ភ្នំពេញ៖ ការទទួលបានជោគជ័យផ្ទួនៗ គឺការឈ្នះបានខ្សែក្រវាត់ ព្រមទាំងការឈ្នះបានប្រាក់លានផ្សេងៗ ពិសេសការទទួលបានក្របខ័ណ្ឌជាទាហាន ក្នុងឆ្នាំ ២០២០ នេះ បានធ្វើឲ្យអ្នកប្រដាល់មកពីជាយដែន ឃីម បូរ៉ា បានផ្លាស់ប្តូរចិត្តពីការចង់ដើរចេញពីអាជីពនេះ មកដាក់ចិត្តកាន់តែជ្រៅទៅលើវិស័យនេះ ហើយក៏ចង់វិវឌ្ឍខ្លួនទៅជាគ្រូបង្វឹក ក្រោយប្រកួតលែងកើតផងដែរ។
ក្នុងបទសម្ភាសផ្ទាល់ជាមួយភ្នំពេញប៉ុស្តិ៍ ក្នុងពេលថ្មីៗ នៅក្លិបរស្មីភូមិគាប ខេត្តបន្ទាយមានជ័យ ឃីម បូរ៉ា មិនត្អូញត្អែរពីជីវភាពលំបាកក្នុងមុខរបរប្រដាល់នោះទេ ដោយរូបគេបានអះអាងថា មានជីវភាពបានប្រសើរសមរម្យ បន្ទាប់ពីក្រាញជាមួយមុខរបរប្រដាល់ មិនរាថយរយៈពេលជាង ១៤ ឆ្នាំ ក្រោមការចាត់ចែងរបស់លោកឪពុក ហេង ប៊ុនឃីម ជាគ្រូបង្វឹកផ្ទាល់។
ឃីម បូរ៉ា និយាយថា៖ «សព្វថ្ងៃ ខ្ញុំមានប្រពន្ធ និងកូន ១ មានជីវភាពសមរម្យ ដោយមុខរបរនេះឈឺសាច់មែន តែបើខ្ញុំខិតខំប្រឹងប្រែងយ៉ាងយកចិត្តទុកដាក់ តាមការណែនាំពីគ្រូ គឺទទួលបានផលល្អ ដោយបានចំណូលតាមកម្លាំងពលកម្ម ព្រោះក្នុង ១ ខែ យ៉ាងហោចណាស់ក៏ខ្ញុំឡើងប្រកួតបាន ២ ទៅ ៣ លើកដែរ ហើយក្នុងមួយលើកតិចបំផុត ក៏ទទួលបានកម្រៃពី ៤០០ ទៅជិត ១ ០០០ ដុល្លារដែរ គឺទៅតាមកម្មវិធីរបស់គេរៀបចំផ្សេងៗគ្នា»។
បូរ៉ា បន្ថែមថា៖ «កន្លងមកខ្ញុំធ្លាប់ចង់លាឈប់ពីសង្វៀន ដោយប្រកួតមិនដែលឈ្នះជើងឯក ឬចំណាត់ថ្នាក់លេខ ១ គឺបានតែជើងឯករង ក្នុងព្រឹត្តិការណ៍ធំៗចំនួន ៦ លើក ប៉ុន្តែក្នុងឆ្នាំ ២០២០ នេះ ខ្ញុំឈ្នះខ្សែក្រវាត់បាន ១ បន្ទាប់មកខ្ញុំឈ្នះប្រាក់លានពីកម្មវិធីម៉ារ៉ាតុងម៉ាសហ្វៃ ហើយកាលពីសប្តាហ៍មុន ខ្ញុំឈ្នះប្រាក់លាន ពីកីឡាករ ឡុង ជិន ផងដែរ ពិសេសនៅឆ្នាំ ២០២០ នេះ ខ្ញុំត្រូវបានថ្នាក់ដឹកនាំគាត់បំពេញក្របខ័ណ្ឌជាទាហានក្នុងកងយោធពលខេមរភូមិន្ទ គឺដោយសារខ្ញុំប្រកួតល្អ មានស្នាដៃ ព្រមទាំងមិនដែលធ្វើឲ្យខូចកម្មវិធីគេម្តងណាទេ»។
