.jpg)
វីរកីឡាការិនី កែ ឡេង បានរកឃើញការឈ្នះទាំង ២ វិញ្ញាសា សម្រាប់ការប្រកួតកាលពីថ្ងៃអង្គារ។ សហការី
ភ្នំពេញ៖ វីរកីឡាការិនី កែ ឡេង, អ៊ុក ស្រីមុំ និង អ៊ុន ស្រីយ៉ា បានធ្វើឲ្យការប្រកួតកីឡាប៉េតង់ជើងឯកពិភពលោកយុវជន និងស្រ្តី លើកទី ១៧ ឆ្នាំ ២០១៩ ជាលើកដំបូងនៅកម្ពុជា បានដំណើរការទៅប្រកបដោយភាពរីករាយ និងកក់ក្តៅបំផុត ខណៈអ្នកទាំង ៣ បានរួមគ្នារកឃើញនូវជ័យជម្នះលើវិញ្ញាសា ៣ នាក់ ទល់ ៣ នាក់ ក្នុងការប្រកួតបើកឆាក កាលពីថ្ងៃអង្គារម្សិលមិញ។
សម្រាប់ការប្រកួតនៅពហុកីឡដ្ឋានជាតិ កាលពីម្សិលមិញនោះ កែ ឡេង, អ៊ុក ស្រីមុំ និង អ៊ុន ស្រីយ៉ា ដែលសុទ្ធតែធ្លាប់បានឈ្នះមេដាយកម្រិតពិភពលោក ជូនប្រទេសជាតិនោះ បានចាញ់បង់លើគូប្រកួតមកពីប្រទេស ឡេតូនី ៣-០ នៅសិតទី ១។
ប៉ុន្តែនៅសិតជាបន្តបន្ទាប់ទៀត វីរកីឡាការិនីទាំង ៣ នាក់របស់កម្ពុជានេះ រកបានពិន្ទុជាបន្តបន្ទាប់ ដើម្បីយកឈ្នះក្រុមឡេតូនី ១៣-៣ នៅក្នុងការប្រកួតបើកឆាកលើវិញ្ញាសា ៣ នាក់ ទល់ ៣ នាក់នេះ ហើយជ័យជម្នះនេះ បានជួយឲ្យក្រុមនារីកម្ពុជា ទទួលបានភាពកក់ក្តៅមួយកម្រិតទៀត ក្នុងការបន្តប្រកួតក្នុងវគ្គជម្រុះនេះ ដើម្បីស្វែងរកឱកាសឡើងទៅវគ្គបន្ត។
ជាមួយគ្នានេះកីឡាការិនី កែ ឡេង បានឡើងទៅវគ្គ ៨ នាក់ចុងក្រោយ នៃការវាយយកពិន្ទុផ្នែកស្រ្តី ដោយអ្នកស្រីធ្វើបាន ៣៨ ពិន្ទុ ដើម្បីឈរនៅលេខ ១ ប៉ុន្តែកីឡាករ ឃួន លីហួរ បានធ្លាក់ក្នុងការប្រកួតដំណាក់កាលទី ១ ដោយធ្វើបានត្រឹម ២៨ ពិន្ទុ ហេតុនេះ លីហួរ នឹងប្រកួតដំណាក់កាលទី ២ នៅថ្ងៃនេះ រវាងអ្នកបានលេខ ៥ ដល់លេខ ១៧ ដើម្បីយក ៤ នាក់ ឡើងទៅវគ្គ ៨ នាក់ចុងក្រោយ។
គួរបញ្ជាក់ថា ការតវ៉ារបស់បណ្តាប្រទេសមួយចំនួន នៅក្នុងកិច្ចប្រជុំរវាងបណ្តាប្រទេសចូលរួមទាំង ៤៩ នៅក្នុងការប្រកួតកីឡាប៉េតង់ជើងឯកពិភពលោកយុវជន និងស្រ្តី លើកទី ១៧ នេះ កាលពីព្រឹកថ្ងៃអង្គារនោះ បានធ្វើឲ្យម្ចាស់ផ្ទះកម្ពុជា បាត់បង់ភាគរយក្នុងការប្រជែងយកមេដាយ លើវិញ្ញាសាវាយយកពិន្ទុ ទាំងផ្នែកនារី និងយុវជននេះ។
