.jpg)
ការប្រកួតផ្តាច់ព្រ័ត្ររវាងកីឡាករ ឡេង លី (ក្រហម) របស់ក្រសួងមហាផ្ទៃ និង ទេស សំខាន់ របស់ក្រសួងការពារជាតិ។ រូបថត យឺន ពន្លក
ភ្នំពេញៈ ការប្រកួតកីឡាប្រដាល់សកល នៃព្រឹត្តិការណ៍កីឡាជាតិ លើកទី ២ ឆ្នាំ ២០១៨ បានរកឃើញម្ចាស់មេដាយមាសទាំង ៨ ប្រភេទទម្ងន់របស់ខ្លួនជាផ្លូវការហើយ បន្ទាប់ចំណាយពេលប្រកួតប្រជែងអស់រយៈពេល ៧ ថ្ងៃ និងបានបញ្ចប់ កាលពីល្ងាចថ្ងៃអាទិត្យនេះ។
តាមរយៈការប្រកួតនេះ ក្រសួងមហាផ្ទៃ បានឈ្នះមេដាយមាសច្រើនជាងគេ ហើយស្ថាប័នមួយនេះ ក៏កំពុងឈរនៅលេខ ១ ក្នុងនាមជាអ្នកឈ្នះបានមេដាយមាសច្រើនជាងគេផងដែរ ដោយឈ្នះបានមេដាយមាស ៦៥ ប្រាក់ ៣២ សំរឹទ្ធ ២០ នាំមុខរាជធានីភ្នំពេញ ដែលបានមាស ៣៣ ប្រាក់ ៣១ សំរឹទ្ធ ៤១ ក្រសួងការពារជាតិ បានមាស ២៩ ប្រាក់ ១៣ សំរឹទ្ធ ១៣ និងខេត្តកណ្តាល ឈរនៅលេខ ៤ ដោយឈ្នះបានមេដាយមាស ១០ ប្រាក់ ១៩ និងសំរឹទ្ធ ៣៤។
សម្រាប់ការប្រកួតកីឡាប្រដាល់សកលនេះ ក្រសួងមហាផ្ទៃ បានឈ្នះមេដាយមាសចំនួន៤។ មេដាយមាសទី ១ រកបានដោយកីឡាករ ម៉ន សាម៉េត ក្នុងប្រភេទទម្ងន់ ៥៦ គីឡូក្រាម បន្ទាប់ពីរូបគេបានយកឈ្នះ វណ្ណា លីហ៊ាង របស់ក្រសួងការពារជាតិ ហើយ ឡុង សុភី បានឈ្នះមេដាយមាសទី ២ ឲ្យក្រសួងមហាផ្ទៃ ក្នុងទម្ងន់ ៦៩ គីឡូក្រាម ក្រោយឈ្នះជើងខ្លាំង វី សាវុធ មកពីរាជធានីភ្នំពេញ។
បន្ថែមលើនេះ កីឡាករ ឡេង លី របស់ក្រសួងមហាផ្ទៃ បានយកឈ្នះ ទេស សំខាន់ របស់ក្រសួងការពារជាតិ ក្នុងការប្រកួតផ្តាច់ព្រ័ត្រ ដើម្បីឈ្នះមេដាយមាស លើប្រភេទទម្ងន់ ៧៥គីឡូក្រាម ហើយ ផុន ផាន់ណា បានឈ្នះ ស្រ៊ុន ពិធី របស់ខេត្តកណ្តាល ដើម្បីទទួលបានមេដាយមាសទី ៤ ឲ្យក្រសួងមហាផ្ទៃ ក្នុងប្រភេទទម្ងន់ ៨១ គីឡូក្រាម។
ចំណែកក្រសួងការពារជាតិ បានឈ្នះមេដាយមាស ២ ក្នុងការប្រកួតកីឡាប្រដាល់សកលនេះ ដោយក្នុងនោះ សាន តុលា បានឈ្នះកីឡាករ ហង្ស រ៉ាម៉ន មកពីរាជធានីភ្នំពេញ ក្នុងវគ្គផ្តាច់ព្រ័ត្រ ក្នុងទម្ងន់ ៥២ គីឡូក្រាម ហើយ អេវិរៈ ខាំឈិតភូថង បានយកឈ្នះ វី សុភស្ស របស់រាជធានីភ្នំពេញ វគ្គផ្តាច់ព្រ័ត្រ ក្នុងប្រភេទទម្ងន់ ៦៤ គីឡូក្រាម។
ដោយឡែកកីឡាករ ណាត់ សៀកនិន (ពេជ្រ ម្ទេសខ្មាំង) បានយកឈ្នះ សូត្រ ប៊ុនធី របស់ក្រសួងមហាផ្ទៃ ដើម្បីឈ្នះមេដាយមាស ក្នុងទម្ងន់ ៦០ គីឡូក្រាម ឲ្យខេត្តកណ្តាល ខណៈ កីឡាករ សុខុន វីហ្គាវុត្ថា បានឈ្នះមេដាយមាស ក្នុងទម្ងន់ ៤៩ គីឡូក្រាមឲ្យរាជធានីភ្នំពេញ បន្ទាប់ពីរូបគេ បានយកឈ្នះកីឡាករ ដួង សៅ មកពីខេត្តកំពត។
លោក ឆឹង យ៉ៅយ៉េន ប្រធានសហព័ន្ធកីឡាប្រដាល់សកលកម្ពុជា មានថ្លែងថា៖«ការប្រកួតនេះ បានបញ្ចប់យ៉ាងរលួន ព្រោះកីឡាករគ្មានរបួស ហើយការប្តឹងតវ៉ាណាមួយពីភាគីចាញ់ក៏គ្មានដែរ។ ខ្ញុំអាចនិយាយបានថា ការប្រកួតកីឡាជាតិ លើកទី២ ឆ្នាំ២០១៨នេះ គឺល្អគ្រប់យ៉ាងទាំងបច្ចេកទេសដឹកនាំ ការប្រកួត និងការហូបចុកស្នាក់នៅបានល្អ»៕
