ភ្នំពេញ៖ លោកនាយឧត្ដមសេនីយ៍ គៀត ច័ន្ទថារិទ្ធ ដែលត្រូវបានជ្រើសតាំងជាប្រធានសហព័ន្ធកីឡាវាយកូនឃ្លីលើតុកម្ពុជាកាលថ្ងៃ ២១ ខែ វិច្ឆិកា ឆ្នាំ ២០១៩ នោះ បានបញ្ចេញនូវទស្សនៈ ជាមួយនឹងការដាក់ចេញនូវផែនការយុទ្ធសាស្ត្រថ្មី ដោយផ្តោតខ្លាំងទៅលើការពង្រឹងការហ្វឹកហាត់ និងការរៀបចំការប្រកួតរបស់ក្រុមអត្តពលិក គឺធ្វើយ៉ាងណាឲ្យពួកគេមានសមត្ថភាពអាចឈានទៅដណ្តើមបានមេដាយនៅលើឆាកអន្តរជាតិ ពិសេសការប្រកួតស៊ីហ្គេមនៅវៀតណាម និងនៅកម្ពុជា។
បើទោះជាវិបត្តិជំងឺឆ្លងកូវីដ ១៩ បានធ្វើឲ្យសកម្មភាពចេញប្រកួតជាច្រើនទាំងក្នុងកម្រិតអាស៊ីអាគ្នេយ៍ និងទ្វីប ត្រូវបានផ្អាកទាំងស្រុង ប៉ុន្តែយុទ្ធសាស្ត្ររបស់សហព័ន្ធកីឡាវាយកូនឃ្លីលើតុ នៅតែហ្វឹកហាត់ និងបង្កើតបាននូវមូលនិធិទ្រទ្រង់ព្រមទាំងមានលេខាធិការដ្ឋានសម្រាប់គ្រប់គ្រងបច្ចេកទេសទៀតផង ព្រមទាំងបានដាក់ចេញនៅផែនការបង្កើតព្រឹត្តិការណ៍ប្រកួតឲ្យបានច្រើនសម្រាប់អត្តពលិក។
ឆ្លើយតបចំពោះកិច្ចសម្ភាសន៍ជាមួយភ្នំពេញ ប៉ុស្តិ៍ លោកនាយឧត្ដមសេនីយ៍ គៀត ច័ន្ទថារិទ្ធ មានប្រសាសន៍ថា៖ «ខ្ញុំទើបតែចូលមកធ្វើជាប្រធានសហព័ន្ធ ស្របពេលមានការផ្ទុះនូវជំងឺកូវីដ ១៩ នាំឲ្យប៉ះពាល់ខ្លាំងដល់ការអភិវឌ្ឍវិស័យកីឡា។ យ៉ាងនេះក្តី ក្នុងរយៈពេលជិត ១ ឆ្នាំនេះ យើងក៏សាងបាននូវលេខាធិការដ្ឋានមួយដែលឃ្លាំមើលការហ្វឹកហាត់ កែច្នៃទីតាំងហ្វឹកហាត់ឲ្យមានលក្ខណៈស្តង់ដាព្រមទាំងបង្កើតបាននូវមូលនិធិគាំទ្រជាថវិកាក្នុងសហព័ន្ធបានល្អ ដើម្បីឲ្យអត្តពលិកយើងមានសមត្ថភាពខ្ពស់អាចដណ្តើមបានជ័យជម្នះពីលើឆាកអន្តរជាតិ ពិសេសការប្រកួតស៊ីហ្គេមលើកទី៣១ ឆ្នាំ ២០២១ នៅវៀតណាម និងស៊ីហ្គេមលើកទី៣២ ឆ្នាំ ២០២៣ ដែលកម្ពុជាធ្វើម្ចាស់ផ្ទះ»។
