.jpg)
ក្រុមម្ចាស់ជយលាភីទាំង ២ ភេទ បានអបអរនូវជ័យជម្នះរបស់ពួកគេ ក្នុងពិធីបិទការប្រកួត។ ណន
ភ្នំពេញៈ ការប្រកួតកីឡាបាល់បោះជ្រើសរើសជើងឯកថ្នាក់ជាតិ ប្រចាំឆ្នាំ ២០១៨ បានបញ្ចប់ជាផ្លូវការហើយ ហើយក្រុម Blue Technology និងក្រុមសហភាពសហព័ន្ធយុវជនកម្ពុជាខេត្តសៀមរាប បានចែកគ្នាលើកពាន នៃការប្រកួតកម្រិតអាយុក្រោម ២៣ ឆ្នាំ (U23) ទាំង ២ ភេទនៅឆ្នាំនេះ ខណៈក្រុមក្រសួងសេដ្ឋកិច្ច និងហិរញ្ញវត្ថុ បានត្រឹមលេខ ២ ទាំងផ្នែកបុរស និងផ្នែកនារី។
សម្រាប់ការប្រកួតប្រជែង នៅមជ្ឈមណ្ឌលជាតិហ្វឹកហ្វឺនកីឡា នៃពហុកីឡដ្ឋានជាតិ ដែលបានចាប់ផ្តើមកាលពីថ្ងៃអង្គារ និងបានបញ្ចប់ កាលពីល្ងាចថ្ងៃសៅរ៍កន្លងមកនេះ មានក្រុមចូលរួមចំនួន ១៣ (ស្រី ៥ ក្រុម) លេងតំណាងឲ្យក្លិប និងស្ថាប័នចំនួន ១១ ប៉ុន្តែមានតែក្លិប និងស្ថាប័នចំនួន ៤ ប៉ុណ្ណោះ ដែលដណ្តើមបានជយលាភីមេដាយមាស ប្រាក់ និងសំរឹទ្ធ។
ចំពោះការប្រកួតផ្នែកនារីទាំង ៥ ក្រុម ដែលតម្រូវឲ្យប្រកួតវិលជុំ រួចកំណត់យកក្រុមមានពិន្ទុខ្ពស់ជាងគេ ជាក្រុមម្ចាស់ជើងឯកនោះ គឺក្រុម Blue Technology ធ្វើបានល្អ និងមានពិន្ទុខ្ពស់ជាងគេ ដើម្បីទទួលបានលេខ ១ ឯក្រុមក្រសួងសេដ្ឋកិច្ច និងហិរញ្ញវត្ថុ បានលេខ ២ ដោយសារពួកគេបានចាញ់ Blue Technology ជាមួយពិន្ទុ ៥៥-៤៨ ហើយលេខ ៣ បានទៅក្រុមសាកលវិទ្យាល័យអាស៊ីអឺរ៉ុប។
ចំណែកការប្រកួតផ្នែកបុរស ដោយមានការបែងចែកការប្រកួតជា ២ ពូលនោះ ក្រុមសហភាពសហព័ន្ធយុវជនកម្ពុជាខេត្តសៀមរាប និងក្រុមក្រសួងសេដ្ឋកិច្ច និងហិរញ្ញវត្ថុ បានទម្លាក់ សាកលវិទ្យាល័យអាស៊ីអឺរ៉ុប និងក្រុម Conquistador នៅវគ្គ ១/២ ផ្តាច់ព្រ័ត្រ ដើម្បីឡើងទៅជួបគ្នាវគ្គផ្តាច់ព្រ័ត្រ ដោយជាលទ្ធផលក្រុមខេត្តសៀមរាប បានយកឈ្នះជាមួយពិន្ទុ ៩៨-៥០ ដើម្បីលើកពាន ហើយក្រុមសាកលវិទ្យាល័យអាស៊ីអឺរ៉ុប បានយកឈ្នះក្រុម Conquistador ជាមួយពិន្ទុ ៦០-៣៣ ក្នុងការប្រកួតដណ្តើមយកលេខ ៣។
យ៉ាងណាក៏ដោយ តំណាងក្លិប និងស្ថាប័នទាំង ១១ ដែលបានបញ្ជូនអត្តពលិករបស់ខ្លួន មកចូលរួម នៅក្នុងការប្រកួតកីឡាបាល់បោះថ្នាក់ជាតិ ឆ្នាំ ២០១៨ នេះ សុទ្ធតែទទួលបានប័ណ្ណសរសើរពីសហព័ន្ធកីឡាបាល់បោះកម្ពុជាដូចគ្នា ខណៈលោក ប៉ុន សុខ ប្រធានមជ្ឈមណ្ឌលជាតិហ្វឹកហ្វឺនកីឡាបានចាត់ទុកការប្រកួតនេះថា ជាការលើកស្ទួយកីឡាបាល់បោះ និងអភិវឌ្ឍកីឡាបាល់បោះកម្ពុជា ឲ្យកាន់តែមានការរីកចម្រើន ពិសេសជ្រើសរើសអត្តពលិកមានទេពកោសល្យចូលប្រមូលផ្តុំក្នុងក្រុមជម្រើសជាតិ។
លោក ប៉ុន សុខ បានថ្លែងក្នុងពិធីបិទការប្រកួតកាលពីថ្ងៃសៅរ៍នោះដែរថា៖ «ក្នុងនាមឲ្យឯកឧត្តម ស៊ាន បូរ៉ាត ជាប្រធានសហព័ន្ធកីឡាបាល់បោះកម្ពុជា និងរូបខ្ញុំផ្ទាល់ ខ្ញុំពិតជាមានអារម្មណ៍សប្បាយរីករាយ និងអបអរចំពោះក្រុមទាំងអស់ ដែលបានចូលរួម ហើយគោលបំណងរបស់សហព័ន្ធ ក្នុងការរៀបចំការប្រកួតយុវជនអាយុក្រោម ២៣ ឆ្នាំនេះ គឺដើម្បីត្រួតពិនិត្យជ្រើសរើសអត្តពលិកវ័យក្មេង ដែលមានទេពកោសល្យ យកមកហាត់ហ្វឹកហ្វឺន ដើម្បីក្លាយជាអត្តពលិកតំណាងឲ្យជាតិ ក្នុងការដណ្តើមមេដាយនៅលើឆាកអន្តរជាតិជូនជាតិ»៕
