ភ្នំពេញ៖ កីឡាករជើងខ្លាំងវ័យក្មេង ប៊ុន សុធា បានបង្ហាញការជឿជាក់ថា ការព្យាយាមហ្វឹកហាត់យ៉ាងខ្លាំងនឹងជួយឲ្យរូបគេអាចយកឈ្នះលើ អេលីត ចំរើន នៅក្នុងការប្រកួតវគ្គពាក់កណ្តាលផ្តាច់ព្រ័ត្រនៅលើសង្វៀន PNN នារសៀលថ្ងៃអាទិត្យនេះ ដើម្បីបានឡើងទៅប្រកួតផ្តាច់ព្រ័ត្រដណ្តើមយកខ្សែក្រវាត់មាសអមជាមួយប្រាក់រង្វាន់ ១ ម៉ឺនដុល្លារ ប៉ុន្តែ ចំរើន ក៏បានប្តេជ្ញាចិត្ត និងខំប្រឹងស្វែងរកឱកាសនេះដូចគ្នា។
នៅមុនពេលឡើងមកជួបគ្នានៅវគ្គនេះ ទាំង ប៊ុន សុធា និង អេលីត ចំរើន សុទ្ធតែបានឈ្នះខ្សែក្រវាត់ប្រាក់ អមជាមួយប្រាក់រង្វាន់ ៤ លានរៀលរួចហើយ ដោយក្នុងនោះ អេលីត ចំរើន បានផ្តួលថៃ Kompichit ត្រឹមទឹកទី៣ រីឯ ប៊ុន សុធា បានយកឈ្នះ ឃួន ឡាំងកូស៊ីន។ ចំណែកការប្រកួតលើកនេះ កាន់តែសំខាន់ ព្រោះអ្នកឈ្នះនឹងបានឡើងទៅប្រកួតយកខ្សែក្រវាត់មាស ដែលអាចជួបជាមួយ វ៉ាន់ វឿន ឬ អេ ណារ័ត្ន ដោយអ្នកទាំង ២ នេះ នឹងប្រកួតគ្នានៅថ្ងៃទី ២១ ខែមិថុនា។
ប៊ុន សុធា បានប្រាប់កាលពីម្សិលមិញថា៖ «ខ្ញុំត្រៀមបាន ១០០ ភាគរយទាំងទៅលើកម្លាំងបច្ចេកទេស និងកលល្បិចប្រកួត ហើយការប្រឹងប្រែងនេះធ្វើឲ្យខ្ញុំមានសង្ឃឹមដល់ ៧០ ភាគរយ ក្នុងការយកឈ្នះ អេលីត ចំរើន។ ខ្ញុំដឹងថា សមត្ថភាព និងបច្ចេកទេសប្រកួតរបស់ខ្ញុំ និងចំរើន ប្រហាក់ប្រហែលគ្នាទេ ប៉ុន្តែខ្ញុំបានតាំងចិត្តថា នឹងព្យាយាមយកឈ្នះ ដើម្បីបានទៅប្រកួតដណ្តើមខ្សែក្រវាត់មាស»។
យ៉ាងណាក៏ដោយ សិស្សគណមកពីសមាគមកីឡាប្រដាល់កងយោធពលខេមរភូមិន្ទ ប៊ុន សុធា បានចាត់ទុកការវាយបែបដកថយរបស់ អេលីត ចំរើន គឺអាចជារឿងលំបាកមួយចំពោះ រូបគេក្នុងការចូលវាយលុក ព្រោះបើសិនជារូបគេជម្នះខ្លាំងក្នុងការចូលកៀក ដើម្បីបានប្រើជង្គង់ និងកែងនោះ ក៏អាចនឹងភ្លាត់ស្នៀត ឬមានគ្រោះថ្នាក់ក្រោមការទាត់ និងម៉ាត់ជាប្រយោលរបស់ ចំរើន ផងដែរ។
កូនសិស្សលោក ធន់ សុភា រូបនេះ បាននិយាយថា៖ «ខ្ញុំចូលចិត្តវាយជាមួយអ្នកចូលចិត្តវ៉ៃប្តូរ ប៉ុន្តែការជួបជាមួយអ្នកមានជំនាញវាយដកថយៗដូច អេលីត ចំរើន ខ្ញុំអាចមានការពិបាកចូលវាយលុកដែរ។ យ៉ាងណាក៏ដោយ ខ្ញុំនឹងព្យាយាមស្វែងរកវិធីសាស្រ្តដោះស្រាយ ដោយខ្ញុំនឹងប្រែប្រួលបច្ចេកទេសប្រកួត ទៅតាមកាលៈទេសៈជាក់ស្តែងនៅពេលប្រកួតលើសង្វៀនតែម្តង»។
វាដូចគ្នាទៅនឹងអ្វីដែល ប៊ុន សុធា បានត្រៀមទុកមុនដូច្នេះដែរ គឺការប្រកួតនេះ អេលីត ចំរើន នឹងមិនប្រកាន់យកការចូលវាយលុកនោះទេ ព្រោះរូបគេមានការបារម្ភទៅលើស្នៀតកែងរបស់ សុធា។ «ខ្ញុំបានត្រៀមគ្រប់បែបយ៉ាង អស់រយៈពេល ១ ខែមកហើយ ប៉ុន្តែខ្ញុំសង្ឃឹមត្រឹម ៥០ ភាគរយសិនបានហើយ ព្រោះការប្រកួតវាអាចនឹងមានការករណីភ្លាត់ស្នៀត ហើយខ្ញុំឃើញថា ប៊ុន សុធា មានផ្លែកែងល្អ»។
យ៉ាងណាក៏ដោយ សិស្សគណក្លិបប៉ែនកាក់គុនខ្មែរ អេលីត ចំរើន បានបន្ថែមថា៖ «បើទោះបីជាគេល្អក្បាច់អីក៏ដោយ សំខាន់យើងពង្រឹងគុណភាពកម្លាំងរបស់យើងឲ្យតែល្អទៅ គឺទប់បានហើយ ហើយគិតមកដល់ពេលនេះ ខ្ញុំបានពង្រឹងរួចរាល់អស់ហើយ ហេតុនេះខ្ញុំអាចដកថយ រួចម៉ាត់ និងទាត់ ដោយសង្ឃឹមថា ខ្ញុំនឹងធ្វើបានល្អ តែខ្ញុំមិនព្យាយាមចូលវាយកៀកជាមួយគេនោះទេ»។
កីឡាករដែលទើបសាងបានភាពល្បីក្នុងឆ្នាំ ២០១៩ អេលីត ចំរើន បានបញ្ជាក់ថា៖ «ខ្ញុំធ្លាប់ឈ្នះបានខ្សែក្រវាត់ម្តង ក្រោយឈ្នះ ម៉ន សាម៉េត នៅសង្វៀន One TV ប៉ុន្តែខ្សែក្រវាត់មាសនេះ មានលុយច្រើន អ៊ីចឹងវគ្គនេះ វាសំខាន់បំផុតចំពោះខ្ញុំ។ ការចាញ់ឬឈ្នះ យើងនៅមិនទាន់ដឹងទេ គ្រាន់តែថា លើកនេះ ខ្ញុំហាត់ខ្លាំងជាងធម្មតា គឺហាត់ពេញ ១០០ ភាគរយ ហើយលោកគ្រូ ស៊ន អេលីត ក៏បានជំរុញខ្ញុំ ធ្វើឲ្យមានកម្លាំងចិត្តហាត់កាន់តែខ្លាំង និងខំប្រឹងប្រកួតឲ្យបានល្អ»៕