ភ្នំពេញ៖ បន្ថែមទៅលើការប្រមូលផ្តុំក្រុមប្រដាល់គុនខ្មែរ គឺនៅសប្តាហ៍នេះ សហព័ន្ធកីឡាប្រដាល់គុនខ្មែរ នឹងធ្វើការប្រមូលផ្តុំកីឡាករចំនួន ៦ នាក់ទៀត ដើម្បីត្រៀមចូលរួមប្រកួតប្រជែង នៅស៊ីហ្គេម លើកទី៣០ ឆ្នាំ ២០១៩ ខាងមុខនេះដែរ លើប្រភេទកីឡា «Kick boxing» ហើយនេះជាការជ្រើសរើសភ្លាមៗ ខណៈម្ចាស់ផ្ទះហ្វីលីពីន ទើបតែសម្រេចដាក់ បញ្ចូល Kick boxing នោះ។
លោក តែម ម៉ឺន អគ្គលេខាធិការរង NOCC និងជាប្រធានសហព័ន្ធកីឡាប្រដាល់គុនខ្មែរបានប្រាប់ភ្នំពេញ ប៉ុស្តិ៍ ថា កីឡាករ Kick boxing ត្រូវដាក់ឲ្យប្រមូលផ្តុំ ហ្វឹកហាត់ និងត្រៀមចេញទៅប្រកួតស៊ីហ្គេម លើកទី៣០ ឆ្នាំ ២០១៩ នៅហ្វីលីពីនខាងមុខ បន្ទាប់ពីថ្នាក់ដឹកនាំនៃស្ថាប័នកីឡាទាំង ២ មានក្រសួងអប់រំ យុវជន និងកីឡា និង NOCC បានប្រគល់ភារកិច្ចឲ្យសហព័ន្ធកីឡាប្រដាល់គុនខ្មែររៀបចំពង្រឹងសមត្ថភាពដល់ប្រតិភូ គ្រូបង្វឹក និងកីឡាករ»។
លោក តែម ម៉ឺន បានពន្យល់ថា៖ «កីឡា Kick boxing នេះមានការប្រកួតខុសពីកីឡាគុនខ្មែរ ខុសពីកីឡាមួយថៃ និងខុសពីកីឡាគុន (Kun) តែបន្តិចបន្តួចប៉ុណ្ណោះ គឺវាយចម្ងាយ មិនឲ្យឱបគ្នាវាយនោះទេ ប៉ុន្តែចំណុចដូចគ្នាទៅនឹងប្រដាល់គុនខ្មែរ ឬ Kun គឺអាចទាត់ ម៉ាត់ វាយកែង ជង្គង់ បានដូចគ្នាមួយកំប្លេ គឺវាយកែង ឬជង្គង់ ពេលឱបគ្នា ឬទាញមកវាយជង្គង់»។
តាមបញ្ជីឈ្មោះដែលសហព័ន្ធបានសម្រេចជាផ្លូវការរួចហើយ និងបានបញ្ជូនមកឲ្យ NOCC នោះ គឺក្រុមKick boxing កម្ពុជាមាន ៨ នាក់ ក្នុងនោះមានលោក និន ភិរម្យ ជាប្រធានប្រតិភូ លោក ហង្ស ស៊ឺន ជាគ្រូបង្វឹក ចំណែកកីឡាករទាំង ៦ នាក់ មាន ហ៊ឹម សេរី ទម្ងន់ ៥១ គ.ក្រ ខេម ចាន់ ទម្ងន់ ៥៤ គ.ក្រ លី សុជាតិ (អេលីត ចំរើន) ទម្ងន់ ៥៧ គ.ក្រ ចក់ ស៊ីវិន (សុខ សាវិន) ទម្ងន់ ៦០ គ.ក្រ ផល សុភ័ត្រ (ផល សោភ័ណ្ឌ) ទម្ងន់ ៦៣,៥ គីឡូក្រាម និង ឡៅ ចន្ទ្រា ទម្ងន់ ៦៩ គីឡូក្រាម។
យ៉ាងណាក៏ដោយ មានកីឡាករ និងក្លិបសមាគមមួយចំនួនសម្តែងការខកចិត្ត ខណៈដែលគណៈកម្មការការជ្រើសកីឡាករចេញទៅប្រកួតនេះ គឺធ្វើឡើងស្ងាត់ៗ ហើយបេក្ខភាពដែលជាកីឡាករបានចេញទៅប្រកួតមានកម្រិតល្អ ប៉ុន្តែគ្មានការប្រកួតប្រជែង ដោយតម្លាភាពព្រោះជើងខ្លាំងៗមួយចំនួនក៏ចង់ចេញទៅប្រកួតដែរ។
ជុំវិញការរិះគន់នេះ លោក តែម ម៉ឺន បានបកស្រាយថា៖ «យើងបានប្រជុំជ្រើសរើសដោយតម្លាភាព ជាមួយគណៈកម្មាធិការប្រតិបត្តិសហព័ន្ធ បានយ៉ាងត្រឹមត្រូវ។ ម្យ៉ាងទៀត នេះជាកម្មវិធីជាបន្ទាន់របស់ម្ចាស់ផ្ទះស៊ីហ្គេម និង NOCC តម្រូវជាបន្ទាន់ ដោយយើងជ្រើសរើសដោយគ្មានពេលវេលា សម្រាប់បើកការប្រកួតជម្រុះនោះឡើយ»។
លោកបញ្ជាក់ថា៖ «ការជ្រើសរើស គឺផ្អែកលើសមត្ថភាព និងការវាយតម្លៃតាមស្នាដៃរបស់កីឡាករកន្លងមកបានយ៉ាងល្អិតល្អន់ ប៉ុន្តែកីឡាករដែលមិនបានទៅ គឺតែងតែមានសតិអារម្មណ៍មិនល្អ តែឲ្យយើងធ្វើដូចម្តេច បើក្នុងមួយប្រភេទទម្ងន់បានតែម្នាក់នោះ»៕