«ក្នុងនាមខ្ញុំជាអ្នកដឹកនាំសហព័ន្ធកីឡាវាយកូនឃ្លីលើតុនេះ ខ្ញុំនឹងបន្តឲ្យមានការប្រកួតធ្វើតេស្តសមត្ថភាពបច្ចេកទេស សម្រាប់កីឡាករ កីឡាការិនីជម្រើសជាតិ និងថ្នាល ឲ្យបាន ៣ ដងក្នុង ១ ឆ្នាំ គឺធ្វើនៅត្រីមាស ឆមាស និងនៅចុងឆ្នាំ ដើម្បីបង្កើនកម្រិតសមត្ថភាពអត្តពលិកជម្រើសជាតិ និងថ្នាលឲ្យកាន់តែខ្លាំង សម្រាប់ត្រៀមការប្រកួតលើឆាកអន្តរជាតិ ពិសេសការប្រកួតស៊ីហ្គេម ឆ្នាំ ២០២១ នៅប្រទេសវៀតណាម និងស៊ីហ្គេម ឆ្នាំ ២០២៣ នៅកម្ពុជា»។
លោក គៀត ច័ន្ទថារិទ្ធ បានលម្អិតបន្ថែមថា៖ «ទាក់ទងទៅនឹងការហ្វឹកហាត់ យើងផ្តល់ប្រាក់បន្ថែមរបស់សហព័ន្ធដល់អត្តពលិកមកហ្វឹកហាត់តាមម៉ោង គឺបន្ថែមពីលើរបប ឬប្រាក់របស់ក្រសួងអប់រំ ហើយក្នុង ១ ឆ្នាំៗ យើងនឹងរៀបចំការប្រកួតឲ្យបានច្រើន ដូចជាឥឡូវយើងរៀបចំមាន ៤ លើក ដើម្បីពង្រឹងសមត្ថភាពដូចជាការប្រកួតជើងឯកថ្នាក់ជាតិប្រចាំឆ្នាំ, ប្រកួតពានរង្វាន់របស់ក្រុមហ៊ុន, ប្រកួតពានរង្វាន់របស់សហព័ន្ធ និងប្រកួតធ្វើតេស្តវាស់ស្ទង់កម្រិតសមត្ថភាព ក្រោយពេលហ្វឹកហាត់មួយរយៈ។ ទាំងនេះជាទស្សនៈ និងផែនការរបស់ខ្ញុំ និងលោក ស៊ុន សុទ្ធារិទ្ធ និងថ្នាក់ដឹកនាំរបស់សហព័ន្ធជាច្រើនរូបទៀត»។
ចំណែកលោក ស៊ុន សុទ្ធារិទ្ធ ដែលបានវិលមកធ្វើជាអគ្គលេខាធិការវិញ ក្រោយលាឈប់អស់ពេល ៥ ឆ្នាំ បានប្រាប់ថា៖ «ការបានវិលមកកាន់តួនាទីនេះវិញ ជាមួយលោកប្រធាន គឺដល់ពេលវេលាមួយ ដែលយើងត្រូវប្រឹងប្រែងផលិតឲ្យអត្តពលិកយើងមានសមត្ថភាពល្អ ដើម្បីប្រកួតទទួលបានជ័យជម្នះនៅលើឆាកអន្តរជាតិហើយ»។
លោកបន្ថែមថា៖ «អ្វីដែលយើងសង្ឃឹមខ្ពស់ក្នុងការដណ្តើមមេដាយ គឺអត្តពលិកមានសមត្ថភាពខ្ពស់តាមរយៈហ្វឹកហាត់ និងរៀបចំការប្រកួតដោយសហព័ន្ធសប្បាយចិត្ត និងមានទឹកចិត្តក្នុងការដឹកនាំគ្រប់គ្រង អ៊ីចឹងយើងគ្មានអ្វីលំបាកទៅលើថវិកាទេ ព្រោះលោកប្រធាន គៀត ច័ន្ទថារិទ្ធ បង្កើតបាននូវលេខាធិការដ្ឋានមួយ និងមូលនិធិទ្រទ្រង់ ដែលមានអនុប្រធានសហព័ន្ធជាច្រើនរូប សុទ្ធសឹងតែមកជួយ ដោយលះបង់ពេលវេលា ថវិកាផ្ទាល់ខ្លួន ក្នុងការរួមចំណែកឲ្យកីឡានេះ ឈានទៅរីកចម្រើន នឹងអាចដណ្តើមបានមេដាយ ក្នុងការប្រកួតលើអន្តរជាតិខាងមុខ៕