.jpg)
ខ្សែប្រយុទ្ធ Ri Hyok Chol (ឆ្វេង) ពេលប្រជែងយកបាល់ជាមួយកីឡាករភ្នំពេញក្រោន។ ស្រេង ម៉េងស្រ៊ុន
ភ្នំពេញៈ ក្រុមម្ចាស់ជើងឯក បឹងកេត និងក្រុមជើងឯករង ២ រដូវកាលជាប់ៗគ្នា ក្រសួងការពារជាតិ (ទ័ព) សុទ្ធតែបានបង្ហាញពីភាពកង្វល់រៀងៗខ្លួន សម្រាប់ការវិលមកប្រជែងរក ៣ ពិន្ទុបន្ថែម ក្នុងការប្រកួតលីកកំពូលកម្ពុជា ឆ្នាំ ២០១៨ ដែលនឹងត្រូវដំណើរការវិញ នៅថ្ងៃសៅរ៍ និងថ្ងៃអាទិត្យ ចុង សប្តាហ៍នេះ បន្ទាប់ពីក្របខ័ណ្ឌកំពូលមួយនេះ បានផ្អាកអស់រយៈពេល ៣ សប្តាហ៍មក។
សម្រាប់ការវិលត្រឡប់មកកាន់ទីលានប្រកួតជាថ្មីនេះ ក្រុមបឹងកេត ដែលកំពុងឈរនៅលេខ ២ មាន ១៣ ពិន្ទុ និងក្រុមទ័ព ដែលឈរនៅលេខ ៥ មាន ៩ ពិន្ទុ សុទ្ធតែត្រូវប្រឈមការប្រកួត ដែលតានតឹងដូចគ្នា ព្រោះលើកនេះបឹងកេត ត្រូវប៉ះព្រះខ័នរាជស្វាយរៀង ហើយទ័ព ត្រូវជួបក្រុមវិសាខា។
ការជួបគ្នារវាងក្រុមទ័ព និងវិសាខា ដែលកំពុងឈរនៅលេខ ៣ មាន ១០ ពិន្ទុ បានក្លាយជាការប្រកួតដ៏គួរឲ្យចាប់អារម្មណ៍បំផុត ព្រោះនេះជាពេលដែលលោក ភា សុភ័ក្ត្រា ត្រូវដឹកនាំក្រុមទ័ព តទល់ជាមួយអតីតកូនក្រុមរបស់លោកគឺកីឡាករកូរ៉េខាងជើងទាំង ៤ នាក់មានខ្សែប្រយុទ្ធ Choe Myong Ho, Ri Hyok Chol និង Kim Kyong Hun ព្រមទាំងខ្សែការពារ Jang Song Hyok ដែលបានទៅរួមរស់ជាមួយក្រុមវិសាខា នៅរដូវកាលនេះ។
យ៉ាងណាក៏ដោយ លោក ភា សុភ័ក្ត្រា គ្រូបង្វឹកក្រុមទ័ព ហាក់មិនសូវមានការចាប់អារម្មណ៍ទៅលើភាពមុតស្រួចរបស់កីឡាករកូរ៉េខាងជើងទាំងនេះទេ។ លោកបានប្រាប់កាលពីម្សិលមិញថា៖ «បើនិយាយពីតំបន់ប្រយុទ្ធរបស់កូរ៉េខាងជើងទាំងនេះ អត់សូវមានចលនា ក្នុងការប្តូរល្បឿនទេ គាត់ល្អលើការគ្រប់គ្រងបាល់ និងការបញ្ជូនបាល់បង្កើតគ្រោះថ្នាក់ អ៊ីចឹងយើងមានការបារម្ភទៅលើខ្សែប្រយុទ្ធក្មេងៗរបស់វិសាខាទៅវិញទេ ដែលពួកគាត់មានល្បឿនលឿន»។
