ភ្នំពេញៈ ក្រុមបឹងកេត ហាក់មិនបានផ្តល់ក្តីសង្ឃឹមលើក្រុម ក្រសួងការពារជាតិ (ទ័ព) ក្នុងការជួយទម្លាក់ណាហ្គាវើល ចេញពីតំបន់កំពូលតារាងនោះទេ បើទោះបីជាក្រុមមួយនេះ មានរំពឹងខ្ពស់ ក្នុងការយកឈ្នះក្រុមអគ្គិសនីកម្ពុជា សម្រាប់ការប្រកួតលើកទី ៧ នៃលីកកំពូលកម្ពុជា ឆ្នាំ ២០១៨ នៅចុងសប្តាហ៍នេះក៏ដោយ។
តាមការប្រកួត ៦ លើកមកនេះ គឺមានតែបឹងកេត និងណាហ្គាវើល ទេ ដែលមិនទាន់ស្គាល់ការចាញ់ដូចគ្នា ព្រោះក្រុមទាំង ២ នេះ បានឈ្នះ ៥ និងស្មើ ១ ប្រកួត មាន ១៦ ពិន្ទុដូចគ្នា ប៉ុន្តែក្រុមណាហ្គាវើល មានគ្រាប់បាល់ចំណេញច្រើនជាង បឹងកេត ៣ គ្រាប់។ ហេតុនេះក្រុមទ័ព ដែលត្រូវជួបណាហ្គាវើល នៅសប្តាហ៍ទី ៧ នេះ បានក្លាយជាតួអង្គយ៉ាងសំខាន់ ក្នុងការជួយ បឹងកេត ដើម្បីទម្លាក់ ណាហ្គាវើល។
ទាក់ទងនឹងបញ្ហានេះ លោក ហៅ សុជាតិ គ្រូបង្វឹកក្រុមបឹងកេត បានប្រាប់ភ្នំពេញ ប៉ុស្តិ៍ កាលពីម្សិលមិញថា៖ «យើងមិនចង់រំពឹងទៅលើក្រុមណាមួយ ដើម្បីជួយឲ្យយើងដណ្តើមបានលេខ ១ នោះទេ គឺយើងត្រូវខំប្រឹងដោយខ្លួនឯង។ ចំណែកក្រុមទ័ព ពេលនេះក៏ពិបាកជាមួយណាហ្គាវើល ដែរ ព្រោះណាហ្គាវើល ល្អជាងមុនឆ្ងាយ តែបើមើលទៅក្រុមទ័ព វិញគឺទម្រង់លេងរបស់គាត់ ធ្លាក់ចុះជាងឆ្នាំមុន»។
យ៉ាងណាក៏ដោយ គ្រូបង្វឹករូបនេះ រំពឹងថា បឹងកេត អាចនឹងដណ្តើមបាន ៣ ពិន្ទុ ពីក្រុមប្រើកីឡាករខ្មែរសុទ្ធ អគ្គិសនីកម្ពុជា ជាមួយភាគរយយ៉ាងខ្ពស់។ លោក សុជាតិ និយាយថា៖ «ការប្រកួតនេះ ដូចជាមិនបារម្ភអ្វីទេ គឺយើងមានភាគរយឈ្នះច្រើន ដោយសារយើងរៀបចំបានល្អជាង ពិសេសយើងមានប្រៀបត្រង់ថា យើងមានកីឡាករបរទេសល្អៗសម្រាប់ជួយក្រុម បើទោះបីជាគុណភាពកីឡាករខ្មែរ និងខ្មែររវាងក្រុមទាំង ២ នេះ មានភាពប្រហាក់ប្រហែលគ្នាក៏ដោយ»។
ទោះបីជាយ៉ាងណា លោក ហៅ សុជាតិ ក៏មានការបារម្ភខ្លះៗ ទៅលើទីលានថ្មីរបស់ក្រុមអគ្គិសនីកម្ពុជាផងដែរ ព្រោះកន្លងមក បឹងកេត មិនធ្លាប់បានលេងនៅលើទឹកដីនោះទេ ហើយអ្នកចាំទីដៃទី ១ ស៊ូ យ៉ាទី ដែលទើបមានរបួស និង សេត រ៉ូហ្ស៊ីប ត្រូវបានលោក សុជាតិ បង្ហើបថា មិនអាចលេងបានទេ។
ដោយឡែកក្រុមវិសាខា ដែលកំពុងឈរនៅលេខរៀងទី ៣ មាន ១៣ ពិន្ទុ នឹងត្រូវជួបក្រុមប៉ូលិស ដែលទើបធ្លាក់ទៅឈរនៅលេខរៀងទី ៥ ក្រោយចាញ់ភ្នំពេញក្រោន ៤-០ កាលពីសប្តាហ៍មុន។ ប៉ូលិស អាចនឹងជួបការខកចិត្តបន្តទៀត បើសិនជាពួកគេ នៅតែមានភាពទន់ខ្សោយផ្នែកគុណភាពកម្លាំងដូចពេលជួបក្រោន ព្រោះវិសាខា ជាក្រុមដែលមានទម្រង់លេងល្អ និងកំពុងមានទឹកចិត្តប្រកួតខ្លាំង បន្ទាប់ពីពួកគេ បានយកឈ្នះក្រុមទ័ព ២-០ កាលពីថ្ងៃសៅរ៍។
ចំណែកក្រុមភ្នំពេញក្រោន ដែលទើបឡើងមកឈរនៅលេខ ៤ មាន ១០ ពិន្ទុស្មើជាមួយក្រុមប៉ូលិស នោះ ត្រូវបានវិលទៅជួបក្រុមអាស៊ីអឺរ៉ុប ដែលមានខ្សែប្រយុទ្ធល្អ និងកំពុងឈរនៅលេខ ៨ មាន ៧ ពិន្ទុ។ រីឯក្រុមមាន ៨ ពិន្ទុ ព្រះខ័នរាជស្វាយរៀង ដែលទើបចាញ់ក្រុមបឹងកេត ៣-១ កាលពីសប្តាហ៍មុននោះ ត្រូវធ្វើដំណើរមកជួបក្រុមសូលទីឡូអង្គរ នៅស្តាតចាស់ ហើយក្រុមអង្គរថាយហ្គឺរ ត្រូវស្វាគមន៍ក្រុមចាញ់ទាំង ៧ ប្រកួត វេស្ទើន៕
កម្មវិធីប្រកួតនៅថ្ងៃសៅរ៍
-សូលទីឡូអង្គរ v ស្វាយរៀង នៅស្តាតចាស់ ៣:០០
-អគ្គិសនីកម្ពុជា v បឹងកេត កីឡដ្ឋាន EDC ៣:០០
-ទ័ព v ណាហ្គាវើល ស្តាតចាស់ ម៉ោង ៦:០០
៣ ប្រកួតនៅថ្ងៃអាទិត្យ
-ប៉ូលិស v វិសាខា កីឡដ្ឋាន AEU Sport Park ៣:០០
-ភ្នំពេញក្រោន v អាស៊ីអឺរ៉ុប កីឡដ្ឋាន RSN ៦:០០
-អង្គរថាយហ្គឺរ v វេស្ទើន កីឡដ្ឋានខេត្តសៀមរាប ៣:៣០