រុស្ស៊ី: ក្រុមបាល់ទាត់ជម្រើសជាតិបែលហ្ស៊ិក បានផ្តួលក្រុមជម្រើសជាតិអង់គ្លេស ក្នុងការប្រកួតដណ្តើមលេខ៣នៃព្រឹត្តិការណ៍ World Cup ដើម្បីបញ្ចប់ក្នុងចំណាត់ថ្នាក់ដ៏ល្អបំផុតមិនធ្លាប់មានពីមុនមករបស់ពួកគេ ខណៈដែលខ្សែប្រយុទ្ធរកបានគ្រាប់បាល់ច្រើនជាងគេប្រចាំយុទ្ធនាការ Harry Kane បានទទួលស្គាល់ថា ក្រុមរបស់គេត្រូវតែកែសម្រួលទម្រង់លេង ប្រសិនបើពួកគេចង់បញ្ចប់ការមិនអាចឈ្នះពាន។
គ្រាប់បាល់ស៊ុតបញ្ចូលទីពីសំណាក់ខ្សែការពារ Thomas Meunier និងខ្សែបម្រើប្រយុទ្ធ Eden Hazard បានជួយឲ្យពួកគេកត់ត្រាជ័យជម្នះក្នុងលទ្ធផល ២-០ ក្នុងទីក្រុង Saint Petersburg និងជួយឲ្យបែលហ្ស៊ិក ធ្វើបានល្អប្រសើរជាងទម្រង់លេងរបស់ពួកគេក្នុងព្រឹត្តិការណ៍ World Cup ឆ្នាំ១៩៨៦ ក្នុងប្រទេសម៉ិកស៊ិក ដោយកាលនោះពួកគេបានបញ្ចប់ដោយស្ថិតក្នុងចំណាត់ថ្នាក់លេខ៤។
បែលហ្ស៊ិក ដែលបានរងបរាជ័យយ៉ាងឈឺចាប់ក្នុងលទ្ធផល ១-០ ក្រោមស្នាដៃក្រុមជម្រើសជាតិបារាំង ក្នុងវគ្គពាក់កណ្តាលផ្តាច់ព្រ័ត្រ ក៏បានផ្តួលក្រុមអង់គ្លេសរបស់លោក Gareth Southgate ក្នុងវគ្គចែកពូលក្នុងប្រទេសរុស្ស៊ី ផងដែរ ក្នុងដំណើរឆ្ពោះទៅកាន់ការបញ្ចប់ដោយឈរលេខ១ក្នុងពូល នៅមុនពេលផ្តួលក្រុមជម្រើសជាតិជប៉ុន និងប្រេស៊ីល។
លោក Roberto Martinez គ្រូបង្វឹកនៃក្រុមជម្រើសជាតិបែលហ្ស៊ិក បានឲ្យដឹងថា៖ «វាគឺជាការសម្រេចបាននូវសមិទ្ធផលមួយ។ នេះគឺជាការបញ្ចប់ក្នុងចំណាត់ថ្នាក់ដ៏ល្អបំផុតរបស់បែលហ្ស៊ិកក្នុង World Cup។ កីឡាករពិតជាស័ក្តិសមក្នុងការទទួលបានបែបនោះ ហើយពួកគេចង់ធ្វើឲ្យប្រទេសនេះមានមោទនភាព»៕ IS