.jpg)
សិក្ខាកាម បានថតជុំគ្នាជាមួយថ្នាក់ដឹកនាំ និងគ្រូឧទ្ទេស ក្រោយវគ្គបណ្តុះបណ្តាល បានបញ្ចប់។ រូប ពន្លក
ភ្នំពេញ៖ សហព័ន្ធកីឡាប្រដាល់គុនខ្មែរ បានឈានដល់ការបើកឲ្យមានវគ្គបណ្ដុះបណ្ដាលអាជ្ញាកណ្ដាលចៅក្រម តម្រូវចាប់ពីកម្រិតបរិញ្ញាបត្រឡើងទៅ ដើម្បីពង្រឹងធនធានមន្រ្តីបច្ចេកទេសឲ្យកាន់តែសម្បូរបែបសម្រាប់បញ្ជូនទៅបំពេញការងារក្នុងការប្រកួតប្រដាល់គុនខ្មែរនៅតាមសង្វៀនឯកជន និងការប្រកួតកីឡាជាតិធំៗ ពិសេសត្រៀមការប្រកួតស៊ីហ្គេម ឆ្នាំ ២០២៣ ដែលកម្ពុជា ត្រូវធ្វើជាម្ចាស់ផ្ទះ។
សម្រាប់វគ្គបណ្តុះបណ្តាលដែលធ្វើនៅពហុកីឡដ្ឋានជាតិ កាលពីថ្ងៃពុធ និងថ្ងៃព្រហស្បតិ៍ គឺវាជាលើកទី ១ ដែលសហព័ន្ធ បានសម្រិតសម្រាំងសិក្ខាកាម ដែលមានសញ្ញាបត្រខ្ពស់ និងមានសិក្ខាកាមខ្លះមកពីគ្រូកីឡា ដែលធ្លាប់ឆ្លងកាត់ពីវិទ្យាស្ថានកីឡាផងដែរ ព្រោះយូរឆ្នាំមកដល់បច្ចុប្បន្ន សហព័ន្ធប្រើប្រាស់តែធនធានសមត្ថភាពអាជ្ញាកណ្តាលចៅក្រមចាស់ៗ ដែលមានស្រាប់ ដោយមានអ្នកខ្លះមិនទាំងចេះអក្សរផង។
ទោះជាយ៉ាងណា វត្តមានរបស់លោក អ៊ិន ខេមរិន្ទ និង លោក មាស សុខគ្រី ក្នុងនាមជាគ្រូឧទ្ទេស ក្នុងវគ្គនេះ នាំឲ្យមានការរិះគន់ ព្រោះមន្ត្រីសហព័ន្ធទាំង ២ នាក់នេះធ្លាប់មានរឿងអាស្រូវច្រើនក្នុងការបំពេញការងារខ្លួនឯង ដែលជាគំរូមិនល្អ។
ជុំវិញនឹងការរិះគន់នេះ លោក ម៉ិល កាដូ អគ្គនាយករងនៃអគ្គនាយកដ្ឋានកីឡា និងជាអគ្គលេខាធិការសហព័ន្ធគុណខ្មែរ ចាស់វស្សាផងនោះ បានបកស្រាយថា៖ «ធម្មតាការងារមានការខុសឆ្គងជាធម្មតា ហើយពួកគាត់មកធ្វើជាគ្រូឧទ្ទេសពេលនេះក៏យកតែគំរូល្អៗ មិនមែនយកគំរូអាក្រក់ ឬភាពច្រងេងច្រងាង មកផ្តល់ជូនសិក្ខាកាមនោះទេ។ ម្យ៉ាងទៀត ពួកគាត់មានបទពិសោធច្រើន ក្នុងក្របខ័ណ្ឌជាប្រធាន ចៅក្រមអាជ្ញាកណ្តាល»។
