.jpg)
ចាន់ វឌ្ឍនាកា បានទាត់បាល់កាត់ពីមុខ រស់ គង់សំរេច របស់ក្រុមស្វាយរៀង នាជំនួបកន្លងមក។ រូប បឹងកេត
ភ្នំពេញ៖ ក្រុមបឹងកេត មានការអន្ទះសាខ្លាំង ក្នុងការប្រកួតផ្តាច់ព្រ័ត្រពានរង្វាន់សម្តេច ហ៊ុន សែន លើកទី ១៣ ឆ្នាំ ២០១៩ ជាមួយក្រុមព្រះខ័នរាជស្វាយរៀង ដែលនឹងត្រូវធ្វើនៅកីឡដ្ឋាន RSN នាល្ងាចម៉ោង ៦ ថ្ងៃពុធនេះ ព្រោះពួកគេពិតជាចង់ទទួលបានជ័យជម្នះខ្លាំង ដើម្បីលើកពានមួយនេះ ជាលើកដំបូង ប៉ុន្តែក្រុមស្វាយរៀង ក៏ចង់បន្តឈ្នះពានមួយនេះ ជាលើកទី ៥ ផងដែរ។
នៅក្នុងសន្នីសីទកាសែត នៅកីឡដ្ឋាន RSN កាលពីរសៀលថ្ងៃអង្គារម្សិលមិញ លោក ហៅ សុជាតិ គ្រូបង្វឹកក្រុមបឹងកេត ក៏ដូចជាលោក Conor Nestor គ្រូបង្គោលក្រុមព្រះខ័នរាជស្វាយរៀង ដែលទើបដឹកនាំក្រុមនេះ ឲ្យឈ្នះពានលីកកំពូលកម្ពុជា ជាមួយការឈ្នះ ២០ ស្មើ ៥ និងចាញ់ត្រឹម ១ លើកនោះ សុទ្ធតែអះអាងថា ការប្រកួតផ្តាច់ព្រ័ត្រពានរង្វាន់សម្តេច ហ៊ុន សែន នេះមានភាពតានតឹងខ្លាំង។
លោក ហៅ សុជាតិ បាននិយាយថា៖ «ការប្រកួតនៅថ្ងៃស្អែកនេះ (ថ្ងៃពុធ) ជាការប្រកួតមួយដ៏តានតឹង ប៉ុន្តែក៏ជាការប្រកួតមួយ ដែលយើងទន្ទឹងរង់ចាំឲ្យមកដល់ឆាប់ៗផងដែរ ព្រោះនេះជាលើកទី ១ ហើយ ដែលក្រុមបឹងកេត បានឡើងមកដល់វគ្គផ្តាច់ព្រ័ត្រ បានរង្វាន់សម្តេច»។
តាមរយៈការបង្ហាញខ្លួន ក្នុងការប្រកួតពានរង្វាន់សម្តេច ហ៊ុន សែន ៧ ឆ្នាំកន្លងមកនេះ ក្រុមបឹងកេត មិនធ្លាប់បានឡើងដល់វគ្គផ្តាច់ព្រ័ត្រម្តងណាឡើយ គឺពួកគេបានត្រឹមទទួលចំណាត់ថ្នាក់លេខ ៣ បន្ទាប់ពីពួកគេបានចាញ់ក្រុមបៀលប្រាយ ១-០ នៅវគ្គពាក់កណ្តាលផ្តាច់ព្រ័ត្រ និងឈ្នះក្រុមណាហ្គាវើល ៣-០ ក្នុងការប្រកួតដណ្តើមយកលេខ ៣ និងលេខ ៤ កាលពីឆ្នាំ ២០១៤។
ចំណែកការប្រកួត កាលពីឆ្នាំ ២០១៧ បឹងកេត បានចាញ់ក្រុមណាហ្គាវើល ១-០ នៅវគ្គពាក់កណ្តាលផ្តាច់ព្រ័ត្រ និងបានបន្តចាញ់ក្រុមអគ្គិសនីកម្ពុជា ក្នុងការដណ្តើមយកលេខ ៣ និងលេខ ៤ ដោយការទាត់បាល់ប៉េណាល់ទី ៥-៤ ក្រោយពេលក្រុមទាំង ២ បានស្មើគ្នា ១-១។
