.jpg)
ពេជ្រ ប៊ុនសិទ្ធ បានទាត់ជើងក្រោមរបស់ ភួន ឡាំកូស៊ីន។ រូបថត ពន្លក
ភ្នំពេញ៖ សិស្សគណក្លិបចលនាយុវជនកម្ពុជា ១៥៧ គុនខ្មែរ ពេជ្រ ប៊ុនសិទ្ធ ដែលកំពុងសាងភាពល្បីក្នុងទម្ងន់ ៥៤ គីឡូក្រាម បានប្រើពេលតែ ២ ទឹកប៉ុណ្ណោះ ក្នុងការផ្ដួលជើងខ្លាំងមកពីជាយដែន ភួន ឡាំកូស៊ីន របស់ក្លិបសាន់យ៉ាន់នាគាខេត្តបន្ទាយមានជ័យ ដោយទាត់ឲ្យខូចជើង ដើម្បីឈ្នះកៅអីឡើងទៅកាន់វគ្គ ៨ នាក់ចុងក្រោយ នៃពានរង្វាន់ TV5 Boxing Knock Out Series។
សម្រាប់ការប្រកួតមានតែ ៣ ទឹក នៅលើសង្វៀនប៉ុស្តិ៍លេខ ៥ កាលពីយប់ថ្ងៃសៅរ៍កន្លងមកនេះ ពេជ្រ ប៊ុនសិទ្ធ និង ភួន ឡាំកូស៊ីន បានចូលវាយសម្រុកគ្នា ដោយគ្មានការបន្ធូរដៃឲ្យគ្នានោះទេ ហើយត្រឹមតែទឹកទី១ ប៉ុណ្ណោះ ឡាំកូស៊ីន ត្រូវបាន ប៊ុនសិទ្ធ ទាត់ជើងក្រោម នាំឲ្យទ្រេតជំហរនៅចុងទឹកបណ្ដាលឲ្យលោកអាជ្ញាកណ្ដាលចាប់រាប់ចំនួន ៨ មុនស្នូរជួងបញ្ចប់ទឹកទី១។
ដោយមើលពីចំណុចខ្សោយរបស់គូប្រកួតបែបនេះ ប៊ុនសិទ្ធ បានចូលទាត់បន្ថែមផ្ទួនៗ នៅក្នុងទឹកទី២ រហូតបណ្ដាលឲ្យ ភួន ឡាំកូស៊ីន បាត់បង់សមត្ថភាព ដោយខូចជើងងើបលែងរួច ហើយអាជ្ញាកណ្តាលបានប្រគល់ជ័យជម្នះឲ្យកីឡាករ ពេជ្រ ប៊ុនសិទ្ធ តែម្តង។
តាមរយៈការផ្តួល ភួន ឡាំកូស៊ីន ត្រឹមទឹកទី២ នេះ បានធ្វើឲ្យ ពេជ្រ ប៊ុនសិទ្ធ កាន់តែលេចធ្លោ និងមានកំណត់ត្រាកាន់តែល្អ គឺឈ្នះជាដរាបតែម្តង ក្នុងប្រភេទទម្ងន់ ៥៤ គីឡូក្រាមនេះ ហើយបើតាមរូបមន្តប្រកួត ពេជ្រ ប៊ុនសិទ្ធ នឹងត្រូវឡើងទៅជួប រិន ដេវីដ ក្នុងជុំទី ២ ឬវគ្គ ៨ នាក់ចុងក្រោយ ខណៈកន្លងមក ប៊ុនសិទ្ធ មិនទាន់ស្គាល់ពាក្យថា ឈ្នះ រិន ដេវីដ ម្តងនោះឡើយ។
នៅពេលសួរពីបញ្ហានេះ ពេជ្រ ប៊ុនសិទ្ធ បានប្រាប់ក្រោយការប្រកួតថា៖ «ខ្ញុំមិនទាន់ហ៊ាននិយាយដល់វគ្គទី២ ទេ ព្រោះត្រូវហ្វឹកហាត់បន្ថែមសិន។ ចំណែកការផ្តួល ភួន ឡាំកូស៊ីន លើកនេះ គឺខ្ញុំមើលឃើញពីចំណុចខ្សោយជើងក្រោមរបស់គេ ហើយខ្ញុំក៏សម្រុកទាត់តែម្តង»។
ចំណែក លោក ពេជ្រ សុផាន់ គ្រូបង្វឹក ប៊ុនសិទ្ធ និយាយថា៖ «កន្លងមក ប៊ុនសិទ្ធ ធ្លាប់ចាញ់ រិន ដេវីដ ប្រហែល ៤ ទៅ ៥ លើក គឺមិនដែលឈ្នះសោះ ប៉ុន្តែចាញ់ត្រឹមពិន្ទុប្រផិតប្រផើយ ហើយបើជួបគ្នាលើកក្រោយ យើងនឹងពង្រឹងសមត្ថភាពផ្នែកកម្លាំង និងស្នៀតជង្គង់ ដើម្បីយកឈ្នះវិញ ព្រោះការប្រកួតបើសមត្ថភាពប្រហាក់ប្រហែលគ្នា យើងត្រូវរកបច្ចេកទេសថ្មីទប់ទល់»។
យ៉ាងណាមិញ ភួន ឡាំកូស៊ីន បាននិយាយក្រោយពេលប្រកួតថា៖ «ខ្ញុំចាញ់ដោយអស់ចិត្ត ព្រោះខូចជើងងើបមិនរួច ដោយទទួលរងនូវការទាត់ផ្ទួនៗ គឺត្រូវច្រើនពេក គេចមិនផុត ហើយនៅក្នុងការប្រកួតជាមួយ ប៊ុនសិទ្ធ នេះ ខ្ញុំធ្លាប់ឈ្នះពិន្ទុគាត់បានម្តង និងចាញ់សន្លប់គាត់ចំនួន ២ ដង»។
ដោយឡែក ចំពោះលទ្ធផលការប្រកួតគូមិត្តភាពវិញ ជើងថ្មី លន់ សៀកឡេង មកពីក្លិបថ្នល់ទទឹងគុនខ្មែរ បានឈ្នះជើងចាស់ ងួន គា របស់ក្លិបតាឡីដំរីមានរិទ្ធ ដោយពិន្ទុក្នុងលក្ខណៈជក់ចិត្តបំផុត។ រីឯជើងថ្មី ធន់ ស៊ីម៉ូវ ត្រូវបានអ្នកប្រដាល់ ម៉ន ភារម្យ ក្លិបការិយាល័យទី ៥ កងទ័ពជើងគោក ប្រើជង្គង់វាយឲ្យសន្លប់មុនស្នូរជួងបញ្ចប់ទឹកទី៣ ហើយ តុប ផេង ក្លិបកុលបុត្រគុនខ្មែរ បានត្រឹមស្មើពិន្ទុជាមួយជើងថ្មីដូចគ្នាគឺ សូដា លីម៉ូ។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ ដែលមានវត្តមានផ្ទាល់ក្នុងពេលប្រកួតបានថ្លែងប្រាប់ថា៖ «សង្វៀនប៉ុស្តិ៍លេខ ៥ រៀបចំប្រភេទទម្ងន់ ៥៤ គីឡូក្រាមនេះ គឺមានសមត្ថភាពកីឡាករល្អៗណាស់ នាំឲ្យការប្រកួតមានគុណភាពល្អ ចំណែកមន្ត្រីបច្ចេកទេសរបស់យើងក៏អនុវត្តការងារបានកាន់តែប្រសើរជាងមុន»៕
