ភ្នំពេញ: ឆ្លងកាត់ការប្រកួតវគ្គជម្រុះសន្សំពិន្ទុខ្សែក្រវាត់ខារ៉ាបាវទម្ងន់ ៦០ គីឡូក្រាមអស់រយៈពេល ៦ សប្តាហ៍កន្លងមក កីឡាករពូលខាងកម្ពុជា ៣ នាក់ រួមមានកីឡាករលី ភា, ឃីម បូរ៉ា និងកីឡាករជើងខ្លាំងសុខ សាវិន មកពីឆ្មាសសែនជ័យ សុទ្ធតែចាញ់កីឡាករថៃ ១ ប្រកួតដូចគ្នា។
លទ្ធផលដែលបង្ហាញទិន្នន័យពិន្ទុរបស់ពួកគេទាំង ៣ នៅតែស្មើគ្នានៅឡើយ ដោយត្រូវរង់ចាំលទ្ធផលប្រកួតនៅថ្ងៃសៅរ៍ ទី ២០ ខែតុលា សប្តាហ៍នេះរវាងកីឡាករសូត្រ ប៊ុនធី មកពីបក្សីស្លាបដែកនៃសមាគមប្រដាល់ក្រសួងមហាផ្ទៃ ជាមួយជើងខ្លាំងថៃ Phat Maha ទើបអាចកំណត់ជោគវាសនាថា កីឡាករប្រដាល់រូបណាមានពិន្ទុឈរនៅលំដាប់កំពូលតារាងខាងកីឡាករកម្ពុជា។
ទោះបីពួកគេនៅមានពិន្ទុស្មើគ្នា ប៉ុន្តែបើគិតជាទិន្នន័យដែលទទួលបានគឺការប្រជែងគ្នាស្រួចស្រាលដូចពាក្យចាស់ថា ១ ចានទឹក ១ ចានគោក ខណៈនៅសល់តែ សូត្រ ប៊ុនធី និងសុខ សាវិន ប៉ុណ្ណោះដែលត្រូវចាំអ៊ុតលទ្ធផលក្នុងសប្តាហ៍នេះ។
តាមប្រវត្តិប្រកួតគិតតែក្នុងអំឡុងខ្សែក្រវាត់ខារ៉ាបាវនេះ កីឡាករសុខ សាវិន ឈ្នះ ២ ប្រកួត ក្នុងនោះផ្តួលកីឡាករថៃឲ្យសន្លប់មុនស្នូរជួងទឹកទី ៥ និងចាញ់ ១ ប្រកួតគឺចាញ់កីឡាករជើងខ្លាំងថៃ Phat Maha។
ចំណែកសូត្រ ប៊ុនធី បានឈ្នះកីឡាករថៃ ២ ប្រកួតដូចគ្នា ប៉ុន្តែនៅរង់ចាំការប្រកួតថ្ងៃសៅរ៍នេះ ហើយបើឈ្នះ Phat Maha រូបគេនឹងមានឱកាសឡើងទៅកំពូលតារាង ប៉ុន្តែប្រសិនបើចាញ់ថៃវិញ សុខ សាវិន នៅតែឈរលំដាប់លេខ ១ ក្នុងពូលដដែលទោះមានពិន្ទុស្មើគ្នាក៏ដោយ។
លោកសួន ប៊ុនសូត្រ គ្រូបង្វឹក និងជាឪពុកបង្កើតរបស់សូត្រ ប៊ុនធី បាននិយាយថា៖ «ការប្រកួតនៅជុំទី ២ នេះគឺប៉ះជាមួយជើងខ្លាំងថៃ Phat Maha ដែលធ្លាប់ឈ្នះសុខ សាវិន ប៉ុន្តែខ្ញុំបានគិតគូររកមធ្យោបាយដើម្បីឈ្នះឲ្យបាន ដើម្បីដណ្តើមយកពិន្ទុឈរលើកំពូលតារាងក្នុងពូលកីឡាករកម្ពុជា»។
លោកសួន ប៊ុនសូត្រ បានបន្តថា៖ «សព្វថ្ងៃប៊ុនធី ហ្វឹកហាត់ជាប្រចាំល្អណាស់ គឺសម្រួចផ្នែកក្បាច់ជង្គង់ ដើម្បីប្រជែងយកចំណាត់ថា្នក់លេខ ១ ក្នុងពូលឈានទៅដល់វគ្គផ្តាច់ព្រ័ត្រ។ អ្វីដែលខ្ញុំគិតថា អាធីមានប្រៀបឈ្នះលើជើងខ្លាំងថៃ Phat Maha ស្នៀតជង្គង់ និងចូលកៀកវ៉ៃកែងតែម្តង ដើម្បីយកប្រៀប និងរំពឹងឈ្នះ ៩០ ភាគរយ»។
សូត្រ ប៊ុនធី បាននិយាយថា៖ «ខ្ញុំប្រឹងដើម្បីយក៣ពិន្ទុឲ្យបានដោយរំពឹងឈ្នះ ៩០ ភាគរយ ដោយមានប្រៀបក្បាច់ជង្គង់ និងកែង។ សូត្រ ប៊ុនធី ប្រកួតបានចំនួន ១១២ លើក ឈ្នះ ៨៨ លើក ចាញ់ ២០ លើក និងស្មើ ៤ លើក ដោយមានកម្ពស់ ១,៧១ ម៉ែត្រ ហើយរូបគេក៏មានបទពិសោធច្រើនជាងកីឡាករថៃដែលភាគច្រើនមក ប្រកួតលាក់ប្រវត្តិផងដែរ។
លោកថៃ អ៊ូ ប្រតិភូនាំកីឡាករថៃមកប្រកួត បាននិយាយថា៖ «គូនេះអាចឈ្នះ ឬចាញ់គ្នាក្នុងលក្ខណៈ តឹងតែងបំផុត ពីព្រោះសមត្ថភាពប្រហាក់ប្រហែលគ្នា ប៉ុន្តែអ្វីដែលមានប្រៀបគឺពេលប្រកួតជាក់ស្តែងដែលជាឱកាសផ្តល់ឲ្យនេះតែម្តង។ ប្រសិនបើពួកគេមិនអាចឈ្នះគ្នាក្នុងបច្ចេកទេសេ លទ្ធផលចាញ់ឈ្នះគឺពឹងផ្អែកលើកម្លាំងប្រកួត ៥ ទឹកពេញ»៕