យ៉ាងណាក៏ដោយ សម្រាប់ការជួបក្រុមស្វាយរៀង ក្នុងវគ្គផ្តាច់ព្រ័ត្រនេះ នឹងមានការចូលរួមជួយពីសំណាក់ខ្សែប្រយុទ្ធដ៏ឆ្នើម ចាន់ វឌ្ឍនាកា ដែលទើបជាសះស្បើយ។ លោក ហៅ សុជាតិ បានបង្ហើបថា៖ «ចាន់ វឌ្ឍនាកា នឹងមានវត្តមាននៅក្នុងការប្រកួតនេះ ប៉ុន្តែមិនទាន់ដឹងថា គាត់នឹងត្រូវដាក់ឲ្យចូលលេងក្នុងជម្រើស ១១ នាក់ដំបូង ឬយ៉ាងណានោះទេ ព្រោះយើងនៅតែតាមដាន និងពិនិត្យទៅលើរបួសរបស់គាត់»។
ចំណែកលោក Conor Nestor ដែលទើបមកដឹកនាំក្រុមស្វាយរៀង បាន ២ ឆ្នាំ មើលឃើញថា ក្រុមបឹងកេតនឹងប្រឹងប្រែងខ្លាំងសម្រាប់ស្វែងរកការឈ្នះពានលើកដំបូងរបស់ខ្លួន។ លោកបាននិយាយថា៖ «បើទោះគ្មានកីឡាករបរទេស តែបឹងកេត នៅតែមានរបៀបលេងល្អដដែល ព្រោះកូនក្រុមក្នុងស្រុកសុទ្ធតែមានគុណភាពលេង ហើយបឹងកេតនឹងប្រឹងប្រែងខ្លាំង ព្រោះពួកគេមិនធ្លាប់ឈ្នះពាននេះពីមុនមកនោះទេ ប៉ុន្តែយើងក៏ចង់បានពាននេះឲ្យគ្រប់ ៥ ដងផងដែរ»។
សម្រាប់ការប្រកួតពានរង្វាន់សម្តេច ហ៊ុន សែន អស់រយៈពេល ១២ ឆ្នាំ កន្លងមកនេះ ព្រះខ័នរាជស្វាយរៀង គឺជាក្រុមដែលឈ្នះបានពាននេះ ច្រើនដងជាងគេ គឺបានចំនួន ៤ ដង កាលឆ្នាំ ២០១១ ឆ្នាំ ២០១២ ឆ្នាំ ២០១៥ ឆ្នាំ ២០១៧ និងឈ្នះជើងឯករងបាន ២ ដងទៀត កាលពីឆ្នាំ ២០០៨ និងឆ្នាំ ២០១៦។ យ៉ាងណាក៏ដោយ លើកនេះក្រុមបឹងកេត ពិតជាចង់ឈ្នះពាននេះខ្លាំងបំផុត។
លោក ហៅ សុជាតិ ធ្លាប់បានបញ្ជាក់ថា៖ «យើងពិតជាចង់បានជ័យជម្នះ និងឈ្នះពាននេះមែនទែន ព្រោះរយៈពេល ៧ ឆ្នាំ ហើយ បឹងកេត មិនដែលបានដល់វគ្គផ្តាច់ព្រ័ត្រពានសម្តេចនោះទេ អ៊ីចឹងយើងត្រូវតែព្យាយាមដោយសារ ស្វាយរៀង ជាក្រុមខ្លាំងមែនទែន គឺខ្លាំងទាំងការប្រកួតលីកកំពូល និងពានរង្វាន់សម្តេចនេះ ហេតុនេះយើងមិនអាចធ្វេសប្រហែសជាមួយគាត់បាននោះទេ»៕