ចំណែកលោកឧត្តមសេនីយ៍ទោ និន ភិរម្យ ជាអគ្គលេខាធិការរងសហព័ន្ធកីឡាគុនខ្មែរបានឲ្យដឹងថា វគ្គបណ្តុះបណ្តាលនេះ មានសិក្ខាកាម ២៦ នាក់ ក្នុងនោះមានកម្រិតវប្បធម៌ចាប់ពីបរិញ្ញាបត្រ ចំនួន ២៣ នាក់ ក្រៅពីនោះជាអតីតកីឡាករប្រដាល់ល្បីៗ និងជនបរទេស ២ រូបផងដែរ ហើយទោះជាសិក្ខាកាមមានបរិញ្ញាបត្រ ប៉ុន្តែគឺជាវគ្គបឋមដែលការសិក្សាផ្ដោតសំខាន់ទៅលើបច្ចេកទេស និងក្រមសីលធម៌។
តាមរយៈការសិក្សា ២ ថ្ងៃនេះ ក្រុមគ្រូឧទ្ទេសបានវាយតម្លៃថា សិក្ខាកាមបានយកចិត្តទុកដាក់ស្តាប់ និងធ្វើការកត់ត្រា តាមដាន យ៉ាងម៉ឺងម៉ាត់ ដោយក្នុងនោះ សិក្ខាកាមមួយចំនួនធំ មានសមត្ថភាព កម្រិតវប្បធម៌ខ្ពស់ អាចទទួលយកបានចំណេះដឹងបានរហូតដល់ ៩៧ ភាគរយ ខណៈមួយចំនួនទៀត មានកម្រិតវប្បធម៌មធ្យម អាចទទួលយកបាន ៨៥ ភាគរយ។
លោក និន ភិរម្យ បានបញ្ជាក់ថា៖ «លទ្ធផលនៃការសិក្សាវគ្គនេះ តាមការពិនិត្យវាយតម្លៃឃើញថា មន្រ្តីរបស់យើងអាចទទួលយកបានរហូតដល់ ៩៥ ភាគរយ ហើយលទ្ធផលនេះសហព័ន្ធកីឡាប្រដាល់គុនខ្មែរ មានមោទនភាពណាស់ ដែលមន្ត្រីរបស់យើង ទទួលបានការយល់ដឹងកម្រិតខ្ពស់ធ្វើឲ្យសហព័ន្ធយើងមានជំនឿថា ឆ្នាំ ២០២៣ ដែលកម្ពុជាធ្វើជាម្ចាស់ផ្ទះ យើងនឹងអាចមានមន្រ្តីយើងចូលរួមក្នុងសមាសភាពជាគណៈកម្មការអន្តរជាតិ ជាមួយនឹង បណ្តាប្រទេសក្នុងអាស៊ានបាន»។
លោកឧត្តមសេនីយ៍ឯក តែម ម៉ឺន ប្រធានសហព័ន្ធកីឡាប្រដាល់គុនខ្មែរបានថ្លែងថា៖ «សិក្ខាកាមទាំងអស់ ជាធនធានមនុស្សថ្មី ហើយក្រៅពីមានកម្រិតវប្បធម៌ខ្ពស់ ពួកគេមានអាយុ ៣៥ ឆ្នាំចុះ និងចេះភាសាបរទេស ដែលជាធនធានមនុស្សសម្រាប់ព្រឹត្តិការណ៍ស៊ីហ្គេម ឆ្នាំ ២០២៣»។
លោកបានបន្ថែមថា៖ «ពួកគេមានចំណេះដឹង និងមានកាយសម្បទាល្អ គឺស្របតាមបច្ចេកទេស ហើយយើងក៏នៅមានគ្រូឧទ្ទេស ដែលមានសមត្ថភាពយល់ដឹងខ្ពស់ផ្នែកកីឡា គឺលោកវេជ្ជបណ្ឌិត ឆឹង យ៉ៅយ៉េន ជាអនុប្រធានសហព័ន្ធកីឡាប្រដាល់គុនខ្មែរ និងជាប្រធានសហព័ន្ធកីឡាប្រដាល់សកលកម្ពុជា ដោយលោកមានបទពិសោធផ្នែកចងក្រងលក្ខខណ្ឌច្បាប់ប្រកួតរបស់កីឡាគុនខ្មែរយើងផងដែរ»៕
