.jpg)
សកម្មភាពប្រកួតប្រដាល់គុនខ្មែរ ដែលត្រូវបានរៀបចំឡើង នៅតាមសង្វៀនឯកជន នាពេលកន្លងមក។ ភ្នំពេញ ប៉ុសិ៍្ត
ភ្នំពេញ៖ ប្រធានសហព័ន្ធកីឡាប្រដាល់គុនខ្មែរ បានសម្រេចច្បាស់ហើយនូវទីតាំងជាទីលានប្រកួតកីឡាប្រដាល់គុនខ្មែរជ្រើសរើសជើងឯក ឆ្នាំ ២០១៩ ដោយលើកទៅធ្វើនៅឯមជ្ឈមណ្ឌលជាតិកីឡាកងយោធពលខេមរភូមិន្ទ (ស្តាតចាស់) ដែលនឹងប្រព្រឹត្តទៅចាប់ពីថ្ងៃទី ៧ ខែ តុលា ដល់ថ្ងៃទី ១១ ខែ តុលា ឆ្នាំ ២០១៩ ខណៈដែលការប្រកួតត្រូវបានសហការជាមួយទូរទស្សន៍កងយោធពលខេមរភូមិន្ទប៉ុស្តិ៍លេខ ៥ ដើម្បីផ្សាយផ្ទាល់ជូនមហាជនបានទស្សនា ដោយមិនគិតថ្លៃ និងស្វែងរកដៃគូឧបត្ថម្ភបន្ថែម។
ការសម្រេចជាផ្លូវការនេះ ត្រូវបានលោកឧត្តមសេនីយ៍ឯក តែម ម៉ឺន ជាប្រធានសហព័ន្ធកីឡាប្រដាល់គុនខ្មែរបញ្ចាក់ថា ក្រោយប្រជុំរួចរាល់របស់គណៈកម្មាធិការប្រតិបត្តិកាលពីល្ងាចថ្ងៃទី ៣០ ខែ កញ្ញា ឆ្នាំ ២០១៩ ហើយជាមួយគ្នានេះដែរ តាមលោក ម៉ិល កាដូ អគ្គនាយករងនៃអគ្គនាយកដ្ឋានកីឡាអះអាងថា ពហុកីឡដ្ឋានជាតិ (ស្តាតអូឡាំពិក) របស់ជាតិជាប់រវល់ខ្លាំងមិនអាចរៀបចំបាន ទើបប្តូរទៅធ្វើស្តាតចាស់វិញ។
លោក តែម ម៉ឺន បានប្រាប់ភ្នំពេញ ប៉ុស្តិ៍ កាលពីថ្ងៃអង្គារ ម្សិលមិញថា៖ «យើងបានត្រួតពិនិត្យ ការត្រៀមរៀបចំប្រកួតកីឡាប្រដាល់គុនខ្មែរជ្រើសរើសជើងឯកថ្នាក់ជាតិប្រចាំឆ្នាំ ២០១៩ នេះរួចហើយ គឺនឹងប្រារព្ធធ្វើឡើងតាមការកំណត់ ដែលនឹងប្រព្រឹត្តទៅ ចាប់ពីថ្ងៃទី ៧ ខែ តុលាដល់ថ្ងៃទី ១១ ខែ តុលា ឆ្នាំ ២០១៩ ប៉ុន្តែដោយសារពហុកីឡដ្ឋានជាតិជាប់រវល់ការប្រកួត អ៊ីចឹងយើងលើកទៅធ្វើការប្រកួតនៅស្តាតចាស់វិញ។
លោក តែម ម៉ឺន បានបន្ថែមថា ការប្រកួតកីឡាប្រដាល់គុនខ្មែរជ្រើសរើសជើងឯកថ្នាក់ជាតិប្រចាំឆ្នាំ ២០១៩ គិតមកដល់ពេលនេះ យើងទទួលបានការចូលរួមប្រហាក់ប្រហែលឆ្នាំមុន គឺ ១៥ ប្រតិភូ មានមកពីសមាគម ក្រសួង ខេត្ត និងរាជធានី ដែលមានកីឡាករ កីឡាការិនីប្រមាណ ១៥០ នាក់។ ចំណែកការប្រកួតមានចែកជា ៨ ប្រភេទទម្ងន់ សម្រាប់បុរស រួមមានទម្ងន់ ៤៨ គ.ក្រ, ៥១ គ.ក្រ, ៥៤ គ.ក្រ, ៥៧ គ.ក្រ, ៦០ គ.ក្រ, ៦៣.៥ គ.ក្រ, ៦៧ គ.ក្រ និង ៧១ គ.ក្រ។