តាមរយៈការតវ៉ានោះ គណៈកម្មការរៀបចំការប្រកួតពិសេសថ្នាក់ដឹកនាំសហព័ន្ធកីឡាប៉េតង់អន្តរជាតិ បានឯកភាពកែប្រែលក្ខខណ្ឌប្រកួតភ្លាមៗ លើវិញ្ញាសាវាយយកពិន្ទុនេះ ដោយកំណត់ឲ្យកម្ពុជា ដាក់បានតែអត្តពលិក ១ ម្នាក់ប៉ុណ្ណោះ ឲ្យចូលរួមការប្រកួតវាយយកពិន្ទុ ទាំងផ្នែកស្រ្តី និងយុវជន ដូចបណ្តាប្រទេសជាភ្ញៀវដែរ ខណៈការឯកភាពគ្នាកន្លងមក គឺម្ចាស់ផ្ទះមានសិទ្ធិដាក់អត្តពលិក ២ នាក់ ក្នុង ១ វិញ្ញាសា។ យ៉ាងណាក៏ដោយ សម្រាប់ការប្រកួតជាក្រុម គឺកម្ពុជានៅតែអាចដាក់បាន ២ ក្រុមចូលរួម ទាំងការប្រកួត ៣ នាក់ ទល់ ៣ នាក់ផ្នែកស្រ្តី និង ៣ នាក់ ទល់ ៣ នាក់ ផ្នែកយុវជន។
លោក ស សុខា ប្រធានសហព័ន្ធកីឡាប៊ូល និងប៉េតង់កម្ពុជាបានថ្លែងនៅក្នុងពិធីបើកការប្រកួតកាលពីរសៀលថ្ងៃអង្គារនោះថា៖ «ក្រៅពីការឈ្នះ និងចាញ់ ការប្រកួតនេះ ផ្តោតលើកិច្ចសហប្រតិបត្តិការការប្រាស្រ័យទាក់ទង និងមិត្តភាព ក្នុងគោលបំណងភ្ជាប់ទំនាក់ទំនងរវាងជាតិសាសន៍ និងភាសាផ្សេងៗគ្នា ដើម្បីចែករំលែកចក្ខុវិស័យរួម សម្រាប់ភាពសុខដុមនៃក្រុមគ្រួសារកីឡាប៉េតង់ ហើយកម្ពុជាពិតជាមានកិត្តិយសណាស់ដែលត្រូវបានផ្តល់ឱកាសឲ្យធ្វើជាប្រទេសម្ចាស់ផ្ទះលើកដំបូងនេះ»។
តាមរបាយការណ៍លោក សុខ សប្បាយណា អគ្គលេខាធិការសហព័ន្ធកីឡាប៊ូល និងប៉េតង់កម្ពុជាបានឲ្យដឹងថា ការប្រកួតជើងឯកពិភពលោកនេះ មាន ៤៩ ប្រទេសចូលរួម ក្នុងនោះមានក្រុមស្រ្តី ៥០ ក្រុម និងក្រុមយុវជន ៣០ ក្រុម ដែលមានអត្តពលិកសរុប ៤៤៩ នាក់ ហើយអ្នកទាំងនេះ ត្រូវប្រកួតលើវិញ្ញាសាវាយពិន្ទុ និង ៣ នាក់ ទល់ ៣ នាក់ ទាំងផ្នែកស្រ្តី និងយុវជនដូចគ្នា ដែលដំណើរការពីថ្ងៃទី ១៩ ដល់ថ្ងៃទី ២៣ ខែ វិច្ឆិកា ឆ្នាំ ២០១៩៕
