.jpg)
គ្រូឧទ្ទេសកំពុងបង្ហាត់បង្ហាញសិក្ខាកាមដែលបានចូលរួមវគ្គបណ្ដុះបណ្ដាលនេះពីថ្ងៃសៅរ៍។ រូបថត សហការី
សៀមរាប៖ វគ្គសិក្សាអាជ្ញាកណ្តាល និងចៅក្រមកម្រិតអន្តរជាតិ ដែលរៀបចំឡើងដោយសហព័ន្ធគុនខ្មែរអន្តរជាតិ និងទទួលបានការគាំទ្រពីគណៈកម្មការរៀបចំស៊ីហ្គេមឆ្នាំ ២០២៣ ដែលហៅកាត់ថា Camsoc បានបិទបញ្ចប់កាលពីល្ងាចថ្ងៃសៅរ៍ ទី ១៦ ខែ វិច្ឆិកា ឆ្នាំ ២០១៩ នៅក្រុងសៀមរាបខេត្តសៀមរាបដោយមានសិក្ខាកាមចូលសិក្សាមកពី ១៨ ក្នុងអាស៊ីបូកអូស្ត្រាលី អាហ្វ្រិក និងប្រទេស កម្ពុជា មានសិក្ខាកាមចំនួន ៣៨ នាក់។
ជាមួយគ្នានេះសម្រាប់សិក្ខាកាមរបស់កម្ពុជាដែលបញ្ជូនពីសហព័ន្ធប្រដាល់គុនខ្មែរចំនួន ៥ នាក់ គីមានអាយុវ័យក្មេងមានបទពិសោធល្អព្រមទាំងចេះភាសាអន្តរជាតិ ខណៈដែលគ្រូឧទ្ទេសមិនប្រើភាសាខ្មែរនោះឡើយ។
ការសិក្សា និងអនុវត្តផ្ទាល់នៅលើទីលាន គឺត្រូវបានបង្ហាញនិងអនុវត្តគ្រប់ៗសិក្ខាកាមទាំងអស់ដែលបានចូលរួមមានរយៈពេល ២ ថ្ងៃគឺ ១៥ និងថ្ងៃទី ១៦ ខែ វិច្ឆិកា ឆ្នាំ ២០១៩ បន្ទាប់មកបានទទួលលិខិតបញ្ជាក់ផងដែរ។
លោកសាស្ត្រាចារ្យ Borwornchaiyos Mongkholdey គ្រូឧទ្ទេសមកពីសាកលវិទ្យាល័យគរុកោសល្យកីឡា រាជផាតខេត្តនគរបះធំបានឲ្យ ភ្នំពេញប៉ុស្តិ៍ដឹងថា៖ «ច្បាប់ និងលក្ខខណ្ឌប្រកួតរបស់កីឡាគុនខ្មែរ ឬមួយថៃដែលមានលក្ខណៈប្រហាក់ប្រហែលគ្នានេះ គឺមានភាពស្រដៀងគ្នាឬដូចគ្នានូវចំណុចខ្លះប៉ុន្តែនៅក្នុងការប្រកួតកម្រិតកីឡាអាស៊ាន គឺស៊ីហ្គេមនេះដែលមានប្រភេទកីឡាគេឲ្យឈ្មោះថា «មួយ» កំពុងតែនៅជាធរមានគឺយើងបង្វឹកឲ្យចៅក្រមអាជ្ញាកណ្តាលអនុវត្តក្នុងសិក្ខាសាលាពេលនេះ»។
លោកសាស្ត្រាចារ្យ Borwornchaiyos Mongkholdey គ្រូឧទ្ទេសបញ្ជាក់បន្ថែមថា៖ «ការបណ្តុះបណ្តាលនេះ គឺដើម្បីយកទៅប្រើប្រាស់ ឬអនុវត្តក្នុងព្រឹត្តិការណ៍កីឡាស៊ីហ្គេម ដែលកំពុងមានការប្រកួតប្តូរវេន ២ ឆ្នាំម្តងដូចសព្វថ្ងៃនេះ។ ទោះជាយ៉ាងណា សម្រាប់មូលដ្ឋានគ្រឹះរបស់ប្រទេសចំនួន ៣ ក្នុងអាស៊ាន គឺប្រទេស ឡាវ ហៅថាមួយឡាវ ប្រទេស ថៃ ហៅថា មួយថៃ និងប្រទេស កម្ពុជា ហៅថា ប្រដាល់គុនខ្មែរ នោះគឺមានច្បាប់ប្រកួតខុសគ្នាបន្តិចបន្តួច ប៉ុន្តែការសិក្សាវគ្គនេះជាច្បាប់ និងលក្ខខណ្ឌរួមសម្រាប់ប្រកួតកីឡាស៊ីហ្គេមយើង»។
លោក Nooramin សញ្ជាតិម៉ាឡេស៊ីដែលជាគ្រូឧទ្ទេស និងជាអគ្គលេខាធិការកីឡាមួយពិភពលោកបានប្រាប់ភ្នំពេញប៉ុស្តិ៍ថា៖ «អស់លោកដែលបានឆ្លងកាត់វគ្គបណ្តុះបណ្តាលនេះទទួលបានលិខិតបញ្ជាក់ ដើម្បីមានឱកាសចូលទៅបំពេញភារកិច្ចក្នុងកីឡាមួយអាស៊ានបាន»។
លោក យឺន ធារ៉ា និងលោក ម៉ា វីលី ជាសិក្ខាកាមរបស់កម្ពុជាបានប្រាប់ភ្នំពេញប៉ុស្តិ៍ថា៖ «ខ្ញុំសប្បាយចិត្តដែលបានចូលរៀនក្នុងវគ្គអាជ្ញាកណ្តាល និងចៅក្រមលំដាប់អន្តរជាតិនេះព្រោះជាវគ្គដែលផ្តល់ជូនពីសហព័ន្ធប្រដាល់គុនខ្មែរអន្តរជាតិលើកទី ១ នៅកម្ពុជា»។
លោក យឺន ធារ៉ា បន្ថែមថា តាមរយៈការសិក្សាកន្លងមក និងសិក្សាពេលនេះបើប្រៀបធៀបទៅមានលក្ខណៈខុសគ្នាបន្តិចបន្តួចទៅតាមប្រទេសពិសេសថៃ និងកម្ពុជា ប៉ុន្តែលក្ខខណ្ឌរួមដូចគ្នា គឺក្នុងការប្រកួតស៊ីហ្គេមតែម្តងគឺអនុវត្តដូចគ្នា។
លោក វ៉ាត់ ចំរើន ជាអគ្គលេខាធិការប្រដាល់គុនខ្មែរអន្តរជាតិបានឲ្យដឹងថា សិក្ខាសាលាវគ្គបណ្តុះបណ្តាលនេះបានការឧបត្ថម្ភពី Camsoc ក្នុងគម្រោងបណ្តុះបណ្តាលធនធានមន្ត្រីបច្ចេកទេស៕
