.jpg)
សកម្មភាពប្រកួតបើករដូវកាលថ្មីបាល់ទាត់សហគមន៍ កាលពីថ្ងៃអាទិត្យ។
ភ្នំពេញ៖ ការប្រកួតបាល់ទាត់សហគមន៍ រដូវកាលថ្មី ឆ្នាំ ២០១៩ ដែលមានលក្ខណៈតម្រង់ទិសឲ្យអត្តពលិកវ័យក្មេង ឈានទៅចាប់អាជីពរបស់អង្គការផ្កាយសមុទ្រ (ISF) បានចាប់ផ្តើមការប្រកួតហើយ ខណៈព្រឹត្តិការណ៍នេះ មានទ្រង់ទ្រាយធំជាងឆ្នាំមុនៗ ព្រោះការប្រកួតជម្រុះវិលជុំ ក្នុងសហគមន៍ មានចំនួនក្រុមចូលរួមកើនឡើងដល់ទៅ ១២ ក្រុម ដែលក្រុមទាំងនេះ មកពីសហគមន៍នៅជិតទីលាននៃមូលដ្ឋានរបស់ ISF ផ្ទាល់ គឺនៅឃុំរលួស ស្រុកកណ្តាលស្ទឹង ខេត្តកណ្តាល។
កញ្ញា រតនៈ ទេពី អ្នកសម្របសម្រួលកម្មវិធីនេះ បានប្រាប់ភ្នំពេញប៉ុស្តិ៍ថា៖ «កម្មវិធីបាល់ទាត់សហគមន៍នេះ បានប្រារព្ធធ្វើឡើងជារៀងរាល់ឆ្នាំ ដោយចាប់ផ្ដើមតាំងពីឆ្នាំ ២០១៧ មក ក្នុងគោលបំណងផ្ដល់ឱកាសឲ្យក្មេងៗ ជាកូនចៅប្រជាជន នៅក្នុងសហគមន៍ ដែលគ្មានលទ្ធភាពបានចូលរួមលេងក្នុងសកម្មភាពបាល់ទាត់នោះ បានចូលរួមប្រកួតប្រជែង ក្នុងលក្ខណៈស្តង់ដា និងតម្រង់ទិស សម្រាប់អាជីពរបស់ពួកគេ ហើយការប្រកួតនេះ ក៏ដើម្បីបង្កើតមិត្តភាព និងទទួលបាន ភាពសប្បាយរីករាយជាមួយគ្នាផងដែរ»។
តាម កញ្ញា ទេពី បានឲ្យដឹងទៀតថា៖ «ព្រឹត្តិការណ៍បានបើកការប្រកួតត់ជម្រុះវិលជុំជាផ្លូវការ កាលពីថ្ងៃអាទិត្យ និងមាន ១២ ក្រុមចូលរួម គឺកើនជាងពាក់កណ្តាល បើធៀបជាមួយឆ្នាំចាស់ ដោយយើងផ្តល់ជូនក្រុមទាំងអស់ដើម្បីឲ្យពួកគេដឹងថា ពួកគេមិនត្រូវបានគេរើសអើង និងមិនអើពើនោះទេ។ ផ្ទុយពីនេះពួកគេត្រូវបានយកចិត្តទុកដាក់ខ្លាំងពីអង្គការផ្កាយសមុទ្រតែម្តង ហើយក្រុមក្មេងៗទាំងនេះ មកពីតំបន់ផ្សេងៗគ្នា នៅជុំវិញកីឡដ្ឋានរបស់អង្គការផ្កាយសមុទ្រ»។
ចំណែក លោក យិន សាមឌី ប្រធានគ្រប់គ្រងកីឡាបាល់ទាត់ អង្គការផ្កាយសមុទ្រ បានឲ្យដឹងថា ក្រុមបាលទាត់ចំនួន ១២ នេះ មានមកពីក្រុម Tiger Red ក្រុម ឥទ្រ្ទីតូច ក្រុមសេះសដើមរីស ក្រុមអធិរាជថ្ម ក្រុមបាគូ ក្រុមកីឡាករគថ្លង់ DDP ក្រុមមហាមិត្តវិទ្យាល័យ ក្រុមត្រពាំងវែង ក្រុមកីឡាដើម្បីសុខភាព ក្រុមយុវជនសង្កាត់ទៀន ក្រុមសមុទ្រខៀវ និងក្រុមខ្លាហោះ។
លោក សាមឌី បានបន្ថែមថា៖ «ក្រុមទាំង ១២ នេះ នឹងធ្វើការប្រកួតជម្រុះវិលជុំក្នុងរយៈពេល ៨ សប្ដាហ៍ ដើម្បីប្រជែងយកចំណាត់ថ្នាក់ និងទទួលពាន ដោយគ្មានទឹកប្រាក់រង្វាន់នោះទេ។ ជាមួយគ្នានេះអង្គការផ្កាយសមុទ្រ ជួយរ៉ាប់រងនូវការហូបចុក ព្រមទាំងផ្តល់នូវសម្ភារកីឡា មានខោអាវ និងសម្ភារសិក្សាដើម្បីជាការលើកទឹកចិត្ត»៕
