ក្រុងប៉ារីស៖ ក្រុមជើងឯកពិភពលោកបារាំង និងអាល្លឺម៉ង់ ទទួលបានលទ្ធផលជាទីគាប់ចិត្តដូចគ្នា សម្រាប់ការប្រកួតក្នុងកម្មវិធី UEFA Nations League កាលពីថ្ងៃសៅរ៍ ក្រោយពេលក្រុមទាំង ២ បានយកឈ្នះលើគូប្រកួតរៀងៗខ្លួននោះ។
ខ្សែបម្រើ N''Golo Kante របស់ក្រុមតោខៀវ Chelsea ទើបតែអាចស៊ុតគ្រាប់ទី ២ របស់ខ្លួនឱ្យក្រុមជម្រើសជាតិ តែវាជាគ្រាប់ ដែលជួយឱ្យបារាំងឈ្នះក្រុមជើងឯកអឺរ៉ុបព័រទុយហ្គាល់ ១-០ ក្នុងអំឡុងការប្រកួតនៅឯក្រុងលីសបោន ហើយជ័យជម្នះនេះ បានធានាឱ្យក្រុមរបស់លោក Didier Deschamps ជាក្រុមដំបូងគេ ដែលបានកក់កៅអីនៅវគ្គចុងក្រោយនាឆ្នាំ ២០២១។
ក្រុមបារាំងពេលនេះ កំពុងនាំក្រុមព័រទុយហ្គាល់របស់កីឡាករ Cristiano Ronaldo ៣ ពិន្ទុ ប៉ុណ្ណោះ មុនការប្រកួតលើកចុងក្រោយជាមួយក្រុមស៊ុយអែត នាក្រុងប៉ារីស នៅថ្ងៃអង្គារ តែពួកគេទទួលបាននូវការរ៉ាប់រងនូវចំណាត់ថ្នាក់លេខ ១ ក្នុងក្រុមទី ៣ លីគ A ដោយសារមានកំណត់ត្រាជួបគ្នា ឬប្រកួតគ្នា (head-to-head) ល្អជាង។
«ជារឿងប្រសើរណាស់ ដែលឃើញកូនក្រុមដណ្ដើមជ័យជម្នះបាន ហើយវាសមតែអ៊ីចឹង។ យើងបានបំពេញតាមគោលបំណងរបស់យើងហើយ គឺការបញ្ចប់នៅលេខ ១»។ នេះជាសម្ដីរបស់គ្រូបង្វឹកក្រុមបារាំងលោក Deschamps ក្រោយឈ្នះលើ ព័រទុយ ហ្គាល់ ដែលបានលើកពានកម្មវិធី Nations League នេះ ដំបូងគេ នៅផ្ទះខ្លួនឯងក្នុងឆ្នាំ ២០១៩។
ចំណែកមិត្តរួមក្រុមរបស់ Kante ដែលប្រកបអាជីពនៅ Premier League អង់គ្លេសជាមួយគ្នា គឺខ្សែប្រយុទ្ធ Timo Werner ស៊ុតបញ្ចូលទីបាន ២ គ្រាប់ នៅថ្ងៃត្រឡប់មកកាន់កីឡដ្ឋាននៃក្រុមចាស់របស់ខ្លួន RB Leipzig លើកដំបូង ដោយគ្រាប់បាល់នោះ បានរួមចំណែកជួយឱ្យក្រុមអាល្លឺម៉ង់ ឈ្នះអ៊ុយក្រែន ៣-១។
ខ្សែប្រយុទ្ធកំពុងឡើងជើង Werner បានចំណាយពេល ៤ ឆ្នាំ នៅក្រុង Leipzig មុននឹងចាកចេញទៅក្រុងឡុងដ៍ តែរូបគេនៅតែលេចធ្លោដដែល ដូចបរិយាកាសពីមុនអ៊ីចឹង នាកីឡដ្ឋាន Red Bull Arena នេះ បើទោះជាមិនមានវត្តមានរបស់អ្នកគាំទ្រក៏ដោយចុះ។
ជាមួយជ័យជម្នះនេះ បានធ្វើឱ្យអាល្លឺម៉ង់ លេងអត់ចាញ់សោះឡើយក្នុងចំណោម ១២ ប្រកួតចុងក្រោយរបស់ខ្លួន ហើយឥឡូវនេះ ឡើងទៅឈរនៅកំពូលនៃគ្រុបទី៤ ដោយមាន ៩ ពិន្ទុ ពោលគឺមាន ១ ពិន្ទុ នាំមុខក្រុមលេខ ២ អេស្ប៉ាញ ខណៈទាំង ២ ក្រុម ត្រូវប្រឈមជាមួយគ្នា នៅក្រុង Sevilla នាថ្ងៃអង្គារ។
កីឡាករ Werner បាននិយាយប្រាប់ទូរទស្សន៍ ZDF ក្រោយការប្រកួតថា៖ «ខ្ញុំមានរយៈពេល ៤ ឆ្នាំ ដ៏ជោគជ័យនៅទីនេះ ហើយវាពិតជាអស្ចារ្យណាស់ ដែលត្រឡប់មកវិញ ហើយឈ្នះ»។
យ៉ាងណា សម្រាប់ប្រកួតនេះ ក្រុមអាល្លឺម៉ង់ ដែលដឹកនាំដោយលោក Joachim Loew មានការហត់នឿយបន្តិចដែរ ក្រោយត្រូវក្រុមភ្ញៀវ អ៊ុយក្រែន ធ្វើការនាំមុខមុនយ៉ាងលឿន នៅនាទីទី ១២ ដែលស៊ុតដោយ Roman Yaremchuk តែខ្សែបម្រើប្រយុទ្ធ Leroy Sane បានជួយឱ្យក្រុមម្ចាស់ផ្ទះ តាមស្មើវិញ នៅនាទីទី២៣។
Werner ជាអ្នកជួយឱ្យក្រុមអាល្លឺម៉ង់នាំមុខវិញម្ដង នៅនាទីទី៣៣ ហើយក្រោយមកក៏មានឱកាសស៊ុតគ្រាប់បាល់ទី២ នៅនាទីទី៦៤ ក៏ដូចជាគ្រាប់ជ័យជម្នះចុងក្រោយរបស់ក្រុមផងដែរ។ «យើងអត់មានកីឡាករសំខាន់ៗ ២-៣ នាក់ ដែលធ្វើឱ្យក្រុមយើងពិបាកក្នុងការរកឱ្យឃើញចង្វាក់នៃការលេង»។ នេះជាសម្ដីបន្ថែមរបស់កីឡាករវ័យ ២៤ ឆ្នាំ Werner ដែលបាននិយាយដល់អវត្តមានរបស់ខ្សែបម្រើ Toni Kroos ដោយសារជាប់ពិន័យ និងខ្សែបម្រើការពារ Joshua Kimmich ដោយសាររបួសជង្គង់។
ចំណែកគ្របង្វឹកក្រុមអាល្លឺម៉ង់ លោក Loew បាននិយាយថា៖ «យើងលេងដោយអត់មានយុទ្ធសាស្ត្រសោះនៅវគ្គទី១ យើងចាប់ផ្ដើមគ្រប់គ្រងការប្រកួតបាន ក្រោយសម្រាក ១៥ នាទី។ ជារួម យើងរីករាយជាមួយនឹងជ័យជម្នះនេះ»៕ AFP/VN