ជាមួយគ្នានេះ ការប្រកួត នឹងមានសហការជាមួយទូរទស្សន៍ប៉ុស្តិ៍លេខ ៥ ដើម្បីឲ្យមានការផ្សាយផ្ទាល់ នូវគូល្បីៗចែកជូនមហាជនទស្សនា។ បន្ថែមពីលើនេះ សហព័ន្ធកីឡាប្រដាល់គុនខ្មែរ ស្វែងរកដៃគូពីវិស័យ ឯកជន ដើម្បីបានថវិកាមួយចំនួន ជាប្រាក់រង្វាន់បន្ថែម លើប្រាក់របស់ក្រសួងអប់រំ យុវជន និងកីឡា សម្រាប់កីឡាករ កីឡាការិនី ដែលឈ្នះជយលាភីពីចំណាត់ថ្នាក់លេខ ១ ដល់លេខ ៣ ស្ទួនផងដែរ។
ទាក់ទងទៅនឹងសំណួរគួរឲ្យរសើប និងចម្ងល់ពីមជ្ឈដ្ឋានមួយចំនួនថា ពហុកីឡដ្ឋានជាតិ ឬស្តាតអូឡាំពិកកម្ពុជា ដែលជាមជ្ឈមណ្ឌលប្រមូលផ្តុំកីឡាជាតិគ្រប់ប្រភេទ ហេតុអ្វីការប្រកួតថ្នាក់ជាតិប្រចាំឆ្នាំរបស់ក្រសួងអប់រំ យុវជន និងកីឡា ប្រើប្រាស់មិនបាននោះ លោក ម៉ិល កាដូ បានឆ្លើយតបថា ទីតាំងស្តាតជាប់រវល់មមាញឹកខ្លាំងជាន់កម្មវិធីដល់ទៅ ៣ គឺជាប់រវល់ហ្វឹកហាត់ក្រុមជម្រើសជាតិត្រៀមទៅប្រកួតស៊ីហ្គេម លើកទី ៣០ នៅប្រទេស ហ្វីលីពីន ចុងឆ្នាំ ២០១៩ នេះ ប៉ុន្តែការមមាញឹក ២ កម្មវិធីទៀត លោក មិនបានជម្រាបជូននោះឡើយ។
ទោះយ៉ាងនេះក្តី ពហុកីឡដ្ឋានជាតិដែលជាមរតករបស់ជាតិ យ៉ាងចំណាស់នោះ គឺបច្ចុប្បន្ន ត្រូវបានគេយកទៅប្រើប្រាស់ជាប្រយោជន៍ផ្សេងៗក្រៅពីកីឡា ដើម្បីរកប្រាក់ចំណូល ដោយគេប្រើពាក្យថា វិនិយោគមមាញឹកខ្លាំងបំផុត ប៉ុន្តែធាតុពិត អ្វីដែលគេមើលឃើញដោយភ្នែកនោះ គឺផ្ញើឡាន ម៉ូតូយកប្រាក់ ហើយមហាជនមើលឃើញសល់តែតារាងបាល់ទាត់ និងទីលានវិមានពហុកីឡដ្ឋាន និងទីតាំងបន្តិចបន្តួចប៉ុណ្ណោះ ដែលផ្តល់សម្រាប់កីឡាជាតិ គឺមិនច្រើនដូចសម័យមុនៗនោះទេ។ នេះជាមូលហេតុធ្វើឲ្យការប្រកួតជ្រើសរើសជើងឯកថ្នាក់ជាតិ លើប្រភេទកីឡាមួយចំនួនត្រូវស្វែងរកជួលទីតាំងឯកជនដើម្បីប្រកួត៕
