ភ្នំពេញ៖ ស្របពេលដែលការប្រមូលផ្តុំគ្រប់ប្រភេទកីឡាត្រូវបានផ្អាក ហើយសកម្មភាពកីឡានានា មិនអាចរៀបចំបានដោយសារតែវិបត្តិនៃជំងឺកូវីដ ១៩ នោះ សហព័ន្ធកីឡាប្រដាល់សកលកម្ពុជាបានអនុញ្ញាតឲ្យកីឡាករ កីឡាការិនីរបស់ខ្លួនអាចចូលប្រកួតគុនខ្មែរបាន ព្រោះនៅពេលនេះ មានតែប្រដាល់គុនខ្មែរមួយទេត្រូវបានរាជរដ្ឋាភិបាល និងសហព័ន្ធកីឡាប្រដាល់គុនខ្មែរ អនុញ្ញាតឲ្យប្រកួតជាលក្ខណៈបិទទ្វារ គ្មានអ្នកទស្សនា។
យ៉ាងណាក៏ដោយ មន្ត្រីបច្ចេកទេសកីឡាប្រដាល់សកលកម្ពុជាបានអះអាងថា នេះគ្រាន់តែជាដំណោះស្រាយបណ្តោះអាសន្នប៉ុណ្ណោះ ប៉ុន្តែការត្រៀមសម្រាប់ការហ្វឹកហាត់ ឬប្រកួតនៅក្រៅប្រទេស ឬប្រកួតជម្រើសជើងឯកជាតិប្រចាំឆ្នាំ ២០២០ យើងនឹងចាប់ផ្តើមឡើងវិញភ្លាម បើសិនជាស្ថានភាពជាក់ស្តែងនៃវីរុសកូរ៉ូណាបានស្ងប់ស្ងាត់ ឬក្រសួងខាងសុខាភិបាលគ្រប់គ្រងបាន។
លោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជាបានប្រាប់ថា៖ សម្ដេចតេជោ ហ៊ុន សែន បានប្រកាសបើកការប្រកួតគុនខ្មែរនៅតាមស្ថានីយជាធម្មតាឡើងវិញ ដោយគ្មានអ្នកទស្សនាផ្ទាល់ ដើម្បីទាញយកប្រយោជន៍សម្រាប់អត្តពលិកគុនខ្មែរ អ៊ីចឹងហើយសហព័ន្ធប្រដាល់សកលនឹងជំរុញឲ្យពួកគាត់ចូលរួមប្រកួតនៅស្ថានីយដែរ ដោយប្តូរទៅប្រកួតគុនខ្មែរវិញ ដើម្បីឲ្យពួកគាត់បានហ្វឹកហាត់ជាប់លាប់ មានទីផ្សារប្រកួត ក៏ដូចជាប្រកួតឲ្យរាងកាយរស់រវើក គឺប្រសើរជាងយើងឲ្យហ្វឹកហាត់រួចនៅស្ងៀមនោះ»។
លោកបន្តថា៖ «ជាគោលការណ៍ អត្តពលិកប្រដាល់សកល មិនអនុញ្ញាតឲ្យទៅប្រកួតគុនខ្មែរទេ ព្រោះសហព័ន្ធខុសគ្នា លក្ខខណ្ឌប្រកួតខុសគ្នា ដែលអាចធ្វើឲ្យអត្តពលិកចេញប្រកួតនៅលើឆាកអន្តរជាតិភាន់ច្រឡំ និងខុសបច្ចេកទេសដែលងាយនឹងទទួលបានចាញ់ ដោយគេចាប់កំហុស គឺខុសបច្ចេកទេសដោយអចេតនា ប៉ុន្តែក្នុងកាលៈទេសៈមានវិបត្តិជំងឺកូវីដ ១៩ នេះ យើងត្រូវតែអនុញ្ញាតជាលក្ខណៈបណ្តោះអាសន្ន ដើម្បីកុំឲ្យងាប់សាច់ដុំ ឬហ្វឹកហាត់ដោយគ្មានការប្រកួតសោះ ព្រោះគ្មានការប្រកួត គឺគ្មានអ្វីវាស់ស្ទង់សមត្ថភាពឡើយ ដ្បិតអីគ្មានសង្វៀនណាទទួលការប្រកួតប្រដាល់សកលនោះទេ»។
ទាក់ទងទៅនឹងផែនការប្រចាំឆ្នាំ ជាមួយដៃគូក្នុង និងក្រៅប្រទេស លោក ប៊ុយ សុភ័ណ្ឌ បានបង្ហើបថា ផែនការចាស់ប្រចាំឆ្នាំ ២០២០ អាចនឹងទៅរួច ព្រោះថាការព្យាករថា មេរោគកូវីដ ១៩ អាចនឹងស្ងប់ស្ងាត់ ហើយក្នុងអំឡុងខែសីហា ឬខែកញ្ញា យើងនៅតែត្រៀមធ្វើការប្រកួតជើងឯកជាតិប្រចាំឆ្នាំ។ ចំណែកផែនការបញ្ជូនអត្តពលិកជាង ១០ នាក់ទៅហាត់នៅប្រទេស ចិន និងប្រទេស គុយបា អាចនឹងទៅរួចក្នុងចុងឆ្នាំ ២០២០ ខណៈដែលការព្យាករថា មេរោគឆ្លងនេះអាចនឹងថមថយទៅវិញ។
លោកអគ្គលេខាធិការបានប្រាប់ទៀតថា៖ «ចំពោះមូលហេតុលើកទឹកចិត្តឲ្យអត្តពលិកប្រដាល់សកល ទៅប្រកួតគុនខ្មែរជាបណ្តោះអាសន្ននេះ ដោយសារទីផ្សារប្រកួតក្នុងស្រុកនៅប្រទេសយើងបច្ចុប្បន្ន គឺខាងស្ពនស័រ គេនិយមតែប្រដាល់គុនខ្មែរ ហេតុនេះយើងត្រូវតែសម្របសម្រួលទៅតាមស្ថានភាពជាក់ស្តែងជាបណ្តោះអាសន្ន ព្រោះមានផលប្រយោជន៍ខ្លះដែរ សម្រាប់អត្តពលិកប្រដាល់សកល»។
ចំណែកប្រធានសហព័ន្ធកីឡាប្រដាល់សកលកម្ពុជា លោកសាស្ត្រាចារ្យវេជ្ជបណ្ឌិត ឆឹង យ៉ៅយ៉េន ធ្លាប់មានប្រសាសន៍ពាក់ព័ន្ធទៅនឹងបញ្ហាខាងលើនេះថា៖ «កន្លងមកសហព័ន្ធប្រដាល់សកលក៏ធ្លាប់ស្នើទៅដល់បណ្ដាស្ថានីយទូរទស្សន៍មួយចំនួនឲ្យគេជួយដាក់ប្រដាល់សកលក្នុង ១ សប្ដាហ៍ បាន ១ ឬ ២ គូ នៅក្នុងកម្មវិធីប្រកួតរបស់ពួកគេដែរ ប៉ុន្តែសំណើរបស់យើងគ្មាននរណាចាប់អារម្មណ៍ ព្រោះប្រដាល់សកលប្រកួតមិនសូវទាក់ទាញដូចគុនខ្មែរ»៕