ឡុងដ៍៖ ក្រុម Manchester United ត្រូវបានស្រោចស្រង់ដោយបាល់់ពិន័យ ១១ ម៉ែត្ររបស់ខ្សែបម្រើ Bruno Fernandes នៅនាទីទី១០០ ដើម្បីស្គាល់ជ័យជម្នះដំបូង ដោយឈ្នះក្រុមម្ចាស់ផ្ទះ Brighton ៣-២ ខណៈក្រុមចំណាយលុយច្រើន Chelsea តាមស្មើបានវិញ ក្រោយត្រូវក្រុមឡើងមកថ្មី West Brom នាំមុខ ៣-០ មុន សម្រាប់ការប្រកួតក្របខ័ណ្ឌ Premier League។
ក្រុម Man Utd បានស្ដារមុខមាត់ពីបរាជ័យ ៣-១ នៅផ្ទះខ្លួនឯង ដោយសារក្រុម Crystal Palace នៅសប្ដាហ៍មុន តែទម្រាំបានជ័យជម្នះនេះ ក៏ត្រូវពឹងលើសំណាងជាច្រើនលើកច្រើនសា ព្រោះត្រូវក្រុមម្ចាស់ផ្ទះធ្វើទុក្ខបុកម្នេញស្ទើររកពិន្ទុត្រឡប់ទៅផ្ទះវិញមិនបាន។
ក្រុម Brighton មានឱកាសស៊ុតម្ដងហើយម្ដងទៀត តែរាល់ការស៊ុតទាំងនោះ បើមិនបុកបង្គោល ក៏របារទីដែរ ដោយសរុបទៅ ៥ លើក តែយ៉ាងណាពួកគេមានគ្រាប់បាល់នាំមុខ ១-០ នៅនាទីទី៤០ ដែលជាការស៊ុតបាល់ប៉េណាល់ទីរបស់ខ្សែប្រយុទ្ធ Neal Maupay មុននឹងកីឡាករ Lewis Dunk ធ្វើចូលទីខ្លួនឯងនាំឱ្យក្រុមភ្ញៀវស្មើវិញនៅ ៣ នាទីបន្ទាប់។
នាទីទី៥៥ ខ្សែប្រយុទ្ធ Marcus Rashford ជួយឱ្យក្រុមលោក Ole Gunnar Solskjaer នាំមុខវិញម្ដង ដោយការញាក់ខ្សែការពារចុះឡើង មុននឹងស៊ុតបំប៉ោងសំណាញ់ទី។ ក្រុមទាំង ២ ទំនងបញ្ចប់ការប្រកួតត្រឹមពិន្ទុ ២-១ នេះ តែ Solly March បានតែតបញ្ជូលទីនៅនាទីទី ៩០+៤ ធ្វើឱ្យក្រុមម្ចាស់ផ្ទះតាមស្មើ ២-២។
ក្រុមរបស់លោក Graham Potter រីករាយនឹង ១ ពិន្ទុនេះ ពេលអាជ្ញាកណ្ដាល លោក Chris Kavanagh ដែលដំបូងឡើយផ្លុំកញ្ចែបញ្ចប់ការប្រកួត តែក្រោយពីទៅពិនិត្យវីដេអូជំនួយអាជ្ញាកណ្ដាល (VAR) ក៏សម្រេចផ្ដល់បាល់ពិន័យ ១១ ម៉ែត្រ ឱ្យ Man Utd ខណៈ Fernandes ទទួលភារៈជាមួយនឹងទំនុកចិត្ត ហើយជួយឱ្យក្រុមឈ្នះនៅនាទីទី៩០+១០។
ទោះក្រុមបាន ៣ ពិន្ទុ ក៏លោក Solskjaer យល់ថា ក្រុមមិនទាន់ល្អទេ ដោយអ្នកចាត់ការសញ្ជាតិន័រវែសវ័យ ៤៧ ឆ្នាំថា៖ «យើងគេចផុតពីការបាន ១ ពិន្ទុ។ យើងទំនងជាសមបានត្រឹម ១ ពិន្ទុ។ យើងមិនស័ក្ដិសមបានពិន្ទុច្រើនលើសពីនេះឡើយ»។
ងាកទៅ Chelsea ដែលគេរាយការណ៍ថា ចំណាយប្រាក់ទិញកីឡាករដល់ទៅ ២២០ លានផោន ($២៨០ លាន) ដើម្បីប្រជែងពានជាមួយ Liverpool និង Manchester City នោះ ហាក់ដូចជាមិនទាន់មានទម្រង់លេងប្រាកដប្រជានៅឡើយទេ នៅ ៣ ប្រកួតដំបូងរបស់ខ្លួន ហើយជាក់ស្ដែងពេលតទល់ជាមួយ West Brom ប៊ិះនឹងគ្មានសូម្បី ១ ពិន្ទុ ព្រោះត្រូវនាំមុខដល់ទៅ ៣-០ មុន។
កីឡាករ Callum Robinson របស់ក្រុមម្ចាស់ផ្ទះ មានឱកាសទម្លុះសំណាញ់ទីគ្រាប់ដំបូងនៅនាទីទី៤ មុនថែមគ្រាប់ទី២ នាទីទី២៥ ស្របពេលកីឡាករ Kyle Bartley ធ្វើបានសម្រេច ១ គ្រាប់នៅនាទីទី២៧ ដែលនេះជាគ្រាប់បាល់ជួយឱ្យ West Brom នាំមុខ ៣-០ មុនចប់តង់ទី ១។ ក្រោយសម្រាក ១៥ នាទី កូនក្រុមរបស់លោក Frank Lampard ព្យាយាមរកវិធីទម្លុះខ្សែការពាររបស់ក្រុមម្ចាស់ផ្ទះ ហើយក៏បានសម្រេច ដោយការស៊ុតបាន ៣ គ្រាប់ផ្ទួនៗវិញ នៅនាទីទី៥៥ ៧០ និង៩០+៣ ដោយកីឡាករ Mason Mount, Callum Hudson Odoi និង Tammy Abraham។
លោក Lampard បានប្រាប់យ៉ាងខ្លីថា៖ «យើងបានបាត់ ២ ពិន្ទុ។ អ្នកអាចមានពិន្ទុច្រើនតាមដែលអ្នកចង់បាន តែនៅពេលអ្នកបង្កើតកំហុសនោះនឹងធ្វើឱ្យខ្លួនឯងជួបនូវបញ្ហាដូចពេលនេះអ៊ីចឹង»៕ AFP/VN