.jpg)
សកម្មភាពប្រកួតក្របខ័ណ្ឌ 2-Star World Tour រវាងក្រុមក្រិក និងក្រុមអាមេរិកនៅមណ្ឌលភ្នំពេញ។ ណន
ភ្នំពេញ: ព្រឹត្តិការណ៍ប្រកួតកីឡាបាល់ទះឆ្នេរខ្សាច់អន្តរជាតិស្រាបៀរអាន់ឆ័រ លើកទី ២ នឹងប្រកួតបញ្ចប់មណ្ឌលចុងក្រោយក្របខ័ណ្ឌ 1-Star World Tour ផ្នែកនារីនៅខេត្តបាត់ដំបងពីថ្ងៃទី ៤ ដល់ទី ៧ ខែមេសានេះដើម្បីរកក្រុមម្ចាស់ជយលាភីឡើងទៅប្រកួតវគ្គផ្តាច់ព្រ័ត្រក្នុងក្របខ័ណ្ឌ FIVB World Tour Olympics 2020 ដើម្បីឈានទៅរកការឈ្នះជើងឯកពិភពលោក។
មន្ត្រីគណៈកម្មការរៀបចំការប្រកួតរបស់សហព័ន្ធកីឡាបាល់ទះកម្ពុជាបានប្រាប់កាលពីល្ងាចថ្ងៃអង្គារថាក្រុមប្រទេសផ្សេងៗដែលបានចូលរួមក្នុងការប្រកួតនៅខេត្តបាត់ដំបងនេះ សុទ្ធតែបានចុះឈ្មោះតាមវេបសាយផ្លូវការរបស់សហព័ន្ធកីឡាបាល់ទះពិភពលោក អ៊ីចឹងចំនួនក្រុមចូលរួមលុះដល់ថ្ងៃប្រកួតទើបដឹងច្បាស់។
យ៉ាងណាក៏ដោយមន្ត្រីគណៈកម្មការដដែលនេះបានបញ្ជាក់ថា៖ «ក្រុមចុះឈ្មោះចូលរួមការប្រកួតក្របខ័ណ្ឌ 1-Star World Tour ផ្នែកនារីនេះមាន ២ ដាច់ដោយឡែកពីគ្នាគឺក្រុមប្រកួតជម្រុះ និងក្រុមប្រកួតវិលជុំ។ មានន័យថា ក្រុមជម្រុះពួកគេនឹងប្រកួតជម្រុះរហូតដល់ឃើញក្រុមឈ្នះចុងក្រោយចំនួន ៤ ដើម្បីយកមកដាក់ឲ្យលេងនៅវគ្គ ១៦ ក្រុមជាមួយក្រុមវិលជុំ ហើយវគ្គ ១៦ ក្រុមនេះចែកការប្រកួតទៅតាមពូលរួចយកក្រុមឈ្នះតាមពូលនីមួយៗ ឡើងទៅប្រកួតវគ្គ ៨ ក្រុមរួចបន្តទៅវគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្ររកក្រុមម្ចាស់ជើងឯកតែម្តង»។
ជាមួយនឹងការប្រកួតប្រជែងនេះគណៈកម្មការបានកំណត់យកក្រុមទទួលបានចំណាត់ថ្នាក់លេខ ១ លេខ ២ និងលេខ ៣ នៅតាមមណ្ឌលទាំង ៤ សម្រាប់ឡើងទៅប្រកួតវគ្គផ្តាច់ព្រ័ត្រក្នុងក្របខ័ណ្ឌ FIVB World Tour Olympics 2020 ដើម្បីឈានទៅរកក្រុមឈ្នះជើងឯកពិភពលោក ខណៈមណ្ឌលភ្នំពេញ មណ្ឌលខេត្តកំពង់ស្ពឺ និងមណ្ឌលខេត្តសៀមរាបបានបញ្ចប់ការប្រកួតហើយ។
តាមការប្រកួតនៅមណ្ឌលភ្នំពេញក្របខ័ណ្ឌ 2-Star World Tour ផ្នែកនារីកាលពីថ្ងៃទី ២១ ដល់ថ្ងៃទី ២៤ កុម្ភៈ កីឡាការិនី Vasiliki Arvaniti និង Penny Karagkouni របស់ប្រទេសក្រិកបានក្លាយជាម្ចាស់ជើងឯក ក្រោយយកឈ្នះក្រុមអាមេរិកវគ្គផ្តាច់ព្រ័ត្រ ហើយក្រុមជប៉ុនបានលេខ ៣។
ចំណែកការប្រកួត 2-Star World Tour ផ្នែកបុរសនៅខេត្តកំពង់ស្ពឺពីថ្ងៃទី ៩ ដល់ទី ១០ ខែមីនាកីឡាកររុស្ស៊ី Sivollap និង Yarzutkin បានយកឈ្នះក្រុមអាហ្វ្រិកខាងត្បូងវគ្គផ្តាច់ព្រ័ត្រយកលេខ ១ ខណៈលេខ ៣ បានទៅក្រុមដាណឺម៉ាក។
ដោយឡែកការប្រកួតក្របខ័ណ្ឌ 1-Star World Tour ផ្នែកបុរសនៅខេត្តសៀមរាបកាលពីថ្ងៃទី ២២ ដល់ទី ២៤ ខែមីនាកីឡាករ Dresslor និងកីឡាករ Huber របស់ប្រទេសអូទ្រីសបានក្លាយជាម្ចាស់ជើងឯក ក្រោយឈ្នះក្រុមកីឡាកររបស់របស់ប្រទេសរុស្ស៊ីនៅវគ្គផ្តាច់ព្រ័ត្រ ហើយលេខ ៣ បានតៅក្រុមស្វ៊ីស៕
