ភ្នំពេញ: ក្រុមអត្តពលិកប៉េតង់កម្ពុជា បានរួមគ្នាបង្កើតប្រវត្តិសាស្ត្រកាន់តែធំ ធ្វើឲ្យពិភពលោក និងប្រទេសខ្លាំងផ្នែកកីឡាប៉េតង់ ពិសេសបារាំង ដែលជាអ្នកបង្កើតកីឡានេះ បានសរសើរមិនដាច់ពីមាត់ ពីភាពខ្លាំងរបស់ពួកគេ បន្ទាប់ពីក្រុមតំណាងឲ្យកម្ពុជា បានឈ្នះពាន ៣ ក្នុងការប្រកួតកីឡាប៉េតង់ជ្រើសរើសជើងឯកឆ្នើមពិភពលោក Trophee L''Equipe 2018 នៅប្រទេសបារាំង កាលពីយប់ថ្ងៃអាទិត្យ។
បើទោះបីជា ក្រុមប៉េតង់កម្ពុជា ទើបតែត្រូវបានចាត់ទុកជាប្រទេសខ្លាំង ផ្នែកកីឡាប៉េតង់ ប្រចាំទ្វីបអាស៊ី ជាមួយនឹងថៃ ដើម្បីចូលរួមការប្រកួត Trophee L''Equipe 2018 នេះជាលើកដំបូង ជាមួយប្រទេសចំនួន ៥ ទៀត មានម្ចាស់ផ្ទះបារាំង (មាន ២ ក្រុម) ដាណឺម៉ាក និងអ៊ីតាលី តំណាងមកពីទ្វីបអឺរ៉ុប រួមទាំងប្រទេសម៉ាដាហ្គាស្កា ទុយនីស៊ី ជាតំណាងប្រទេសខ្លាំងមកពីទ្វីបអាហ្រ្វិក ប៉ុន្តែតាមរយៈការប្រកួតនេះ ក្រុមប៉េតង់កម្ពុជា បានធ្វើឲ្យប្រទេសចូលរួមទាំងអស់ មានការភ្ញាក់ផ្អើលយ៉ាងខ្លាំង នៅពេលឃើញកម្ពុជាបានឈ្នះពានចំនួន ៣ ក្នុងការប្រកួតត្រឹម ៦ វិញ្ញាសានោះ។
ការដណ្តើមបានចំណាត់ថ្នាក់លេខ ១ ដើម្បីលើកពានការប្រកួតវាយគូនារីពីសំណាក់វីរកីឡាការិនី កែ ឡេង និង អ៊ុក ស្រីមុំ បានក្លាយជាចំណុចចាប់ផ្តើមដ៏ល្អបំផុត ព្រោះអ្នកទាំង ២ បានឈ្នះគ្រប់ការប្រកួតទាំងអស់ ពិសេសការឈ្នះក្រុមវីរកីឡាការិនីបារាំង Florence Schopp និង Marie-Christine Virebayre ក្នុងវគ្គជម្រុះតាមពូល មុនពេលទៅឈ្នះក្រុមទុយនីស៊ី ១៣-២ នៅវគ្គផ្តាច់ព្រ័ត្រ បន្ថែមទៅលើការឈ្នះ ១៣-៩ នៅវគ្គជម្រុះ ហើយក្នុងជ័យជម្នះនេះ កែ ឡេង និង អ៊ុក ស្រីមុំ ក៏បានទម្លាក់ក្រុមនារីរបស់ថៃ ១៣-១០ នៅវគ្គពាក់កណ្តាលផ្តាច់ព្រ័ត្រ ផងដែរ។
បន្ថែមលើការឈ្នះពានលើវិញ្ញាសាវាយជាគូនារីនេះ កីឡាការិនី អ៊ុន ស្រីយ៉ា បានបង្កឲ្យមានការភ្ញាក់ផ្អើលកាន់តែខ្លាំង បន្ទាប់ពីកីឡាការិនីរបស់កម្ពុជារូបនេះដណ្តើមបានពាន ក្នុងការប្រកួតវិញ្ញាសា ១ នាក់ទល់ ១ នាក់ ក្រោយឈ្នះកីឡាការិនីជើងចាស់របស់បារាំង Marie-Christine Virebayre ១៣-៦ នៅវគ្គផ្តាច់ព្រ័ត្រ។
កីឡាករ សុខ ច័ន្ទមាន បានចំណាត់ថ្នាក់លេខ ២ លើវិញ្ញាសា ១ នាក់ទល់ ១ នាក់បុរសក្រោយចាញ់កីឡាករថៃ Than-akorn Sangkaew នៅវគ្គផ្តាច់ព្រ័ត្រ ប៉ុន្តែជ័យជម្នះរបស់ ច័ន្ទមាន លើកីឡាករជើងចាស់របស់បារាំង Philippe Quintais នៅវគ្គជម្រុះក្នុងពូល B និងការទម្លាក់កីឡាករបារាំងម្នាក់ទៀតឈ្មោះ Dylan Rocher នៅវគ្គពាក់កណ្តាលផ្តាច់ព្រ័ត្រ បានធ្វើឲ្យបារាំងជាម្ចាស់ផ្ទះមានការខកចិត្តយ៉ាងខ្លាំង។
ជាមួយការចាញ់ក្រុមអត្តពលិកកម្ពុជា ជាបន្តបន្ទាប់នេះ បានធ្វើឲ្យកាសែតដ៏ល្បីរបស់បារាំង La Nouvelle Republique បានសរសេរសម្តែងការខកចិត្ត ហើយបានចាត់ទុកក្រុមអត្តពលិកកម្ពុជាថា «ជាពេជ្ឈឃាត ដែលគ្មានការលើកលែងឲ្យអត្តពលិកបារាំងណាមួយសោះ» ខណៈបារាំងជាម្ចាស់ផ្ទះ និងជាអ្នកបង្កើតកីឡាប៉េតង់ ឬហៅថា ប៊ូលនោះ។
សម្រាប់ការប្រកួតលើវិញ្ញាសា ៣ នាក់ទល់ ៣ នាក់ (បុរស-នារី) ក្រុមបុរសកម្ពុជាបានយកឈ្នះក្រុមបារាំង ២ នៅវគ្គជម្រុះក្នុងពូល រួចបន្តទម្លាក់ក្រុមបារាំង ១ ក្នុងលទ្ធផល ១៣-៤ ក្នុងវគ្គផ្តាច់ព្រ័ត្រ មុនពេលពួកគេបានចាញ់ក្រុមម៉ាដាហ្គាស្កា ក្នុងលទ្ធផល ១៣-៣ នៅវគ្គផ្តាច់ព្រ័ត្រ។
ចំណែកក្រុមនារីកម្ពុជា រួមមានកីឡាការិនី កែ ឡេង, អ៊ុក ស្រីមុំ និង អ៊ុន ស្រីយ៉ា បានវាយបកទម្លាក់ក្រុមថៃ ដោយឈ្នះ ១៣-១២ នៅវគ្គពាក់កណ្តាលផ្តាច់ព្រ័ត្រ មុននឹងកម្ពុជា បានឈ្នះ ១៣-៣ លើក្រុមបារាំង ក្នុងវគ្គផ្តាច់ព្រ័ត្រ ដើម្បីលើកពានធំនារី៕