ក្រុងមេនឆេស្ទ័រ: Manchester United បានបណ្តេញអ្នកចាត់ការទូទៅលោក Jose Mourinho ចេញពីតំណែង ក្រោយពីក្រុមមួយនេះ បានទទួលលទ្ធផលយ៉ាងអន់បំផុតនៃរដូវកាលមួយ ក្នុងរយៈពេលជិត៣០ឆ្នាំ។ នេះបើយោងទៅតាមការប្រកាសរស់ក្លិបស្ថិតក្នុងក្របខ័ណ្ឌ Premier League មួយនេះ នៅថ្ងៃអង្គារនេះ។
ការប្រកួតលើកចុងក្រោយក្នុងនាមជាគ្រូបង្វឹករបស់បុរសសញ្ជាតិព័រទុយហ្គាល់វ័យ៥៥ឆ្នាំរូបនេះ បានកើតឡើងក្នុងពេលចាញ់ក្រុម Liverpool ក្នុងលទ្ធផល ៣-១ កាលពីថ្ងៃអាទិត្យ ដែលបានធ្វើឲ្យពួកគេដេញតាមពីក្រោយក្រុមកំពុងនាំមុខលើតារាងលីកមួយនេះដល់ទៅ១៩ពិន្ទុ។
វាបានក្លាយជាការចាប់ផ្តើមយ៉ាងអន់បំផុតរបស់ Man United ក្នុងក្របខ័ណ្ឌលីក ចាប់តាំងពីឆ្នាំ១៩៩០ ហើយសូម្បីតែមហិច្ឆតារបស់លោកក្នុងការឈានទៅកាន់ចំណាត់ថ្នាក់កំពូលទាំង ៤ និងការឈ្នះកៅអីទៅលេងក្នុងក្របខ័ណ្ឌ Champions League នៅរដូវកាលក្រោយ ក៏ស្ថិតក្នុងគ្រោះថ្នាក់ផងដែរ ខណៈដែលក្លិបនេះកំពុងតែដេញតាមពីក្រោយក្រុមឈរលេខ៤ដល់ទៅ១១ពិន្ទុ។
បើទោះបី Man United បានឈានទៅវគ្គ១៦ក្រុមចុងក្រោយនៃក្របខ័ណ្ឌ Champions League ដោយពួកគេត្រូវប៉ះជាមួយនឹងក្រុម Paris Saint-Germain ក៏ដោយ ប៉ុន្តែ ការទទួលបានលទ្ធផលចម្រុះ ជម្លោះផ្ទៃក្នុង និងការរិះគន់ផ្សេងទៅលើគោលនយោបាយដោះដូរកីឡាកររបស់ប្រឹក្សាក្លិប បានក្លាយជាកត្តាកាត់សេចក្តីក្នុងការសម្រេចចិត្តបណ្តេញលោកតែម្តង។
ក្លិបឲ្យបានដឹងក្នុងសេចក្តីថ្លែងការណ៍មួយថា៖ «Manchester United សូមប្រកាសថាអ្នកចាត់ការទូទៅលោក Jose Mourinho បានចាកចេញពីក្លិបជាផ្លូវការហើយ។ អ្នកចាត់ការទូទៅបណ្តោះអាសន្នម្នាក់នឹងត្រូវតែងតាំងរហូតដល់បញ្ចប់រដូវកាលបច្ចុប្បន្ន»៕ IS