.jpg)
ក្រុមវិសាខា ដែលជាសមាជិកក្រុមជម្រើសជាតិ ពេលលើកពានក្នុងស្រុកកន្លងមក។
ភ្នំពេញ៖ សហព័ន្ធកីឡាបាល់ទះកម្ពុជា ត្រៀមបញ្ជូនគ្រូបង្វឹក និងកីឡាករក្រុមជម្រើសជាតិទៅធ្វើការហ្វឹកហាត់នៅប្រទេសចិន រយៈពេលវែង នាចុងខែកក្កដា ឆ្នាំ ២០២១ នេះ ពោលគឺឱ្យបានមុនការប្រកួតស៊ីហ្គេមលើកទី៣១ នៅទីក្រុងហាណូយ ប្រទេសវៀតណាម នាខែវិច្ឆិកា ឆ្នាំ ២០២១ ហើយគម្រោងការហ្វឹកហាត់របស់សហព័ន្ធនៅក្រៅប្រទេសនេះ ស្របទៅនឹងចក្ខុវិស័យរបស់ គណៈកម្មាធិការជាតិអូឡាំពិកកម្ពុជា (NOCC) និង CAMSOC ក្នុងការស្វែងរកការហ្វឹកហាត់ជាលក្ខណៈអន្តរជាតិ ដើម្បីពង្រឹងគុណភាពបច្ចេកទេសឱ្យល្អ។
លោក បឹង គីមតោ អនុប្រធាននាយកដ្ឋានអប់រំកាយ និងកីឡា និងជាអគ្គលេខាធិការសហព័ន្ធកីឡាបាល់ទះកម្ពុជាបានប្រាប់ថា៖ «សហព័ន្ធនឹងរៀបចំបញ្ជូនក្រុមជម្រើសជាតិកម្ពុជាដែលមានគ្រូបង្វឹក និងកីឡាករ ១ ក្រុម ទៅហាត់នៅប្រទេសចិន ហើយការទៅហ្វឹកហាត់នៅចុងខែកក្កដា ឆ្នាំ២០២១ នៅមិនទាន់ដឹងថាយ៉ាងណានៅឡើយទេ ព្រោះយើងរង់ចាំការសម្របសម្រួលជាមួយ CAMSOC និងក្រសួងអប់រំ យុវជន និងកីឡា»។
លោកបន្តថា ចំពោះគម្រោងទៅហាត់ហ្វឹកហ្វឺននៅប្រទេសចិន នេះ មានរយៈពេល ៩០ ថ្ងៃ គឺហ្វឹកហាត់ឱ្យមានគុណភាពមុននឹងចូលរួមប្រកួតស៊ីហ្គេមលើកទី៣១ ឆ្នាំ ២០២១ នៅទីក្រុងហាណូយ ប្រទេសវៀតណាម ហើយមុននឹងចេញទៅហ្វឹកហាត់នេះ កីឡាករត្រូវបានបង្រៀននូវភាសាចិនថ្នាក់មូលដ្ឋានទាក់ទងទៅនឹងពាក្យប្រើជាបច្ចេកទេស ពេលហ្វឹកហាត់ និងប្រកួត។
អគ្គលេខាធិការរូបនេះ បានបន្ថែមថា៖ «តាមផែនការយុទ្ធសាស្ត្រ គឺក្រោយពេលប្រកួតនៅស៊ីហ្គេមនៅវៀតណាមចប់ យើងត្រូវសម្រួចទៅលើការហ្វឹកហាត់បន្ថែម ក្នុងរយៈពេលវែងទៀតតាមកិច្ចសហប្រតិបត្តិការរវាងកម្ពុជា និងប្រទេសចិន ដើម្បីគោលដៅធំឆ្ពោះទៅកាន់ការប្រកួតស៊ីហ្គេមលើកទី៣២ ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ»។
តាមរយៈការសម្ភាសជាមួយមន្ត្រីបច្ចេកទេសបានឱ្យដឹងថា ក្រុមជម្រើសជាតិបាល់ទះកម្ពុជា បច្ចុប្បន្នកំពុងហ្វឹកហាត់នៅក្លិបវិសាខាក្នុងលក្ខណៈជាក្រុមដោយមិនអាចហាត់ជាលក្ខណៈឯកជនបានដូចប្រភេទកីឡាករផ្សេងៗបានទេ ប៉ុន្តែយើងរក្សាអនាម័យ និងប្រុងប្រយ័ត្នការពារយ៉ាងល្អ ដើម្បីការពារការឆ្លងជំងឺកូវីដ ១៩។
សម្រាប់ឆ្នាំ ២០២១ នេះ កីឡាបាល់ទះកម្ពុជាមានជម្រើសជាតិចំនួន ១៩ នាក់ ដែលពួកគេសុទ្ធតែកីឡាកររបស់ក្លិបវិសាខា ក្នុងនោះមាន សួន ចាន់ណារ៉ូ, គួន ម៉ុម, សឿន ហេង, អាន សុខហេង, ឡាង រាសីកែវ, មី សុផណ្ណា, ឈាង ភារដ្ឋ, ពិន សារុន, វឿន វាសនា, ផុល រតនៈ, គង់ ពិសិដ្ឋ, ខឹម សុវណ្ណារ៉ា, ម៉ន សុខនាង, មី រស្មី, មួន និមល, ផល ផានីត, ភុំ ចាន់តុលា, ឈីម ឈាងនី និង សៅ តាន។ សហព័ន្ធមួយនេះ មានលោកនាយឧត្តមសេនីយ៍ នេត សាវឿន ហើយកម្រិតបច្ចេកទេសក្នុងតំបន់អាស៊ីអាគ្នេយ៍ គឺបាល់ទះកម្ពុជាមានលំដាប់ទី៥ មិនមែននៅបាតតារាងនោះឡើយ៕
