ភ្នំពេញ៖ ព្រឹត្តិការណ៍ប្រកួតកីឡាប្រដាល់គុនខ្មែរជ្រើសរើសជើងឯកថ្នាក់ជាតិ ឆ្នាំ ២០២០ ដែលគ្រោងនឹងប្រារព្ធធ្វើនៅថ្ងៃទី ១៦ ដល់ថ្ងៃទី ២០ ខែ វិច្ឆិកា ឆ្នាំ ២០២០ នេះ ត្រូវបានពន្យារពេល ចំណែកការប្រកួតប្រដាល់ជាលក្ខណៈឯកជននៅតាមសង្វៀនទូរទស្សន៍ប្រចាំសប្តាហ៍ ត្រូវបានផ្អាកទាំងអស់ ហើយការផ្អាក និងពន្យារពេលនៃការប្រកួតនេះ គឺធ្វើឡើងទៅតាមបទបញ្ជាណែនាំរបស់ក្រសួងសុខាភិបាលក្រសួងអប់រំ យុវជន និងកីឡា ដើម្បីបង្ការការរីករាលដាលជាថ្មីនៃជំងឺកូវីដ ១៩។
លោក តែម ម៉ឺន អគ្គលេខាធិការរង NOCC និងជាប្រធានសហព័ន្ធកីឡាប្រដាល់គុនខ្មែរបានប្រាប់ ភ្នំពេញ ប៉ុស្តិ៍ ថា៖ «ការប្រកួតជើងឯកថ្នាក់ជាតិ យើងពន្យារពេលសិន មិនទាន់ហ៊ានកំណត់ពេលវេលាបើកជាថ្មីនៅឡើយទេ ដោយរង់ចាំក្រសួងជំនាញ និងបទបញ្ជាជាថ្មីពីថ្នាក់លើ។ ចំណែកការប្រកួតនៅក្រៅក្របខ័ណ្ឌរបស់រាជរដ្ឋាភិបាល មានដូចជាប្រដាល់តាមប៉ុស្តិ៍ទូរទស្សន៍ឯកជនជាដើមនោះ គឺបិទទាំងស្រុង ដោយនៅរង់ចាំបទបញ្ជាថ្មី ហើយយើងនឹងជម្រាបជូនដំណឹងជាថ្មីទៀតថា នឹងបើកវិញពេលណា»។
ជុំវិញការផ្អាក និងពន្យារពេលប្រកួតប្រដាល់នេះ ត្រូវបានលោកឧត្តមសេនីយ៍ទោ និន ភារម្យ អនុប្រធានសហព័ន្ធកីឡាប្រដាល់គុនខ្មែរបានឲ្យដឹងថា បានអនុវត្តតាមការណែនាំរបស់ក្រសួងជំនាញ និងថ្នាក់ដឹកនាំ ដោយយោងតាមលិខិតលេខ ២២៣ សខល របស់គណៈកម្មការអន្តរក្រសួង ដើម្បីប្រយុទ្ធនឹងជំងឺកូវីដ ១៩ និងយោងលិខិតលេខ ៦៣ អយក.សជណ របស់ក្រសួងអប់រំ យុវជន និងកីឡា ចុះថ្ងៃទី ៨ ខែ វិច្ឆិកា ឆ្នាំ ២០២០ ស្តីពីការផ្អាកការលេងកីឡា ឬហាត់ប្រាណគ្រប់ប្រភេទ ដែលមានការប្រមូលផ្តុំ និងផ្អាកការចេញចូលក្នុងបរិវេណពហុកីឡដ្ឋានជាតិអូឡាំពិក ជាបណ្តោះអាសន្ន។
ចំណែក លោក រាជ សុផែន អគ្គលេខាធិការរងសហព័ន្ធកីឡាប្រដាល់គុនខ្មែរប្រាប់ថា៖ «នៅសប្តាហ៍នេះ សង្វៀនប្រកួតតាមប៉ុស្តិ៍ឯកជនមានបាយ័ន CNC ប៉ុស្តិ៍លេខ ៥ PNN និងសង្វៀនថោន ព្រមទាំងសង្វៀនឯកភ្នំ នៅខេត្តបាត់ដំបង ដែលសរុបចំនួនប្រកួតមិនតិចជាង ១៥ លើក ក្នុង ១ សប្តាហ៍នោះ ត្រូវបានផ្អាកទាំងស្រុង គឺយើងអនុវត្តតាមបទបញ្ជារបស់ថ្នាក់លើ ដើម្បីទប់ស្កាត់ការពារជំងឺឆ្លងកូវីដ ១៩»។
ជាមួយគ្នានេះ លោក ញាន សុធី អ្នករៀបចំការប្រដាល់ប្រចាំនៅសង្វៀនប៉ុស្តិ៍លេខ ៥ បានប្រាប់ថា៖ «កម្មវិធីសង្វៀនខាងខ្ញុំផ្អាកសិន ក្នុងសប្តាហ៍នេះ ប៉ុន្តែនៅតែត្រៀមប្រកួត បើសិនមានការអនុញាតជាថ្មីពីសហព័ន្ធកីឡាប្រដាល់គុនខ្មែរ ក៏ដូចជាក្រសួងអប់រំ យុវជន និងកីឡា ឬ ក្រសួងសុខាភិបាល»។
គ្រូពេទ្យជំនាញផ្នែកជំងឺឆ្លងម្នាក់ បានសាទរចំពោះវិធានការឲ្យពន្យារ និងផ្អាកការប្រដាល់នេះ ដោយលោកបានប្រាប់ ភ្នំពេញ ប៉ុស្តិ៍ ដោយសុំមិនបញ្ចេញឈ្មោះថា ការជួបជុំពេលប្រកួតមានហានិភ័យឆ្លងខ្ពស់ណាស់ គួរតែផ្អាកបណ្តោះអាសន្ន គឺល្អបំផុត។ ចំណាត់ការនេះឃើញថា ទទួលបានលទ្ធផលល្អ ក្នុងការការពារឆ្លងរាលដាល ប៉ុន្តែការបាត់បង់ប្រាក់ចំណូល ឬតម្លៃពលកម្មពីសកម្មភាពកីឡា វាពិតជាធ្វើឲ្យប៉ះពាល់ជីវភាពមន្ត្រី គ្រូបង្វឹក និងអត្តពលិក ដែលធ្វើឲ្យពួកគាត់មួយចំនួនមិនសប្បាយចិត្ត។ តែទោះជាយ៉ាងណា វាជាវិធានការមួយ ដើម្បីសុវត្ថិភាពទាំងអស់គ្នាគួរឲ្យយកចិត្តទុកដាក់។
ប្រភពដដែលនេះបាននិយាយបញ្ជាក់ថា៖ «ខ្ញុំព្រួយបារម្ភលើការប្រកួតប្រដាល់រៀងរាល់ចុងសប្តាហ៍នៅតាមទូរទស្សន៍ឯកជន ប៉ុន្តែបើសិនមានតំណាងម្ចាស់សង្វៀនប្រដាល់ខ្លះ រត់ការសុំបើកឲ្យប្រកួតវិញនោះ គឺលំបាកការពារហើយ ព្រោះការប្រកួតបែបនេះ គឺជាការផ្សព្វផ្សាយពាណិជ្ជកម្មជាចម្បង នាំឲ្យជួបហានិភ័យឆ្លងខ្ពស់ ដោយសារជាជំនួបកីឡាករ និងគណៈកម្មការមានចំនួនច្រើនគ្នាណាស់»៕