris St Germain គឺម្ចាស់ជើងឯក ក្រោយគណៈគ្រប់គ្រងជ្រើសយកវិធីនេះ ខណៈការធ្វើបែបហ្នឹងនាំឲ្យលីកកំពូលមួយនេះ ក្លាយជាលីកដ៏ល្បីតែមួយគត់របស់អឺរ៉ុប ដែលរំសាយរដូវកាលរបស់ខ្លួនដោយសារតែវីរុសកូរ៉ូណា៕ AFP/VN