ទោះជាយ៉ាងនេះក្តី ឃីម បូរ៉ា អះអាងថា បច្ចុប្បន្នរូបគេមានបញ្ហាសុខភាព មិនសូវបានល្អ គឺកម្លាំងធ្លាក់ចុះ និងមានជំងឺខ្លះផង ប៉ុន្តែការហ្វឹកហាត់ គឺព្យាយាមជានិច្ច ដោយហ្វឹកហាត់ផ្នែកបច្ចេកទេសឲ្យបានច្រើន ដើម្បីពេលប្រកួតប្រើបច្ចេកទេសច្រើនជាងប្រើកម្លាំង ព្រោះគិតជាមធ្យម បូរ៉ា បង្ហើបថា រូបគេ អាចរកប្រាក់បានពីការប្រកួតបានជិត ១ ០០០ ដុល្លារ ក្នុង ១ ខែ ខណៈដែលជីវភាពប្រចាំថ្ងៃមានផ្ទះស្នាក់នៅ មានរថយន្តជិះ ព្រមទាំងមានការហូបចុកស្នាក់នៅបានសមរម្យ។
ជាមួយគ្នានេះ ឃីម បូរ៉ា ក៏មានបំណងធ្វើជាគ្រូបង្វឹក នៅពេលរូបគេប្រកួតលែងកើតផងដែរ ដោយរូបគេបញ្ជាក់ថា៖ «ប្រសិនបើថ្ងៃក្រោយ ខ្ញុំប្រកួតលែងកើត គឺខ្ញុំចង់ធ្វើគ្រូបង្វឹកដូចឪពុករបស់ខ្ញុំ ហើយចំណែកកូនប្រុសខ្ញុំ នឹងឲ្យហ្វឹកហាត់ ប៉ុន្តែឡើងប្រកួត ឬអត់ គឺអាស្រ័យលើទឹកចិត្ត ឬចំណង់របស់គេនៅពេលគេធំ»។
ចំណែកលោក ហេង ប៊ុនឃីម ជាឪពុកបាននិយាយថា៖ «ខ្ញុំមានកូន ៤ នាក់ កូនច្បងស្រីរកស៊ីមិនប្រដាល់ទេ ប៉ុន្តែកូនប្រុស ៣ នាក់ ប្រដាល់ទាំងអស់ គឺមាន ឃីម ឌីម៉ា ជាម្ចាស់មេដាយមាសស៊ីហ្គេម ឆ្នាំ ២០១៧ ឃីម បូរ៉ា និងកូនពៅ ឃីម ឌីម៉ៃ ដែលកំពុងហ្វឹកហាត់ និងប្រកួតបានល្អផងដែរ អ៊ីចឹងអាចថា ខ្ញុំជោគជ័យក៏ថាបាន ព្រោះពីមុនក្លិបរស្មីភូមិគាប ខ្ញុំមានតែបាវសាក់ ១ មានកូនខ្ទម សម្រាប់កូន និងប្រពន្ធរស់នៅយ៉ាងកំសត់ ប៉ុន្តែការប្រឹងប្រែងតាមរយៈប្រដាល់នេះ ខ្ញុំបានកសាងក្លិប ដោយមានកន្លែងហ្វឹកហាត់បានល្អសមរម្យមានផ្ទះសមរម្យ ព្រមទាំងទិញដី ពង្រីកលំនៅឋានបានល្មមគួរសម និងទទួលបានការគាំទ្រពីបងប្អូនក្នុងភូមិ ដោយយកកូនគេមកហាត់ផងដែរ»។
លោកបន្ថែមថា៖ «តាមរយៈមុខរបរប្រដាល់នេះ សព្វថ្ងៃខ្ញុំរៀបចំកូនឲ្យមានប្រពន្ធ និងការងារអស់ហើយ គឺ ឌីម៉ា ធ្វើប៉េអឹម នៅភ្នំពេញ និងជាកីឡាករជម្រើសជាតិ មានផ្ទះសំបែងសមរម្យ ហើយ បូរ៉ា ធ្វើទាហានមានប្រាក់ខែដូចគ្នា គឺនៅសល់តែកូនពៅ ឌឺម៉ៃ កំពុងហាត់ល្អ ត្រៀមចូលថ្នាលជម្រើសជាតិក្នុងពេលអនាគត»៕