ភ្នំពេញៈ សិក្ខាកាមជាគ្រូបង្វឹក និងជាកីឡាករបាល់ទះ ៣០ នាក់ បាននិងកំពុងសិក្សាទាំងទ្រឹស្តី និងការអនុវត្តជាក់ស្តែង ជាមួយគ្រូជំនាញបាល់ទះ មកពីប្រទេស បង់ក្លាដែស លោក Shameen-Al-Mamun នៅក្នុងវគ្គសិក្សាសាមគ្គី ស្តីពីគ្រូបង្វឹកកីឡាបាល់ទះ ដែលបានចាប់ផ្តើមកាលពីព្រឹកថ្ងៃពុធ នៅទីស្នាក់ការ NOCC នឹងបញ្ចប់ នៅថ្ងៃទី ១ ខែ កញ្ញា។
លោក បឹង គឹមតោ អគ្គលេខាធិការសហព័ន្ធកីឡាបាល់ទះកម្ពុជា បានចាត់ទុកវគ្គសិក្សានេះ ថាជាការបង្កើតនូវធនធានឲ្យកាន់តែសម្បូរបែប ដើម្បីពង្រីកសក្តានុពលវិស័យកីឡាបាល់ទះកម្ពុជា ត្រៀមឆ្ពោះទៅកាន់ការប្រកួតស៊ីហ្គេម លើកទី៣២ ឆ្នាំ ២០២៣ ដែលកម្ពុជា ត្រូវធ្វើជាម្ចាស់ផ្ទះ។
លោកនិយាយថា៖ «វគ្គសិក្សា គ្រូបង្វឹកកីឡាបាល់ទះនេះ វាស្ថិតក្នុងផែនការយុទ្ធសាស្រ្តរបស់សហព័ន្ធ ដើម្បីបណ្តុះបណ្តាលធនធនមនុស្សឲ្យបានកាន់តែច្រើនទៅតាមកំណែទម្រង់ស៊ីជម្រៅរបស់ NOCC និងក្រសួងអប់រំ យុវជន និងកីឡា ក្នុងការត្រៀមខ្លួនឆ្ពោះទៅស៊ីហ្គេម ឆ្នាំ ២០២៣។
តាមលោក បឹង គឹមតោ បានឲ្យដឹងថា គិតមកដល់ពេលនេះ សហព័ន្ធកីឡាបាល់ទះកម្ពុជា ធ្លាប់បានបើកវគ្គសិក្សាបែបនេះចំនួន ៦ ដងហើយ គឺលើកទី១ នៅឆ្នាំ ១៩៩៦ ទី២ ឆ្នាំ ២០០២ ទី៣ ឆ្នាំ ២០០៦ ទី៤ ឆ្នាំ ២០១០ ទី៥ ឆ្នាំ ២០១៤ និងលើកទី៦ នៅឆ្នាំ ២០១៩ នេះ គឺវគ្គគ្រូបង្វឹកកីឡាបាល់ទះកម្រិត ១ នេះឯង ដែលមានសិក្ខាកាមចូលរួម ៣០ នាក់ មកពីតាមបណ្តាក្លិប ខេត្ត-រាជធានីចំនួន ១២ ហើយវគ្គនេះមានរយៈពេលតែ ៥ ថ្ងៃទេ។
អគ្គលេខាធិការរូបនេះ បានបន្ថែមថា៖ «បើទោះបីជានេះជាវគ្គសិក្សាកម្រិត ១ ប៉ុន្តែនេះជាវគ្គសំខាន់ណាស់ ព្រោះនូវរាល់ការងារ និងបទបញ្ជាជាអន្តរជាតិ តែងតែកែប្រែ អ៊ីចឹងវគ្គនេះយើងមានការសិក្សាទាំងទៅលើទ្រឹស្តី និងការអនុវត្តជាក់ស្តែង ហេតុនេះសូមសិក្ខាកាមទាំងអស់ ខិតខំក្រេបជញ្ជក់យកចំណេះដឹងពីគ្រូឧទ្ទេសរបស់យើង ដើម្បីយើងអាចយកចំណេះដឹងនេះ ទៅបណ្តុះបណ្តាលនៅតាមក្លិប និងខេត្ត ក្នុងការរកអត្តពលិកមានសមត្ថភាព ត្រៀមការប្រកួតស៊ីហ្គេម ឆ្នាំ ២០២៣ និងការប្រកួតអន្តរជាតិផ្សេងៗទៀត»។
ចំណែកលោក Shameem-Al-Mamun គ្រូឧទ្ទេសបាននិយាយនៅចំពោះមុខសិក្ខាកាមទាំង ៣០ នាក់ ថា៖ «វគ្គនេះសំខាន់ណាស់ ហេតុនេះសូមយកចិត្តទុកដាក់ទាំងអស់គ្នា ហើយខ្ញុំនឹងខិតខំឲ្យអស់ពីសមត្ថភាព ក្នុងការចែករំលែកចំណេះដឹង និងបទពិសោធ ដែលខ្ញុំមានទៅឲ្យអ្នកទាំងអស់គ្នា ដើម្បីឲ្យអ្នកទាំងអស់គ្នា អាចអភិវឌ្ឍខ្លួនទៅជាគ្រូបង្វឹកកម្រិតស្តងដាអន្តរជាតិ និងមានសមត្ថភាព ក្នុងការបណ្តុះបណ្តាលធនធានអត្តពលិកកីឡាបាល់ទះ ឲ្យមានកាន់តែសម្បូរបែបនៅក្នុងប្រទេស កម្ពុជា»៕