ភ្នំពេញ៖ សហព័ន្ធកីឡាប្រដាល់គុនខ្មែរបានចាប់ផ្តើមបើកវគ្គបណ្តុះបណ្តាលគ្រូបង្វឹក កីឡាប្រដាល់គុនខ្មែរ កម្រិតបឋមជាលើកដំបូង ក្រោមកញ្ចប់ថវិកាឧបត្ថម្ភប្រចាំឆ្នាំរបស់ក្រសួងអប់រំ យុវជន និងកីឡា ដើម្បីឲ្យសិក្ខាកាមជាគ្រូបង្វឹកមានការយល់ដឹងកាន់តែខ្ពស់ទៅលើការងារហ្វឹកហាត់បច្ចេកទេសក្បាច់គុនខ្មែរ ដល់អត្តពលិកឲ្យស្របតាមស្តង់ដាក្នុងការឈានទៅកាន់ការប្រកួតស៊ីហ្គេមលើកទី ៣២ ឆ្នាំ ២០២៣ ដែលកម្ពុជាត្រូវធ្វើជាម្ចាស់ផ្ទះ។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរបានថ្លែងថា សហព័ន្ធបានរៀបចំបើកវគ្គបណ្តុះបណ្តាលគ្រូបង្វឹកកីឡាប្រដាល់គុនខ្មែរកម្រិតបឋមនេះ ដល់គ្រូៗគ្រប់បណ្តាសមាគម ក្លិប ដើម្បីពង្រីកការយល់ដឹងឲ្យកាន់តែខ្ពស់ទៅលើការងារហ្វឹកហាត់បច្ចេកទេសក្បាច់គុនខ្មែរឲ្យបានសមស្របតាមស្តង់ដា ដើម្បីឈានឆ្ពោះទៅស៊ីហ្គេមឆ្នាំ ២០២៣។
លោក តែម ម៉ឺន បានសង្កត់ធ្ងន់ថា៖ «ដោយសារតែវគ្គបណ្តុះបណ្តាលនេះ មានសារៈសំខាន់ អ៊ីចឹងចំពោះសិក្ខាកាម ដែលមិនគោរពវិន័យ និងតាមកម្មវិធីសិក្សានេះ នឹងមិនទទួល-បាននូវវិញ្ញាបនបត្របញ្ជាក់ការសិក្សានោះឡើយ ខណៈវិញ្ញាបនបត្រ ក្នុងវគ្គបណ្តុះបណ្តាលនេះ មានតម្លៃសម្រាប់គ្រូបង្វឹកទាំងអស់ ដើម្បីមានឱកាសបានទៅចូលរួមក្នុងសកម្មភាពកីឡានានា»។
សិក្ខាកាមចំនួន ២៦ នាក់ បានចូលរួមក្នុងវគ្គបណ្តុះបណ្តាលគ្រូបង្វឹកកីឡាប្រដាល់គុនខ្មែរ កម្រិតបឋមនេះ ហើយវគ្គនេះបានចាប់ផ្តើមបើកនៅសាលប្រជុំនាយកដ្ឋានសិស្សនិស្សិតកាលពីថ្ងៃចន្ទ នឹងគ្រោងបញ្ចប់នៅថ្ងៃព្រហស្បតិ៍ខាងមុខនេះ ក្រោមការបង្ហាត់បង្ហាញពីគ្រូឧទ្ទេសចំនួន ១០ នាក់ រួមមានលោក ម៉ិល កាដូ អគ្គនាយករង អគ្គនាយកដ្ឋានកីឡា និងជាអគ្គលេខាធិការសហព័ន្ធប្រដាល់ ដែលចាស់វស្សា និងយូរជាងគេ លោក អ៊ុក ឌីរ៉ង់ លោក ធម្ម អង្គារ៉ា លោក ទុយ ប៊ុនហឿន លោក រាជ សូផែន លោក មាស សុខគ្រី លោក អ៊ិន ខេមរិន្ទ លោក ហង្ស ស៊ឺន លោក ឈិត សារឹម និងលោក ឆឹង យ៉ៅយ៉េន។
លោក និន ភារម្យ ជាអគ្គលេខាធិការដ្ឋានសហព័ន្ធកីឡាប្រដាល់គុនខ្មែរបានឲ្យដឹងថា សហព័ន្ធកីឡាប្រដាល់គុនខ្មែរបានធ្វើការជ្រើសរើសគ្រូបង្វឹកដែលសុទ្ធសឹងជាអ្នកមានសមត្ថភាព និងមានវប្បធម៌កម្រិតមធ្យមឲ្យចូលរួមក្នុងវគ្គនេះ ដើម្បីឲ្យពួកគាត់ទទួលបាននូវចំណេះដឹងផ្នែកបច្ចេកទេសនៃការបង្វឹក រួមមានការងារអប់រំចិត្តសាស្ត្រ និងក្រមសីលធម៌ ការងារប្រយុទ្ធប្រឆាំង និងការប្រើប្រាស់សារធាតុដូប៉ា ក្នុងវិស័យកីឡាប្រដាល់។
លោកបានបន្តថា គ្រូបង្វឹកត្រូវចេះវិធីសាស្ត្របង្ហាត់កម្លាំងកាយ ភាពអំណត់ ភាពទន់ភ្លន់ និងបង្រៀនការធ្វើផែនការហ្វឹកហាត់ការថ្វាយបង្គំគ្រូ ក្បាច់ប្រយុទ្ធ និងការពារ។
ចំណែក លោក មាស សុខគ្រី គ្រូបង្វឹកជើងចាស់ និងជាអគ្គលេខាធិការរងសហព័ន្ធកីឡាប្រដាល់គុនខ្មែរបានប្រាប់ភ្នំពេញ ប៉ុស្តិ៍ ថា៖ «កន្លងមកការបង្វឹក មិនមែនថា មិនល្អទេ ប៉ុន្តែគ្រូមួយចំនួនចេះតៗពីគ្នាមិនបានរៀនសូត្រត្រឹមត្រូវ ហើយវគ្គនេះក៏ជារឿងសំខាន់លើកដំបូង ដែលយើងបង្រៀនការថ្វាយបង្គំគ្រូ តាមទំនៀម និងច្បាប់ត្រឹមត្រូវ ដើម្បីអនុវត្តឲ្យបានល្អ»៕