ភ្នំពេញ៖ កីឡាករដែលកំពុងតែមានប្រជាប្រិយភាពខ្លាំង សូត្រ ប៊ុនធី ត្រូវបានដាក់ឲ្យប្រកួតជាមួយអ្នកចំណូលថ្មីរបស់ថៃ Vinai Lek ក្នុងទម្ងន់ ៦៣,៥ គីឡូក្រាម នៅលើសង្វៀន SEATV នារសៀលថ្ងៃសៅរ៍នេះ ហើយអ្នកប្រដាល់ជើងចាស់ ផាវ ភឿក ដែលបានទៅធ្វើជាទាហាននៅព្រំដែនខេត្តព្រះវិហារនោះ បានស្នើសុំឡើងប្រកួតជាថ្មី ដោយត្រូវជួបជាមួយអតីតគូប្រកួតជើងចាស់ នន់ ជំនិត ក្នុងទម្ងន់ ៧០ គីឡូក្រាម ដើម្បីបានតម្លៃខ្លួនជួយជីវភាពប្រចាំថ្ងៃដែលកំពុងតែលំបាកក្រីក្រ។
អ្នកប្រដាល់ សូត្រ ប៊ុនធី ដែលមានរហស្សនាម «មេទ័ព» គឺមួយរយៈនេះ ទទួលបានលទ្ធផលឈ្នះជានិច្ចជាមួយកីឡាករបរទេស ហើយសេវាប្រកួតសឹងតែរាល់សប្តាហ៍ ហើយគេជាជើងខ្លាំងមួយរូប ដែលមានទេពកោសល្យក្នុងការប្រើជង្គង់ និងកែងបានល្អ ដើម្បីយកឈ្នះគូប្រកួត និងធ្លាប់ឈ្នះខ្សែក្រវាត់ចំនួន ២ ស្ថាប័នកន្លងមក។
សម្រាប់នៅក្នុងស្រុក ក្នុងទម្ងន់ ៦៣,៥ គ.ក្រនេះ ប៊ុនធី លំបាករកដៃគូណាស់ ហើយកីឡាករបរទេសជាច្រើនបានសន្លប់ក្រោមជង្គង់ និងកែងរបស់គេ។ ប៊ុនធី ធ្លាប់ប្រកួត ១១៨ ដង ឈ្នះ ៩១ ចាញ់ ២២ និងស្មើ ៥ ដង ចំណែកដៃគូរបស់គេ Vinai Lek មិនធ្លាប់មកប្រកួតនៅកម្ពុជាទេ ហើយថៃម្នាក់នេះ ធ្លាប់ប្រកួត ៨៧ ដង ឈ្នះ ៧៦ និងចាញ់ ១១ ដង។
លោក សួន ប៊ុនសូត្រ ជាគ្រូបង្វឹក បាននិយាយថា៖ «ប៊ុនធី ហ្វឹកហាត់បានល្អ តែការប្រកួតនេះមិនទាន់ហ៊ានថាយ៉ាងណាទេ ព្រោះមិនធ្លាប់ឃើញកីឡាករថៃជាដៃគូនៅឡើយទេ។ ទោះយ៉ាងណា យើងមានសង្ឃឹមឈ្នះ ៨០ ភាគរយ លើកីឡាករថៃ ព្រោះថៃមកប្រកួតស្រុកខ្មែរភាគច្រើន មិនដែលយកកីឡាករខ្លាំងបំផុត មកប្រកួតទេ ដោយសារអ្នកខ្លាំងមានតម្លៃខ្លួនខ្ពស់ណាស់»។
ចំណែកលោក ថៃ អ៊ូ អ្នកដឹកនាំកីឡាករបរទេសមកប្រកួតនៅសង្វៀន SEATV បានប្រាប់ថា៖ «កីឡាករ Vinai Lek ល្អកម្រិតមធ្យមនៅប្រទេស ថៃ ប៉ុន្តែសមត្ថភាពត្រឹម សូត្រ ប៊ុនធី អាចទប់ទល់គ្នាបានល្អមើល ប៉ុន្តែរឿងចាញ់ ឬឈ្នះមិនទាន់ហ៊ាននិយាយមុនទេ វាស៊ីសងប្រកួតជាក់ស្តែង»។
ដោយឡែកអ្នកប្រដាល់ជើងចាស់ ផាវ ភឿក ដែលឆ្លងខេត្តមកពីព្រះវិហារ មកជ្រកកោននៅក្លិបគុហារព្រហ្មជ័យខេត្តសៀមរាបបានសុំឡើងប្រកួតជាមួយជើងចាស់ដូចគ្នាគឺ នន់ ជំនិត របស់ក្លិបស្វាយរលំមានរិទ្ធ ហើយអ្នកប្រដាល់វ័យចំណាស់ទាំង ២ នេះ គេប្រើស្នៀត និងល្បិចបច្ចេកទេសច្រើនជាងប្រើកម្លាំង។
ផាវ ភឿក និយាយថា៖ «នៅឆ្នាំ ២០២០ នេះ ខ្ញុំបានសុំមេបញ្ជាការហ្វឹកហាត់ជាប្រចាំនៅខេត្តសៀមរាប ដើម្បីសុំឡើងប្រកួតខ្លះយកប្រាក់បង្គ្រប់ជីវភាពចិញ្ចឹមប្រពន្ធ និងកូនចំនួន ២ នាក់ដែលលំបាក។ ក្នុងឆ្នាំនេះ ខ្ញុំបានឡើងប្រកួត ៥ លើកហើយ ពិសេសពីប្រកួតចុងក្រោយបានឈ្នះ វិរៈ ឆ័យ និងកាល ២ សប្តាហ៍មុន គេមិនប្រកាសលទ្ធផលពេលប្រកួតជាមួយ សល់ ពិសិដ្ឋ»។
កីឡាកររូបនេះ បានបន្ថែមថា៖ «ការប្រកួតរបស់ខ្ញុំ មិនសូវល្អទេ ហើយក៏គ្មានរំពឹងថា បានប្រកួតជាមួយកីឡាករបរទេសដែរ ពីព្រោះកម្លាំងខ្សោយតាមវ័យ ប៉ុន្តែខ្ញុំចង់ឡើងប្រកួត ដើម្បីបានប្រាក់តម្លៃខ្លួន ដែលគេកំណត់ឲ្យត្រឹមចាញ់ ៣៥ ម៉ឺនរៀល និងឈ្នះ ៤០ ម៉ឺនរៀលប៉ុណ្ណោះ ហើយខ្ញុំសូមអរគុណដល់មេបញ្ជាការខ្ញុំ និងបងៗសហព័ន្ធកីឡាប្រដាល់គុនខ្មែរ ព្រមទាំងគណៈកម្មការរៀបចំប្រកួត ដែលតែងផ្តល់ឱកាសឲ្យខ្ញុំបានឡើងប្រកួត ដើម្បីបានលុយខ្លះជូនកូនៗ ដែលកំពុងរៀនមានការខ្វះខាតយ៉ាងខ្លាំង»៕