ក្រុងស៊ាងហៃ៖ កីឡាករលំដាប់កំពូលៗ បាននិយាយថា ពួកគេមានអារម្មណ៍អន្ទះអន្ទែង និងភាំងៗបន្តិច តែរំភើបពេលការប្រកួតវាយកូនឃ្លីលើតុអន្តរជាតិបានត្រឡប់មកវិញ នៅសប្ដាហ៍នេះ ក្នុងប្រទេសចិន ក្រោយផ្អាករយៈពេល ៨ ខែ ដោយសារការផ្ទុះឡើងនូវវីរុសកូរ៉ូណា។
កម្មវិធី World Cup ផ្នែកនារីបានចាប់ផ្ដើមកាលពីថ្ងៃអាទិត្យ ជាមួយនឹងការរៀបចំដោយបិទទ្វារ នៅក្រុងឆ្នេរភាគខាងកើតនៃទីក្រុង Weihai ដោយមានអ្នកចូលរួម ២១ នាក់ មកពីទូទាំងពិភពលោក ដែលត្រូវប្រកួតប្រជែងគ្នារយៈពេល ៣ ថ្ងៃ ហើយបន្ទាប់មកតាមដោយព្រឹត្តិការណ៍ ២ ផ្សេងទៀត របស់សហព័ន្ធវាយកូនឃ្លីលើតុអន្តរជាតិ (ITTF) នៅប្រទេសចិនដីគោក។
ការប្រកួតប្រជែងដ៏មានកិតិ្តនាមនេះ ទទួលបានអត្ថន័យទ្វេដង ដោយសារការរាតត្បាតនៃជំងឺប៉ះពាល់យ៉ាងធ្ងន់ធ្ងរដល់វិស័យកីឡាទាំងអស់ ហើយប្រទេសចិន ទំនងជាធ្វើការលើកលែង ដែលកម្រនឹងមានមួយ ដោយសារបាននិយាយកាលពីខែកក្កដា ថា នឹងមិនធ្វើជាម្ចាស់ផ្ទះរៀបចំព្រឹត្តិការណ៍កីឡាអន្តរជាតិជាដាច់ខាតនៅចុងឆ្នាំនេះ។
ព្រឹត្តិការណ៍នេះ ក៏ជាឱកាសដ៏ធំផងដែរសម្រាប់អត្តពលិកឆ្នើមនៃកីឡានេះ ក្នុងការស្ដារថាមពលប្រកួតប្រជែងរបស់ពួកគេឡើងវិញ ហើយធ្វើការដណ្ដើមពិន្ទុសម្រាប់ចំណាត់ថ្នាក់ពិភពលោក ខណៈពួកគេរង់ចាំកីឡាអូឡាំពិក នាក្រុងតូក្យូ ប្រទេសជប៉ុន ដែលត្រូវលើកទៅរៀបចំឆ្នាំក្រោយ។
«សូម្បីនៅមុនការប្រកួត ពួកយើងនិយាយលេងថា គ្រប់គ្នានឹងនឹកការវាយសឺវីស ព្រោះម្នាក់ៗមានអារម្មណ៍អន្ទះអន្ទែងខ្លាំងណាស់»។ នេះជាសម្ដីរបស់កីឡាការិនីសញ្ជាតិអាមេរិក Lily Zhang វ័យ ២៤ ឆ្នាំ ដែលបរាជ័យក្នុងការប្រកួតបើកឆាក ក្រោមថ្វីដៃរបស់គូបដិបក្ខ Margaryta Pesotska របស់អ៊ុយក្រែន។
កីឡាការិនី Zhang បន្តថា៖ «ពិតមិនមានអារម្មណ៍ញាប់ញ័រអ្វីឡើយ ដែលខ្ញុំចាញ់ តែបើគិតវិជ្ជមាន គឺវាអស្ចារ្យណាស់ ដែលខ្ញុំបានមកកាន់ទីនេះ ហើយចូលរួមប្រកួតប្រជែងព្រឹត្តិការណ៍នេះ។ ខ្ញុំគិតថា យើងទាំងអស់គ្នាបានខកខានប្រកួតនៅឆ្នាំនេះ ពោលគឺគ្មានកម្មវិធីប្រកួតប្រជែងអន្តរជាតិអ្វីឡើយ តាំងពីខែមីនា ដូច្នេះយើងមានអារម្មណ៍អន្ទះសារ និងរាងភាំងៗតិចតួច»។
ចិនដែលមានអានុភាពខ្លាំង ក្នុងវិស័យកីឡាវាយកូនឃ្លីលើតុ នឹងធ្វើជាម្ចាស់ផ្ទះផងដែរព្រឹត្តិការណ៍ World Cup ផ្នែកបុរសចុងសប្ដាហ៍នេះ នៅក្រុង Weihai នេះដូចគ្នា ហើយបន្ទាប់មកកម្មវិធី ITTF Finals នៅក្រុង Zhengzhou នាថ្ងៃទី ១៩ ដល់ ២២ ខែវិច្ឆិកា។
លោក Liu Guoliang ប្រធានសហព័ន្ធវាយកូនឃ្លីលើតុចិន និងជាអតីតជើងឯកពិភពលោក និងអូឡាំពិក ហៅកម្មវិធីនេះថា ជាព្រឹត្តិការណ៍ប្រវត្តិសាស្ត្រ។
លោក Guoliang និយាយថា៖ «ក្រោយច្រើនខែ ដោយគ្មានព្រឹត្តិការណ៍ប្រកួតអន្តរជាតិសម្រាប់អត្តពលិកអ្នកគាំទ្រ និងសហគមន៍ទាំងរបស់យើង។ វាជាប្រវត្តិសាស្ត្រ ដែលយើងត្រឡប់មកកាន់ទិដ្ឋភាពជាសកលវិញ»៕ AFP/VN