ជាមួយគ្នានេះ ក្រុមទ័ព ក៏បានជួបបញ្ហាលើការបាត់បង់កីឡាករ សំខាន់ៗផងដែរ។ លោក ភា សុភ័ក្ត្រា បានបន្តថា៖ «បើនិយាយ ពីផលលំបាក គឺយើងត្រូវតែប្រឈមហើយ ព្រោះកីឡាករបរទេសរបស់យើង ប្រហែលអាចប្រើបានតែ ២ នាក់ទេ ដោយសារទី ១ យើងបានបញ្ចប់កុងត្រាកីឡាករបរទេសម្នាក់មុនកាលកំណត់ ទី ២ Yodai Ogawa ជាប់ពិន័យ ទី ៣ ខ្សែការពារ Yoo Jae ho កើតជំងឺគ្រុនឈាម កំពុងសម្រាកនៅមន្ទីរពេទ្យ ហើយកីឡាករ កាន់ ពិសាល ដែលទើបមកពីលេងនៅប្រ៊ុយណេជាមួយក្រុម U21 កម្ពុជា ក៏គាត់គ្រុនឈាមដែរ និងទើបចូលហាត់ក្នុងសប្តាហ៍នេះ អ៊ីចឹងគាត់ ក៏លេងមិនបានពេញដែរ»។
ទោះបីជាយ៉ាងណា ក្រុមទ័ព បានពង្រឹងខ្លាំងទៅលើគុណភាពលេងនៅតំបន់ការពារ បន្ទាប់ពីក្រុមមួយនេះបានចាញ់ក្រុមបឹងកេត ២-០ កន្លងមកនេះ ហើយបច្ចេកទេស និងទិចនិកក្នុងការលេង ព្រមទាំងគុណភាពនៃកម្លាំង គឺលោក ភា សុភ័ក្ត្រា បានបញ្ចូនអស់ហើយ។ លោកបានបញ្ជាក់ថា៖ «អ្វីៗដែលយើងបានប្រគល់ឲ្យកីឡាករគឺ ១០០ ភាគរយហើយ»។
លោក ភា សុភ័ក្ត្រា បានបញ្ជាក់បន្ថែមថា៖ «យើងកំពុងតែខំប្រឹង ព្រោះយើងបានចាញ់ក្រុមបឹងកេត អ៊ីចឹងយើងត្រូវខំប្រឹងបន្ថែម ដើម្បីស្តារមុខមាត់ដែរ ហើយម្យ៉ាងទៀតការលេងសន្សំពិន្ទុបែបនេះ យើងត្រូវតែខំប្រឹង ដ្បិតអីបើយើងភ្លាត់ទៀត វានឹងធ្វើឲ្យយើងមានគម្លាតកាន់តែឆ្ងាយ ក្នុងការប្រជែងយកជើងឯក»។
ការប្រកួតរវាងក្រុមទ័ព (ឆ្វេង) និងបឹងកេត កន្លងមក។ ស្រេង ម៉េងស្រ៊ុន
ចំណែកលោក ហុក សុជីវ័ន គ្រូបង្វឹកក្រុមវិសាខា មិនអាចទាក់ទងបានទេ កាលពីថ្ងៃម្សិលមិញ។ យ៉ាងណាក៏ដោយ វិសាខា ជាក្រុមដែលមានទម្រង់លេងល្អ និងមានមហិច្ឆតាខ្ពស់ ហើយការជួបក្រុមទ័ព លើកនេះ វិសាខា ត្រូវការឈ្នះដើម្បីរក្សាទីតាំងលេខ ៣ ដែលពួកគេកំពុងគ្រប់គ្រង។
យ៉ាងណាមិញ លោក ហៅ សុជាតិ គ្រូបង្វឹកក្រុមបឹងកេត កំពុងតែផ្តោតខ្លាំងទៅលើការពង្រឹងតំបន់ការពារ ព្រោះលោកបានមើលឃើញថា តំបន់ប្រយុទ្ធរបស់ក្រុមព្រះខ័នរាជស្វាយរៀង រៀបចំបានល្អ និងមានគ្រោះថ្នាក់ បន្ទាប់ពីក្រុមមួយនេះបានលត់ក្រុមភ្នំពេញក្រោន ៦-៣ កន្លងមកនេះ ហើយលទ្ធផលនេះបានជួយឲ្យក្រុមស្វាយរៀង ឡើងមកឈរនៅលេខ ៦ មាន ៨ ពិន្ទុ និងបានទម្លាក់ក្រុមភ្នំពេញក្រោន ឲ្យទៅឈរនៅលេខ ៧ មាន ៧ ពិន្ទុ។
