ភ្នំពេញ៖ សង្វៀនថោនដែលទើបបើកការប្រកួតជាថ្មីវិញ បន្ទាប់ពីបានផ្អាកចំនួន ២ សប្តាហ៍នោះ បានសម្រិតសម្រាំងយកកីឡាករជើងខ្លាំងចំនួន ៤ នាក់ រួមមាន ប៊ុន សុធា, អ៊ូច ធារិទ្ធ, បាង កាយ៉ាក និង បឺត សង្ឃឹម ដើម្បីដាក់ឱ្យប្រកួតម៉ារ៉ាតុងដណ្តើមប្រាក់លានទម្ងន់ ៥៧ គីឡូក្រាម នៅថ្ងៃអាទិត្យនេះ។
នៅក្នុងបេក្ខភាពទាំង ៤ នាក់នេះ កីឡាករ ប៊ុន សុធា, អ៊ូច ធារិទ្ធ និង បាង កាយ៉ាក សុទ្ធតែធ្លាប់ដណ្តើមបានប្រាក់លានពីកម្មវិធីនេះម្នាក់ម្តងរួចមកហើយ គឺលើកលែងតែ បឺត សង្ឃឹម នៅមិនទាន់បានឈ្នះម្តងនៅឡើយ។ តែទោះជាយ៉ាងណា ប៊ុន សុធា ដែលកំពុងល្អខ្លាំងនោះ បែរជាញញើត បឺត សង្ឃឹម ទៅវិញ។
ប៊ុន សុធា បានប្រាប់ថា៖ «នៅក្នុងចំណោមអ្នកប្រដាល់ឆ្នើមទាំង ៣ នេះ ខ្ញុំធ្លាប់ចាញ់ពិន្ទុ បឺត សង្ឃឹម និងស្មើជាមួយ អ៊ូច ធារិទ្ធ តែមិនធ្លាប់ប៉ះ បាង កាយ៉ាក នោះទេ ហេតុនេះបើសិនចាប់ឆ្នោតប៉ះ បឺត សង្ឃឹម គឺលំបាកឈ្នះណាស់ ប៉ុន្តែបើគេចផុតពី បឺត សង្ឃឹម ខ្ញុំរំពឹងឈ្នះដល់ទៅ ៩០ ភាគរយ គឺខ្ញុំរំពឹងថា នឹងឈ្នះបានប្រាក់លានម្តងទៀត»។
ចំណែកលោក ធន់ សុភា គ្រូបង្វឹក ប៊ុន សុធា បានប្រាប់ថា៖ «ខ្ញុំគិតឃើញដូច ប៊ុន សុធា ដែរ គឺ បឺត សង្ឃឹម ជាឧបសគ្គធំ ចំណែក ២ នាក់ទៀត ខ្ញុំគិតថា យើងអាចឆ្លងផុត និងយកឈ្នះបាន។ យ៉ាងណាក៏ដោយ ខ្ញុំរំពឹង ៨០ ភាគរយថា ប៊ុន សុធា នឹងឈ្នះការប្រកួតទាំងវគ្គជម្រុះ និងវគ្គផ្តាច់ព្រ័ត្រ ដើម្បីបានប្រាក់លានម្តងទៀត»។
ផ្ទុយទៅវិញ សម្រាប់កីឡាករ អ៊ូច ធារិទ្ធ មិនបានបារម្ភជាមួយ បឺត សង្ឃឹម និង បាង កាយ៉ាក នោះទេ ប៉ុន្តែគេបានចាត់ទុក ប៊ុន សុធា ជាឧបសគ្គធំ។ ធារិទ្ធ បាននិយាយថា៖ «ចំពោះ បឺត សង្ឃឹម និង បាង កាយ៉ាក ខ្ញុំមិនបារម្ភទេ អាចឈ្នះបាន ប៉ុន្តែ ប៊ុន សុធា តឹងតែងណាស់ ព្រោះខ្ញុំធ្លាប់ស្មើជាមួយគេម្តងហើយ។ បើចាប់ឆ្នោតមិនជួប ប៊ុន សុធា ខ្ញុំមានទំនុកចិត្ត ៩០ ភាគរយ និងឈ្នះបានប្រាក់លាននេះទៀត»។
នៅក្នុងចំណោមបេក្ខភាពទាំង ៤ នាក់នេះ អ៊ូច ធារិទ្ធ ធ្លាប់មានបទពិសោធប្រកួតបានច្រើនជាងគេ បន្ទាប់មក បឺត សង្ឃឹម និង បាង កាយ៉ាក។ តាមពិត អ៊ូច ធារិទ្ធ ជាអ្នកប្រដាល់ជម្រើសជាតិប្រដាល់សកលទេ ហើយក៏ជាបេក្ខភាពត្រៀមទៅប្រកួតស៊ីហ្គេមនៅវៀតណាមចុងឆ្នាំ ២០២១ នេះផងដែរ ប៉ុន្តែដោយសារជីវភាពមានការខ្វះខាតខ្លាំង ទើបរូបគេសុំឡើងប្រកួតប្រដាល់គុនខ្មែរបានខ្លះ ដើម្បីរកប្រាក់បន្ថែមដល់គ្រួសារ។
ចំណែក លោក បឺត សំខាន់ គ្រូបង្វឹក បឺត សង្ឃឹម បាននិយាយថា៖ «ខ្ញុំមិនហ៊ានទស្សន៍ទាយទេ ព្រោះ ៣ នាក់ទៀតនោះ គេខ្លាំងៗ ធ្លាប់ឈ្នះពាន និងខ្សែក្រវាត់ផងដែរ។ ទោះជាយ៉ាងណា កូនសិស្សខ្ញុំឡើងសង្វៀន ដឹងតែធានាវ៉ៃអស់ពីសមត្ថភាព ប៉ុន្តែមិនហ៊ានរំពឹងឈ្នះច្រើនទេ ព្រោះត្រូវប៉ះសុទ្ធតែកំពូលកីឡាករលំដាប់ល្អជួរមុខ»។
ចំពោះលោក អេ ភូថង គ្រូបង្វឹក បាង កាយ៉ាក មិនអាចទាក់ទងបានទេ ប៉ុន្តែកីឡាកររូបនេះ បើបានហាត់ត្រឹមត្រូវ ប្រកួតអស់ពីសមត្ថភាពវិញ ពិតជាអស្ចារ្យណាស់ ព្រោះមានក្បាច់ជង្គង់ល្អ ប៉ុន្តែពេលខ្លះ បាង កាយ៉ាក ក៏បានចាញ់ក្នុងលក្ខណៈផុយស្រួយពេកដែរ នាំឱ្យអ្នកទស្សនាមិនសូវចូលចិត្ត។
គណៈកម្មការផ្គូផ្គង លោក ជួប វុត្ថា បាននិយាយថា៖ «សមត្ថភាពអ្នកទាំង ៤ នាក់នេះ មានការលេចធ្លោ ៣ នាក់ ចំណែក បាង កាយ៉ាក ត្រូវបានគេមើលឃើញថា ទំនងខ្សោយជាងគេបន្តិច ប៉ុន្តែយើងមិនអាចមើលរំលងបានទេ ព្រោះខ្ញុំបានជំរុញឱ្យគ្រូរបស់កីឡាករ បាង កាយ៉ាក ត្រូវបង្វឹកត្រៀមឱ្យបានល្អ អ៊ីចឹងយើងធានាថា បេក្ខភាពទាំង ៤ នាក់ ក្នុងសប្តាហ៍នេះ នឹងវ៉ៃគ្នាអស់ពីសមត្ថភាព គឺល្អណាស់»៕