លោក ហៅ សុជាតិ បានប្រាប់ភ្នំពេញប៉ុស្តិ៍ កាលពីម្សិលមិញថា៖ «ការប្រកួតណាក៏ពិបាកសម្រាប់យើងដែរ ព្រោះក្រុមស្វាយរៀង ក៏ជាក្រុមខ្លាំង និងទើបឈ្នះក្រុមភ្នំពេញក្រោន ដោយលទ្ធផលល្អ ហើយតាមរយៈការប្រកួតនោះ ខ្ញុំមើលឃើញថា ស្វាយរៀង មានទម្រង់លេងល្អច្រើនជាងមុនច្រើន ពិសេសតំបន់ប្រយុទ្ធរបស់ក្រុមនេះ»។
លោកបន្ថែមថា៖ «ខ្ញុំបានចាប់អារម្មណ៍ទៅលើតំបន់ប្រយុទ្ធរបស់គេ ដែលឥឡូវនេះគេរៀបចំបានល្អ ហើយការលេងបែបការពារជាក្រុមរបស់គេ ក៏ល្អដែរ អ៊ីចឹងសម្រាប់ការប្រកួតនេះ យើងនឹងលេងបែបការពារ ជាចម្បង ព្រោះស្វាយរៀង នៅពេលលេងការពារបានល្អហើយ គឺវាយបកទៅវិញបានលឿន និងមានគ្រោះថ្នាក់ទៀត»។
ដោយឡែកក្រុមណាហ្គាវើល ដែលកំពុងឈរនៅកំពូលតារាង ដោយមាន ១៣ ពិន្ទុ ស្មើជាមួយក្រុមបឹងកេតនោះ នឹងត្រូវជួបក្រុមសូលទីឡូអង្គរ ហើយលោក មាស ចាន់ណា គ្រូបង្វឹកក្រុមណាហ្គាវើល បានចាត់ទុក សូលទីឡូអង្គរ ជាក្រុមលេងការពារ ១១ នាក់ និងប្រយុទ្ធ ១១ នាក់ ព្រោះក្រុមនេះបំផ្លាស់ទីលឿន ហើយមិនងាយក្រុមណាស៊ុតបាល់បញ្ចូលទីទេ។ទោះយ៉ាងណា លោក ចាន់ណា គ្រោងនឹងប្តូរយុទ្ធសាស្ត្រលេងឲ្យបានលឿន ដើម្បីរកគ្រាប់បាល់ ពេលជួបសូលទីឡូអង្គរ លើកនេះ។
ចំណែកក្រុមប៉ូលិស ដែលកំពុងឈរនៅលេខ ៤ មាន ១០ ពិន្ទុ ត្រូវជួបក្រុមភ្នំពេញក្រោន ឯក្រុមវេស្ទើន ត្រូវស្វាគមន៍ក្រុមអគ្គិសនីកម្ពុជា ហើយនេះជាពេលដែលក្រុមទាំង ២ ត្រូវប្រជែងគ្នារកការឈ្នះជាលើកដំបូង ព្រោះ ៥ ប្រកួតកន្លងមកនេះ វេស្ទើន និងអគ្គិសនីកម្ពុជា បានចាញ់គ្រប់ការប្រកួតដូចគ្នា៕
កម្មវិធីប្រកួតនៅថ្ងៃសៅរ៍
-វិសាខា v ទ័ព កីឡដ្ឋានវេស្ទើន ៣:០០
-អាស៊ីអឺរ៉ុប v អង្គរថាយហ្គឺរ កីឡដ្ឋាន AEU Sport Park
៤ ប្រកួតនៅថ្ងៃអាទិត្យ
-ភ្នំពេញក្រោន v ប៉ូលិស នៅកីឡដ្ឋាន RSN ៦:០០
-ណាហ្គាវើល v សូលទីឡូអង្គរ ពហុកីឡដ្ឋានជាតិ ៣:៣០
-វេស្ទើន v អគ្គិសនីកម្ពុជា នៅកីឡដ្ឋានវេស្ទើន ៣:០០
-បឹងកេត v ស្វាយរៀង នៅពហុកីឡដ្ឋានជាតិ ៦:៣០
